Read Yucateco Proverbios 3 Bible Online

Proverbios 3 - Yucateco bible

Proverbios 3

¹In j xibil paal ma' a tu'ubsic in ca'anbesajo'ob; t'ilcunt ta tuucul in wa'almaj t'aano'ob,

²beyo' bíin yanac ti' teech jun p'éel chowac cuxtal chup yéetel qui'imac óolal.

³Mix bikin bíin a xúump'at le yaabilaj, yéetel le jaajo'; biso'ob ta wéetel bey jun p'éel bak caal, t'ilcunto'ob ta tuucul,

⁴beyo' bíin yanac ti' teech u yutzil yéetel u yaacunaj Ku yéetel xan u yaabilaj le máaco'obo'.

⁵Oques a wóol ti' Yuumtzil yéetel tuláacal a pucsi'ikal ma' a walab óoltic le na'at yaan ti' techo'.

⁶Ma' a tu'ubsic Yuumtzil ti' tuláacal ba'ax ca beetic, leti' túune' bíin u bisech ti' u tojil bej.

⁷Ma' a tucultic wa sen ya'ab ba'al a wojel; dzáa tziiquil ti' Yuumtzil, tzelabáa ti' le kaaso':

⁸¡lelo' leti' u asab ma'alobil dzaac u ti'al a mu'uka'ancunsic a wíinclil!

⁹Dzáa a tziiquil ti' Yuumtzil yéetel a ayikalilo'ob bey xan yéetel u yáax icho'ob a pakalo'ob;

¹⁰beyo' bíin chu'upuc a ch'iilo'ob bey xan u chúujilo'ob a wo'och vino.

¹¹In j xibil paal, ma' a wa'alic ma'il ti' u nu'uc t'aan Yuumtzil, mix a kuuxil tu yo'olal u keyajo'ob;

¹²tumen Yuumtzile' cu ya'alic u nu'uc ti' máax u yaabilmaj, bey jun túul taata cu ya'alic u nu'uc ti' u yaabilaj paale'.

¹³Qui' yóol le máax cu caxtic le ojéelajo', le máax cu ti'alintic le na'ato';

¹⁴tumen asab ma'alob ba'ax cu dzáic ma' je'el bix le platao' yéetel asab nucuch utzil ba'alo'ob cu beetic ti' le cu beetic le oroo'.

¹⁵Le ojéelajo' asab co'oj u tojol ti' le qui'ichquelem tuunicho'obo' ¡mix tu páajtal u que'etel yéetel ba'alo'ob cu sen dzíibolta'alo'ob!

¹⁶Jun tzéele' cu dzáic chowac cuxtal jun láak jun tzéele' cu dzáic ayikalilo'ob yéetel tziiquilo'ob.

¹⁷Utz u taal u yúuchul xíimbal tu bejilo'ob le ojéelajilo'; u yúuchul xíimbal tu bejilo'obe' cu beetic yantal cuxtal yéetel jéedzel.

¹⁸Le ojéelajo' cuxtal u ti'al le máax ti'alintique'; ¡qui' yóolo'ob le máaxo'ob u yojelo'ob u t'ilcunto'ob tu cuxtalo'ob!

¹⁹Yéetel ojéelajil bey xan yéetel kaj óolale', Yuumtzile' tu yedzcuntaj le ca'ano'obo' bey xan le lu'uma'

²⁰yéetel ojéelajil tu beetaj u jatzicubáa le ka'anabo' bey xan tu beetaj u jóokol p'ulja' ti' le múuyalo'obo'.

²¹In j xibil paal yanac ti' teech ma'alob a tuucul mantadz yiijchajac xanatuucul mantadz,

²²tumen a ti'ale' u sayabil a cuxtal leti' bíin u qui'ichquelemcunt a cuxtal bey bak caale'.

²³Bíin páatchajac a máan x ma' sajaquil ti' le bejo'obo' mix bikin xan bíin t'óochpajquech.

²⁴Le quéen a je'elsajbáe' ma' bíin a ch'a'a sajaquili'; le quéen chilaqueche' bíin qui'iqui' wenequech.

²⁵Ma' bíin a ch'a'a sajaquil ti' loob cu téec kuchuli' mix ti' núumsaj yaj bíin talac tu yóokol le loolob máaco'obo',

²⁶tumen Yuumtzile' bíin u dzáa ti' teech ocsaj óolal ma' bíin u cha'a xan a lúubul ti' wa ba'ax léechili'.

²⁷Ma' a cóomquintic a kab u ti'al a beetic utz ti' le máax káatic ti' teech, le quéen páatac a beetique'.

²⁸Ma' a p'atic u ti'al sáamal le áantaj cu páajtal a beetic bejela'e'.

²⁹Ma' a tucultic a beetic kaakas ba'alo'ob ti' le máax u dzaamaj u yóol ti' techo'.

³⁰Ma' a caxantic ba'atel ti' mix máac wa mix máac beetmail kaas ti' teech.

³¹Ma' a dzíiboltic mix ba'al ti' le loolob máaco'obo' mix a cuxtal je'el bix u cuxtalo'obo';

³²tumen kaas u lúubul ti' Yuumtzil le loolob máaco'obo', ba'ale' ti' le utzil máaco'obo' cu dzáic u yocsaj óolal.

³³Yuumtzile' cu loolob t'antic u yotoch le j men loob wíinico', ba'ale' cu qui' t'antic u yotoch le aj ti'ibil bejo'.

³⁴Yuumtzile' cu che'ejtic le j p'a'aso'obo', ba'ale' cu ye'esic u yaacunaj ti' le j cabal óolo'obo'.

³⁵Le tziiquilo' leti' u bo'olal le aj ojéelo'obo', ba'ale' le j ma' na'ato'obo' cu kaj óolta'alo'ob ti' u j ma' subtalo'ob.