Read Yucateco Proverbios 5 Bible Online

Proverbios 5 - Yucateco bible

Proverbios 5

¹In j xibil paal táan óolt ba'ax in wojel; dzáa a wóol a wu'uyic in na'at.

²Beyo' bíin a wojéelt a canant a cuxtal bíin páatac xan a t'aan yéetel kaj óolajil.

³Tumen le co'olel jela'an u cuxtalo' ch'ujuc u t'aan u t'aane' cu yáalal bey aceite;[1]

⁴ba'ale' cu dzo'ocol asab káaj ti' si'isim cu xoot asab taam ti' jun p'éel máascab ca'a mat u yej.

⁵U yúuchul xíimbal tu yéetele' cu bisic wíinic ti' quíimil; u pe'echake' jun taadz u bin te j mucnalo'.

⁶Ti' leti'e' mix ba'al u káat ti' u bejil le cuxtalo', mix tu yilic wa mina'an nu'uc u xíimbal.

⁷Le t o'olale' in j xibil paal u'uyeni', ma' kéechel ti' in ca'anbesajo'ob.

⁸Naachcuntabáa ti' le co'olel jela'an u cuxtalo'; mix a nadzicabáa tu jool najil u yotoch,

⁹u ti'al ma' a satic u ma'alobil a ja'abilo'ob tu kab loolob wíinico'ob jela'an u cuxtalo'ob

¹⁰u ti'al mix jun túul máac jela'an u cuxtale' ca na'ajchajac yéetel u muuk a meyaj.

¹¹Wa ma' ta beetic beyo' bíin a wokolte le quéen a wu'uy u xu'upul jujun p'íitile'.

¹²Bíin a wa'ale': ¡Bix úuchic in p'ectic le canbalo'! ¡Bix úuchic in wa'alic ma'il ti' u ya'ala'al ti' teen u nu'ucul!

¹³¡Ma' tin wóoltaj in wu'uy in aj ca'anbesajo'obi', ma' tin dzáa óoltaj le máaxo'ob ca'anbesiqueno'ob ca'acho',

¹⁴jach jun p'íit tu binetaj in kuchul tu talamil le numyajo' tu táan tuláacal le caajo'!

¹⁵Lukes a wukajil yéetel le ja' cu jóokol tu sayabil le a ch'e'eno'.

¹⁶Ma' a wequic u ja'il a sayabil; ma' u bin a wequic chéen cunel te j bejo'.

¹⁷Ch'e'en yéetel u ja'ile' ma' u ti'al yaanal máaqui', chéen a ti'alo'ob, ¡ma' a dzáic ti' yaanal wíinico'ob!

¹⁸¡Qui' t'anta'ac a sayabil! ¡Qui'imacchajac a wo'ol yéetel u co'olelil a táanquelmil,

¹⁹leti'e' x lo'obayan quéej muun u yaacunaj! ¡Mix bikin ca u binet ti' teech u qui' óoltajil! ¡Mantadz ca u méekech yéetel u yaacunaj!

²⁰¿In j xibil paal ba'ax o'olal bíin a kaxcabáa yéetel le co'olel jela'an u cuxtalo'? ¿Ba'axten bíin a pulabáa u ti'al u méekech jun túul co'olel ma' a kaj óoli'?

²¹Yuumtzile' cu yilic bix u cuxtal wíinic; ma' tu sa'atal tu yich mix jun p'éel u xáakabo'ob.

²²Le j loolob máaco' cu léechta'al tumen u loobilo'ob; u keban kaxic bey jun p'éel léeche'.

²³U x ma' u'uyaj t'aane' leti' bíin bisic ti' quíimil; u x ma' na'atile' leti' beetic u sa'atal.