Read Yucateco Proverbios 28 Bible Online

Proverbios 28 - Yucateco bible

Proverbios 28

¹J loolob wíinique', cu púudzul quex mix máac ch'a'apachtic, ba'ale' aj ti'ibil cuxtalo'obe' cajacbalo'ob x ma' sajaquil bey jun túul leóne'.

²Le kiin cu kastal jun múuch' caajo'obe' cu ya'abtal u méektáano'ob, ba'ale' máax ma'alob u méektane' u yojel u p'at tu tzoolol tuláacal ba'al.

³Loolob wíinique' cu yedzic óotzilo'ob bey ka'amcach cháac cu kascuntic u yich pakale'.

⁴Máaxo'ob cu tzelicuba'ob ti' a'almaj t'aane' cu báay jo'oltico'ob j loolob wíinic; máaxo'ob dzo'ocbesico'ob a'almaj t'aane' cu qui' t'antico'ob j loolob wíinic.

⁵J loolob wíinico'obe' ma' tu na'atico'ob ba'ax ti'ibil bejil, ba'ale' máaxo'ob cu payalchi'ob ti' Yuumtzile' tuláacal cu na'atico'ob.

⁶Óotzil utz u cuxtale' asab ma'alob, ma' bey ayikalil keechel tuucule'.

⁷Máax dzo'ocbesic u a'almaj t'aan Yuumtzile' jun túul paal yaan u na'at, ba'ale' máax cu yocsicubáa yéetel máaco'ob poocho'obe' cu pajic u subtal u taata.

⁸Máax cu niccuntic ayikalilo'ob iquil u tzáic bo'olal u yóokol paaxo'ob cu niccuntic u ti'al le máax cu chi'ic óotzil ti' óotzilo'ob.

⁹Wa máax ma' u káat u táan óolt u ya'almaj t'aan Kue'. mix Ku xane' bíin u yu'ub u payalchi'ob.

¹⁰Máax bisic ti' kaakas bej utzul máaco'obe', bíin lúubuc ti' le léech cu dzáico'; ba'ale' máaco'ob ma' tu dzáico'ob tu'ux ke'eylo'obe' bíin u kamo'ob ba'alo'ob asab utz.

¹¹Ayikale' cu tucultic jach yaan ya'ab u yojéelaj, ba'ale' óotzil yéetel j na'ate' cu páajtal u dzáico'ob ti' jaajile'.

¹²Tu kiinil cu béeytal aj ti'ibil cuxtalo'obe' cu noj kiinbesa'al; le kiin cu béeytal loolob bejo'obe', cu ta'acbesicuba'ob wíinico'obo'.

¹³Máax cu muclic kebane', ma' bíin xi'ic utzil ti'i'; ba'ale' máax cu cáantic yéetel cu p'atique' bíin sa'atsa'ac u si'ipil.

¹⁴Qui' u yóol máax mantadz cu tziquic Yuumtzil; ba'ale' máax dzu'uy u poole' bíin xi'ic sen kaasil ti'.

¹⁵Je'el bix jun túul león cu jéencal wa jun túul oso wi'ije' bey le loolob máac cu méektáantic jun p'éel caaj óotzile'.

¹⁶J méektáan, mina'an u tuucule' cu ya'abcuntic u yedzic wíinic; ba'ale' máax ma' j kaakas dzíibole' bíin chowacchajac u cuxtal.

¹⁷Máax u quíimsic wíinique' ma' bíin u jech u lúubul mucnali'; ¡mix máax u táabal u yáante!

¹⁸Máax utz u cuxtale' bíin to'ococ, ba'ale' j loolob wíinique' bíin xi'ic sen kaasil ti'.

¹⁹Máax cu meyajtic u coole' tac u janal cu p'áatal u yalab; máax cu máan yéetel j ma' beelo'obe', ba'ax cu yalabtic ti'e' óotzilil.

²⁰Máax ma' j ca'a p'éel iche', bíin qui'iqui' t'anta'ac; máax cu yaayamtic Ayikalilo'obe' ma' bíin p'áatac x ma' jaadzili'.

²¹Ma' utz u mixba'acunta'al mix máaqui'; tac tu yo'olal jun xéet' waaje' je'el u páajtal kebanchajal wíinique'.

²²Aj siidz óolaje' cu taactal u ayikaltal séeb, ma' u yojele', wa bíin talac u yóokol u óotzilil.

²³Cu kuchul u kiinil u asab qui' óolta'al le máax cu p'a'as t'aano', ma' bey le cu qui' t'aano'.

²⁴U yéet bisajbáa quíimsaj wíinico'ob máax cu yocoltic u taata, cu yocoltic xan u maama, cu dzo'ocole' cu babal a'alic ma' kebani'.

²⁵Máax cu sen dzidz óolaje' cu léecsic ba'atelo'ob; ba'ale' máax u kubmaj u yóol ti' Yuumtzile' cu ayikaltal.

²⁶Chéen jun túul j ma' ojel cu yocsic u yóol ti' u tuuculo'ob; máax cu meyaj yéetel ojéelaje' cu bin utzil ti'.

²⁷Máax áantic óotzile' mix ba'al cu bineltic ti'; ba'ale' máax ma' tu yóoltic u yáante' sen yaj bíin xi'ic ti'.

²⁸Le kiin cu béeytalo'ob le j loolob máaco'obo' caaje' cu ta'acbesicubáa; ba'ale' quéen kuchuc u kiinil u xu'ululo'obe' cu ya'abtal ti'ibil bejo'ob.