Read Yucateco Proverbios 31 Bible Online

Proverbios 31 - Yucateco bible

Proverbios 31

¹U cóomcom ca'anbesajo'ob ajaw Lemuel j Masail, je'el bix úuchic u ca'anbesa'al tumen u maamae':

²In xibil paal, u xéet'el in cuxtal, u núuquech Ku ti' in káat óolalo'ob, ¿ba'ax u láak ba'al je'el u páajtal in wa'alic ti' teche'?

³Ma' a xupic a muuk tu yéetel co'olelo'ob, tumen leti'ob beetic u kéechel u cuxtal ajawo'ob.

⁴Lemuel, ma' utz u dzáicuba'ob u yuko'ob vino le ajawo'obo', mix ca sen cáalaco'ob le j méektáano'obo',

⁵tumen je'el u tu'ubsico'ob le a'almaj t'ano', je'el xan u manba'alcuuntico'ob u beetico'ob ba'ax no'oja'an tu yo'olal óotzilo'obe'.

⁶P'at le vino yéetel le ukulo'ob cu cáalcunajo', u ti'al le máaxo'ob luba'an u yóolo'ob u ti'al xan le dzaanal u yóolo'obo';

⁷¡ukulnaco'ob, ma' u suut ka'ajso'ob u yóotzililo'ob mix u mukyajo'ob!

⁸Ka'am t'aanen tu yo'olal le máaxo'ob ma' tu yu'uba'al u t'aano'obo'; ¡toc le máaxo'ob mina'an u muuko'ob u toquicuba'obo'!

⁹Ka'am t'aanen, beet ba'ax tu beel ti'ob; ¡toc le óotzilo'ob bey xan le caabal u yóolo'obo'!

¹⁰Co'olel cu ca'anbesaj u cuxtale', ma' chéen ch'a'abil u caxta'ali'; ¡asab co'oj u tojol ti' jadzutz tuunicho'ob!

¹¹U yíichame', cu jach ocsic u yóol ti', ma'atech u bineltic ti' u tojol u náajal.

¹²Cu dzáic ti' yíicham nucuch utzil óolalo'ob tuláacal u kiinilo'ob u cuxtal.

¹³Cu caxantic u tzo'otzel j taman bey xan lino, cu meyajtic tu kabil yéetel qui'imac óolal.

¹⁴Je'el bix u cheem j coonolo'obe', leti'e' cu náachtal u ti'al u man ba'ax kabéet ti'.

¹⁵Ma' qui' sáasaque' cu líikil u ti'al u dzáa ba'al u jaant u paalal yéetel u x palitzilo'ob.

¹⁶Cu dzo'ocol u máan u ma'alob yila'a' jun tzúuc cáacabe', cu manic, yéetel u tojol u náajale' cu beetic u x péet paachil u pakal uva.

¹⁷Cu ca'a mu'uka'ancunticubáa, cu dzo'ocol u ch'a'ic yóole' cu dzicubáa j meyaj.

¹⁸Cu canantic u bin utzil ti' u meyaj, cu chúunul u meyaj ma' sáasaqui' cu p'atic tu yoocbal kiin.

¹⁹Tu kabil cu sacaltic bey xan u jit'ic.

²⁰Ma' tu ch'éenel u yáantic óotzilo'ob bey le máaxo'ob mina'an ba'alo'ob kabéet ti'ob.

²¹Ma' tu péec u yóol tu yo'olal u yotochnáalo'ob tu kiinilo'ob que'el, tumen u láaktzilo'obe' yéetel piimpim noko'ob cu máano'ob.

²²Leti'e' tu kabil cu jit'ic piimpim teep'o'ob, Cu búucbesicubáa tu yéetel u asab jadzutzil nooko'ob.

²³U yíichame', sen kaj óola'an ich le caajo', ti' cu yila'al yéetel u tzicbe'en nuuquilo'ob caaje'.

²⁴Cu beetic búuco'ob bey xan kax nako'ob, cu conic ti' j maan coonolo'ob.

²⁵Cu ch'a'ic ya'abcach muuk leti' beetic u tzi'iquil, ma' tu péec u yóol ti' ba'ax cu taal u kiinil.

²⁶Le quéen t'aanaque' cu t'aan yéetel ojéelaj, cu ca'anbesaj yéetel yaacunaj.

²⁷Cu p'il ichtic bix u bin u meeyjulo'ob u yotoch, Mix jun téen u jaantmaj waaj ma' u náajalmaji'.

²⁸Cu yutzil t'anta'al tumen u paalal yéetel tumen u yíicham beya':

²⁹Sen ya'abcach utzul co'olelo'ob yaan, ba'ale', mix jun túul ti'ob quetic a wutzili'.

³⁰Mix ba'al u biilal u lúubul utzil jun túul co'olel, chéen cunel u qui'ichpamil, ba'ale' co'olel cu tziquic Yuumtzile', leti'e', bíin úuchuc t'aan utz tu yo'olal.

³¹¡Utzul t'anta'ac tumen tuláacal caaj! ¡Chíinpolte'ex tu yo'olal tuláacal ba'ax cu beetic.