Read Yucateco Proverbios 27 Bible Online

Proverbios 27 - Yucateco bible

Proverbios 27

¹Ma' a nonoj báil tu yo'olal u kiinil sáamal tumen ma' wojel ba'ax cu taasic u kiinil sáamali'.

²P'at a ya'ala'al ba'ax utz ta wo'olal tumen yaanal; tumen ma' utz a qui' t'anticabái'.

³Tuunich yéetel sa'am lu'ume' aaltaco'ob, ba'ale' asab aalil u p'uujul j ma' ojéelaj.

⁴P'u'ujule' loolob ba'al, kuuxile' cu kascunaj, ba'ale' saawinaje' ma' tu páajtal u ka'alal u beel.

⁵Keyaj yéetel jaaj óolale' asab utz, ma' bey x mucul yaacunaje'.

⁶Cu páajtal a wocsic a wóol ti' jun túul dzíidzic aj bisajbáa, asab utz, ma' bey yéetel a aj p'eec cu dzu'udziquech.

⁷Máax na'aje' tac caab cu p'ectic; máax wi'ije' tac ba'al káaj ch'ujuc u yu'ubic.

⁸Bey ch'íich cu xiknal náach ti' u kue' bey le máac cu máan náach tu'ux síije'.

⁹U ti'al u qui'imactal u yóol jun p'éel pucsi'ikale', ma'alob qui'iboc ba'alo'ob; u ti'al u qui' óolta'al jun p'éel pixane', ma'alob u tzool xiquin jun túul j éet bisajbáa.

¹⁰Mix bikin a p'áatic a wéet bisajbáa mix u yéet bisajabáa a taata. Ma' u najmal a bin tu yotoch a sucu'un yéetel talam ba'alo'obi'. U cajtal a wéet caajal ta tzéele', asab utz ma' bey a sucu'un náach ti' techo'.

¹¹In xibil paal, yanac a wojéelajil u ti'al a beetic u qui'imactal in wóol; beyo' bíin yanac ba'ax in wa'al ti' máaxo'ob u káato'ob u pajo'ob in subtal.

¹²Aj ojéelaje' cu yilic u taal quíimile' cu tzelicubáa; j ma' ojéelaje' cu bin tu tojil, cu jéentanta'al tumen le loobo'.

¹³Máax cu kóochic u p'aax yaanal máaque' u lukes u nook, ch'a'a bey bo'olale'.

¹⁴A te'escuntic yéetel awat a wéet bisajbáa ma' sáasaque', u ti'al leti'e' óoli' bey pooch'ile'.

¹⁵Jun túul co'olel x caxan ba'atele' bey u ch'áajal ja' mantadz tu kiinil ja'ile'.

¹⁶A wóoltic a wet'ic a ba'atele' bey a tucultic a ch'enic yustaj iik, wa a lo'op'ic aceite yéetel a kabe'.

¹⁷Máascabe' cu jóokesa'al u yej yéetel u láak máascab wíinique' cu yiijtal iquil u bisicubáa yéetel láak wíinic.

¹⁸Máax canantic u pakal higoe' cu jaantic u yich higo'ob; le máax canantic u dzuulile' cu kamic ti' u dzuulil bo'olal.

¹⁹Je'el bix u chíicpajal u yoochel u yich wíinic ich ja'e', bey u chíicpajal u yich tu tuucul.

²⁰Quíimil, mucnal yéetel u dzíibolaj wíinique' mix bikin bíin xu'uluco'ob.

²¹Oro yéetel platae' cu jajcunta'al tumen káak; J xiibe' cu jajcunta'al yéetel qui'iqui' t'aano'ob.

²²Ti' j ma' ojéelaje' ma' tu lukul u j ma' ojéelajil quex ca a babal ju'ujuch'e.

²³Ojéelt mantadz bix yanil a j tamano'ob, ma' u jáawal a tucultic u múuch'ul a j tamano'ob.

²⁴Ayikalilo'obe' ma' tu t'íililo'ob, mix péet jo'olo'ob.

²⁵Quéen jóokoc xíiwe', quéen tóop'oc ya'axil, yéetel quéen mo'oloc u xíiwilo'ob káaxo'obe'

²⁶a mejen j tamano'obe' bíin u dza'ob ti' teech u nu'ucul a búuc, a mejen j yuuco'obe' bíin u dza'ob ti' taakin u ti'al a manic lu'umo'ob,

²⁷yéetel ti' a walak j x yuuco'obe' ya'ab leche u ti'al a tzéenticabáa yéetel paalal yéetel xan tuláacal le máaxo'ob meyajtiquech.