Read Yucateco Proverbios 6 Bible Online

Proverbios 6 - Yucateco bible

Proverbios 6

¹In j xibil paal wa ca éejemtic a cuchic u p'aax a wéet bisajbáe' wa ca cuchic u p'aax jun túul j táanxel lu'umile',

²chéen ta juunal ca lechic suum ta caal; ta juunal ca kaxicabáa yéetel a t'aan.

³U ti'al a wach'icabáe' in j xibil paal, tu yo'olal ti' yanech tu kab yaanal máaque', beet le ba'ax quin in wa'al ti' techa': lukes a j ca'anal ichil, tzáa u p'aax wéet bisajbáil.

⁴Ma' a wenel, ma' a je'elsicabáa mix jun súutuc;

⁵xeen, áalcabnen bey jun túul quéeje' cu yáalcab ti' j dzoone' xeen tu séeblaquil bey u púudzul jun túul ch'íich' táan u chu'ucule'.

⁶Ma'akol, pact le síinico'; il a wil ba'ax cu beetic u ti'al ca caanbanaquech:

⁷Quex tumen mina'an máax tusic u beelo'obe' mix máac a'alic ti' ba'ax bíin u beete,

⁸cu caxtic u janal tu kiinilo'ob yáax kiin cu ta'acbesic tu kiinilo'ob jooch.

⁹¡Ma'akol, ma' Wa tu náacal a wóol j wenel! ¡Dzo'oc u p'iistal a ma'akolil!

¹⁰Ca'aliquil táan wayak yéetel táan a chíin pool, yéetel ca méekic a kab u ti'al a wenel ma'alobe',

¹¹le óotzililo' bíin talac u beet loob ti' teech bey jun túul j ma' beel taac u ba'atele'.

¹²Le máax kasa'an yéetel loobe' mantadz cu máan u tzicbalt tuuso'ob;

¹³cu chakic u yich, cu béech' kab, cu béech' jo'ol;

¹⁴loob u tuucul, mantadz cu tucultic u beetic ba'al kaas cu máan u chu'unbes ba'atelo'ob.

¹⁵Le t o'olale' jun súutuc bíin talac loobo'ob ti'; tu séeblaquil bíin p'áatac nakan óotzilil jun puli'.

¹⁶Yaan seis, je'el u chuquic tac sietee' ba'alo'ob, u jach u p'ectmaj Yuumtzil:

¹⁷Le j ca'anal icho'obo', le chi'ob cu tuuso'obo', le kabo'ob cu quíimsico'ob le j ma' si'ipil máaco'obo',

¹⁸le tuuculo'ob cu patico'ob ba'alo'ob kaastaco'ob, le ooco'ob cu yáalcabo'ob u ti'al u beeto'ob loob.

¹⁹Le j tuutus aj jaajcunajo' yéetel le máax cu yocsic tac t'aan ichil sucu'untzilo'ob.

²⁰In j xibil paal dzáa mantadz ta tuucul u ya'almaj t'aano'ob, yéetel u ca'anbesaj a taata yéetel u ca'anbesaj a maama.

²¹Bis mantadz ta pucsi'ikal, kaxla'ant ta caal,

²²bíin u ye'es ti' teech a beel le quéen xi'iquech xíimbal, bíin u canantech le quéen wenequech, bíin t'aanaco'ob ta wéetel le quéen ajaquech.

²³Tu jaajile', le a'almaj t'aano'ob yéetel le ca'ansajo'obo' beyo'ob x ch'uyub sáas t'aba'ano'obe'; le ca'asanjo'ob yéetel le tzol xiquino'ob u bejilo'ob cuxtal.

²⁴Bíin u yáantech ti' le x loolob co'olel yéetel ti' u ch'ujuc t'aano'ob le co'olel jela'an ti' techo'.

²⁵Ma' u táabsquech u qui'ichpamil; ¡ma' a cha'ic u léechtiquech u paacat!

²⁶Le x cáacbacho' chéen u bo'ota'al cu caxtic, Ba'ale' le x pak kebano' cu bin tu paach le xiib káato'.

²⁷Le máax cu táabal u méek ka'ake', tu jaajile' yaan u yelel u nook.

²⁸Le máax cu xíimbal tu yóokol chúuc t'aba'ane', cu chu'ujul u yooc.

²⁹Bey le máax cu nupicubáa yéetel u yatan yéet xiibile' ma' bíin p'áatac x ma' jaadzil.

³⁰Mix máac ilic kaasil le máax cu yoocol u ti'al u máansic u wi'ijil;

³¹quex wa ca chu'ucuc táan u yocole', yaan u sutic siete u téenel le ba'ax u yocoltmajo', yéetel yaan u dzáic tuláacal le ba'ax yaan ti'o'.

³²¡J ma' na'at le máax cu máan yéetel u yatan u láak j xiib! ¡Le máax beetic beyo' tu juunal cu quiimsicubáa!

³³Yaan u nuptáantic jaadzo'ob yéetel pooch'ilo'ob, yéetel ma' táan u yantal mix ba'al cu páajtal u balic sublaquil.

³⁴Tumen le j xiib u p'eec u ke'exele' bey jun p'éel káake', yaan u caxtic u kiinil u sutic le kaaso',

³⁵ma' tu kamic u bo'olal le ba'ax beeta'ab ti'o', mix cu máan u yaj óolal yéetel ya'ab siibalo'ob.