Read Yucateco Proverbios 25 Bible Online

Proverbios 25 - Yucateco bible

Proverbios 25

¹Lelo'oba' u cóomcom ca'anbesajo'ob xan Salomón, dzíibta'ano'ob tumen le máaxo'ob meyajtic Ezequías, u ajawil Judá:

²Nojbe'en ti' Ku u muculta'al ta'acbil t'aano'ob, tziiquil xan ti' ajawo'ob u kuchul u yojéelto'ob.

³U ca'analil ca'an, u taamilo'ob lu'um yéetel u tuuculo'ob ajawo'obe', ba'alo'ob ma' tu páajtal u yojéelta'alo'ob.

⁴Lukes ti' le platao' le ba'axo'ob kaastaco', le j meyaj platao' cu beetic jun p'éel nu'ucul u yu'ukul vino;

⁵ajawe' cu tzelic ichil u aj meyajo'ob le loolob máaco'obo', beyo' u jalach káanche'e' cu p'áatal jedzecnac ti' ti'ibil cuxtal.

⁶Ma' a tuculticabáa noj ba'alech tu táan ajaw, mix a cutal tu cúuchil nucuch máaco'ob;

⁷asab ma'alob ca t'a'anaquech na'acal te'elo', ma' ca pa'ajac a subtal tu táan nucuch máaco'ob. Ba'ax bíin u wil jach ta wichile'

⁸ma' séeb bisic tu najil p'is óol, tumen u láak aj jaajcunaje' je'el ya'alic táan a tuuse' tu dzo'oque' teche' ma' wojel ba'ax bíin a beeti'.

⁹Tocabáa ti' máax taquic a pool, ba'ale' ma' chíicbesic u mucul t'aan yaanal máac;

¹⁰tumen yaan máax cu páajtal u yu'ubiquech, je'el xan pajic a subtale', a kaaba'e' u p'a'atal kaasile' cu dzo'ocole' ma' bíin páatac u yutztali'.

¹¹T'aano'ob cu ya'ala'al tu kiinile' beyo'ob manzana oro u ca'aj baja'an plata ti'e'.

¹²Bey jun p'éel dzipit wa jun p'éel léech cal ma'alob oro u ca'aje', bey u taal le ma'alob keyajo'ob ti' máax u yojel u yu'ube'.

¹³Aj bisaj t'aan chuca'an u yóole' u ti'al le máax túuxtique' bey síisis bat u ti'al yáax kiine', tumen cu dzáic túunben óol ti' u dzuulil.

¹⁴Múuyal yéetel iik x ma' ja'il bey le máax chéen cu babal a'alic u dzáic wa ba'ax.

¹⁵Chuca'an óolale' cu jóomsic yóol le p'u'ujulo'; muumun t'aano'obe' cu ch'enic kuuxil.

¹⁶Wa ca nactáantic caabe', ma' u máan tíip'il a jaantic, bic xeenaquech tu yo'olal a sen jaantic.

¹⁷Wa ca xíimbalt a wéet bisajbáe' ma' a babal bini', bic a náaques u yóol, ca kuchuc u p'ectech.

¹⁸U nu'ucul a pa'ic tuunich, máascab yéetel julub pupudzqui u ni'e', ¡bey le máax cu ya'alic ba'al ma' jaaj tu yo'olal u yéet bisajbáe'!

¹⁹A walab óoltic jun túul j kex óol tu kiinil yaj óolale' bey u yúuchul xíimbal yéetel jun p'éel ooc caachale' wa ca janalnac yéetel jun p'éel u coj joolol.

²⁰U yúuchul kaay ti' jun p'éel pucsi'ikal yaan yaj óolal ti'e', bey u ch'áajal su'udz ba'al yóokol wíinclil pokchaja'ane' wa u pitic u nook wíinic tu kiinil que'ele'.

²¹Wa wi'ij a aj p'eeque', dzáa ba'al u jaante; wa ukaje', dzáa ja' u yukej;

²²beyo' bíin a beet u yelel u yich yéetel u sublaquil; Yuumtzile' xane' bíin u bo'ot ti' teech.

²³Tu yo'olal u yiikal j xamane' cu taal cháac, tu yo'olal a'alaj ba'ale' cu taal dzíidzic ich.

²⁴U yúuchul cajtal jun tu'uk tu yóokol naje', asab ma'alob ma' ti' jun p'éel cóococh naj tu tzéel jun túul co'olel x caxan ba'atel.

²⁵Je'el bix u ch'áajal ja' tu caal jun túul j ukaje' bey u yu'uba'al le ma'alob péectzilo'ob cu taalo'ob ti' náach lu'umilo'ob.

²⁶Sayab ja' pu'ukpaja'an yéetel xa'akpaja'ane', bey le j ma' si'ipil cu quiquilaanquil tu táan máac si'ipilchaja'an.

²⁷Ma' tu beetic utz u jaanta'al ya'ab caab, ba'ale' jun p'éel tziiquil u caxta'al ba'ax talam.

²⁸Je'el bix noj caaj x ma' tuulum jéechcab ti' loolob máaco'obe', bey máax ma' u yojel u ya'al ma'il ti' u yaayam.