Read Yucateco Proverbios 30 Bible Online

Proverbios 30 - Yucateco bible

Proverbios 30

¹U cóomcom ca'anbesajo'ob Agur u paal Jaqué, u cajnáal Masa. Ca tu ya'alaj Agur ti' Etiel yéetel ti' Ucal:

²Tene' mix ba'al in biilal ichil tuláacal le máaco'obo', mina'an ti' téen u na'at wíinic.

³Ma' yanac ti' téen ojéelaji', mix ba'al xan in wojel tu yo'olal sen quili'icho'.

⁴¿Máax na'aca'an ema'an xan j ca'an? ¿Máax cu páajtal u lap'ic iik yéetel u kab? ¿Máax to'ic ka'anab yéetel u suyem? ¿Máax dzáa u xuul lu'um? ¡ma' a wa'alic ti' teen wa a wojel u kaaba', bey xan u kaaba' u paal!

⁵Yuumtzile' cu canantic máaxo'ob u yoquesmaj u yóolo'ob ti'o'; tumen leti'e' cu dzo'ocbesic tuláacal u séeb chi'ob.

⁶Ma' tzayic mix ba'al ti' le ba'ax cu ya'alico'; tumen wa ca tzayique' je'el u keyiqueche' je'el xan u beetic a p'áatal bey j tuuse'.

⁷Chéen ca'a p'éel ba'al dzo'oc in káatmaj ti' teech, in Ku; dzáaten ma'ili' in quíimil:

⁸náachcunt ti' teen ba'ax ma' jaaji' yéetel tuus, ma' a beetic in ayikaltal, mix in wóotziltal: dzáa ti' teen chéen le waaj kabéet ti' teno',

⁹tumen wa ya'ab u yalabe' je'el in p'atic in wocsaj óoltiqueche' wa cu binetique', ma' xan ca oocolnaquen, beyo' quin pajic u subtal a quili'ich kaaba'.

¹⁰Tu táan dzuule' ma' a t'aan kaas tu yo'olal u palitzil, tumen je'el u páajtal u loolob t'antiqueche', ca mukyajtic túun u yajil.

¹¹Yaan máaxo'ob cu loolob t'antico'ob u taataob ma' xan tu qui'iqui' t'antico'ob u maama'ob.

¹²Yaan máaxo'ob cu tucultico'obe' jach utz yanilo'ob, le beetique' ma' tu yutzquinticuba'ob ti' u ma' ma'alob yanilo'obi'.

¹³Yaan máaxo'ob jach nonoj ba'al u tuculticuba'ob, le beetic cu pactico'ob u yéet máaquilo'ob yéetel x ca'anal ichil.

¹⁴Yaan máaxo'obe' ma' coj yaan ti'obi' máascab ma' cha'an coj yaan ti'obi' lóomte', u ti'al u xu'ulsico'ob tuláacal u yóotzililo'ob caaj.

¹⁵Máaxo'ob cu chu'uchico'ob ki'ik chéen yaan ca'a p'éel ba'al u yojelo'ob u káato'ob: dzáaten, dzáaten. yaan óox p'éel ba'alo'ob, cu chuquic tac can p'éel, ma'atech u náacal u yóolo'ob:

¹⁶mucnal, x ma' paal co'olel, tiquin lu'um yéetel káak ma'atech u tu'upul.

¹⁷Máax cu yilic u taata yéetel kex óol cu p'a'astic xan x ch'ija'an maamae', cu najmaltic u jóokesa'al u yich tumen le box ch'íicho'obo' yéetel ca lu'ukuc tumen j cóot.

¹⁸Yaan óox p'éel ba'al, cu chuquic tac can p'éel, jach cu p'ilico'ob in wich ma' xan tin na'atic:

¹⁹u beel[6] le j cóot te j ca'ano', u beel caan yóokol le tuunicho'obo', u beel jun p'éel chéen yóokol tamcach ka'anab yéetel u beel le j xiib ti' co'olel.

²⁰Co'olel cu tusic u yíichame' cu beetic beya': cu dzo'ocol u janale' cu cho'ic u chi' cu babal a'alic ma' u beet mix ba'al kaasi'.

²¹Yaan óox p'éel bix u kuuxtal wíinico'ob, yaan wal tac can p'éele', le ma' tu páajtal u cajtal mix máac yéetelo'ob, cu beetico'ob tac u quiquilaanquil caaj:

²²le j palitzil cu kuchul u beet u ajawil, le wíinic mix ba'al u biilal cu yantal ya'ab ba'al u jaante,

²³le co'olel ch'a'a p'eca'an cu yantal máax dzo'ocol u beel x yéetel le x palitzil xan cu suut xuunáanil.

²⁴Yaan can túul mejen aalak yóokol lu'um asab yaan u yojéelajo'ob ti' le aj ojéelajo'ob:

²⁵le síinico'obo', jun p'éel u nojoch múuch'ul mina'an u muuko'ob cu much'quintic u janalo'ob u ti'al yáax kiin;

²⁶le j chi'ico'obo', ma' jach ya'abo'ob caja'ano'ob yáanal tuunicho'ob;

²⁷le sáako'ob quex mina'an u ajawilo'ob toj u xíimbalo'ob tu tzoolol;

²⁸le mejen x merecho'ob, cu páajtal u la'ap'alo'ob, cu yocolo'ob tac tu jalach naj ajaw.

²⁹Yaan óox túul jach xiixib ba'alo'ob, yaan wal tac u can túulo'obe' u xíimbalo'obe' jach utzil tojil:

³⁰león, ba'alche' asab jakbe'entzil, ma' tu yáalcab ti' mix ba'al mix tu táan mix máac;

³¹j ca'anal ich j t'eel, le xiibil j yuuc yéetel le ajaw cu tzóol xíimbal tu táanil ti' u aj ba'atelo'ob.

³²Wa ma' j na'atil a nonoj ba'altale', dzo'oc xan a loolob tucultic a beetic ba'alo'obe', dzáabáa a tuculte.

³³wa ca bokic lechee' cu yantal mantequilla a jaante, wa ca beetic u juum ka'am a ni'e' cu jóokol ki'iki', wa ca beetic u p'u'ujul u láak máaque', ma' tu jechic yaan a ba'atele'ex.