Read Yucateco Proverbios 4 Bible Online

Proverbios 4 - Yucateco bible

Proverbios 4

¹Paale'ex, u'uye'ex u tzol xiquino'ob a taataex; dzáa óolte'ex u ti'al u yantal ti' te'ex utzil tuucul.

²Tene' dzo'oc in wa'alic ti' te'ex nu'uca'an ba'alo'ob, le t o'olale' ma' tu'ubsique'ex in ca'anbesajo'ob.

³Tumen tene' in beetmaj xan in paalil: in maamae' tu yaabiltajen yéetel u muunil u yóol

⁴in taata xane' tu ya'alaj ti' teen bix u najmal in cuxtal: T'ilcunt ta tuucul in t'aano'ob; beet le ba'ax quin wa'alic ti' techo', u ti'al ca cuxlaquech

⁵Yanac ti' teech ojéelajil yéetel ma'alob tuuculil; ma' a cha'ic u tu'ubul ti' teech in t'aano'ob.

⁶Yaabilt le ojéelajilo' ma' a xúump'attic leti'e' bíin u canantech.

⁷Táanil ti' u láak ba'ale', yanac teech ojéelajil yéetel ma'alob tuucul.

⁸Yaabilte, leti' bíin u nojochquintech; méeke, leti' bíin u dzáa ti' teech tziiquilil,

⁹¡bíin u dzáa ti' teech jit'bil nicte' bey sen jadzutz siibale' yéetel leti'e' bíin u dzáa a péet jo'olte!

¹⁰In j xibil paal táan óolt in t'aano'obi', ch'a'a' ba'al a ti'alte leti' bíin u ya'abcunt u ja'abilo'ob a cuxtal

¹¹Tene' bíin in bisech tu bejil le ojéelajilo': bíin in beet a máan ti' u ma'alobil bej,

¹²tu'ux ma' bíin yanac mix ba'al kalic a beel, tu'ux ma' bíin t'óochpajalnaquech quex ca áalcabnaquech.

¹³Ch'icabáa j canbal ma' cha'ic u náayal a wóol; dzo'ocbesej, tumen le ti'e' cuxtal a ti'al.

¹⁴Ma' a xíimbal tu paach le j loolob máaco'obo', ma' a loolob cuxtal je'el bix u cuxtalo'obo'.

¹⁵Wet' a Xíimbal tu beelo'ob; jun páaycuntabáa ti'ob, teche' xeen táanil,

¹⁶tumen leti'obe' ma' utz u yóolo'ob wa ma' u beeto'ob loobi'; cu bin u wenelo'ob, wa ma' beetico'ob lúubul wa máaxi'.

¹⁷¡U janalo'ob yéetel u yukulo'obe' u beetico'ob óolaj, yéetel u beetico'ob loob!

¹⁸U beel le aj ti'ibil bejo'obo' bey u sáasilil jun p'éel túumben kiine'; cu bin u jóokol jujun p'íitil tac quéen jóom sáasilchajac yéetel tuláacal u muuk.

¹⁹Ba'ale' u beel le j loolob máaco'obo' éekjoch'e'en; ¡mix u yojelo'ob yéetel ba'ax cu t'óochpajlo'obi'!

²⁰In j xibil paal táan óolt in t'aano'ob; ch'en xiquinto'ob ma'alob.

²¹Ma' u sa'atalo'ob ta wich mix bikin, ¡T'ilcunt ta tuucul!

²²Leti'ob dzáic cuxtal yéetel toj óolal ti' tuláacal le máaxo'ob cu nuptáantico'obo'.

²³Utzi canant a tuucul yéetel chuca'an óolal, tumen leti' u sayabil a cuxtal.

²⁴Ma' a wa'alic ba'alo'ob ma' jaajtaqui'; tzelabáa ti' le tuuso'.

²⁵Mantadz paacatnen táanil, mantadz paacatnen acta'an.

²⁶Ila'a' ma'alob tu'ux ca jedzic a wooc, pe'echaknen ti' lu'um ma' jajacqui.

²⁷Ma' a kéechel ti' a ma'alob beel; wet' a máan ti' kaakas bejo'ob.