Read Yucateco Proverbios 7 Bible Online

Proverbios 7 - Yucateco bible

Proverbios 7

¹In j xibil paal dzo'ocbes in t'aano'ob; t'ilcunt ta tuucul in wa'almaj t'aano'ob.

²Dzo'ocbes in wa'almaj t'aano'ob yéetel in ca'anbesajo'ob; cananto'ob bey u neeko'ob a wiche', u ti'al ca cuxlaque'ex.

³Kaxo'ob tu yaal a kab, t'ilcunto'ob ta tuucul

⁴Quictzilt le ojéelalilo', bisajbáa yéetel le na'atilo'.

⁵Leti'ob bíin u toquecho'ob ti' le x pak keban co'olelo', ti' le co'olel ma' kaj óolo', le cu táabsaj yéetel muumun t'aano'obo'.

⁶Jun p'éel kiine' táan ca'ach in paacat tu yáam u calom kiinil in wootoche'

⁷ca tin wilaj míin jay túul táanquelemo'ob j ma' na'ato'ob, ca tin pactaj jun túul ti'ob asab mina'an u na'ate'.

⁸Le ca j kuch tu ti'itz le pako' tu ch'actaj le bejo' ca j bin tu tojil u yotoch le co'olelo'.

⁹Táan ca'ach u t'uubul kiin, táan ca'ach u chúunul u yéekjoche'ental.

¹⁰Tu séeblaquile' le co'olelo' jóok u nuptáantej, mina'an u jela'anil ti' jun túul x cáacbach.

¹¹ti' jun túul co'olel ma' tu máacal u chi', séeb xan u ya'alic ba'al, chéen máan cu beetic

¹²cu máanel ti' bejo'ob, ti' kíiwico'ob, cu wa'atal tu ti'itz bejo'ob yéetel ti' kíiwico'ob, táan u pa'atic u léechtic le yáax bíin máanaque'.

¹³Le co'olelo' tu méekaje' ca tu dzu'udzaj le j táanquelemo', ca tu ya'alaj ti' x ma' subtalil:

¹⁴Tene' tin séeb chi'itaj u quíimsbil ba'alche'ilo'ob ca'a bisajbáil, bejela'e' dzo'oc in beetic ba'ax tin séeb chi'itaj.

¹⁵Le t o'olale' dzo'oc in jóokol in ch'a'a a beel; ¡taac ca'ach in wiliquech, dzo'oc in nuuptáantiquech!

¹⁶Tu yóokol u táasche'il in wenele' dzo'oc in jayic jun p'éel qui'ichquelem teep' ejipcioil, lino u ca'aj,

¹⁷dzo'oc in qui'iboccuntic yéetel u qui'iboquil mirra, áloe yéetel canela.

¹⁸Co'oten, co'ox satic c óol yéetel yaacunaj co'ox qui'imacuntic óol yéetel yaacunaj tac quéen sáaschajac,

¹⁹tumen in wíichame' mina'an tin wotoch; joka'an, j bin sen náach;

²⁰tu bisaj jun p'éel sáabucan chup yéetel taakin, ma' bíin suunac tac tu kiinil túulis uj.

²¹U sen ch'ujuc t'aano'obe' j kuch u t'onquint u yóol le j xi'ipalo',

²²ma' j kabéetchaj u láak ba'ali' leti'e' j bin tu paach; bey u bin jun túul wacax cu bisa'al j quíimsa'ale', bey jun túul quéej cu lúubul ti' léech

²³u dzooque' jun p'éel x julub táadz máansic u pucsi'ikal; bey jun túul ch'iich' cu pulicubáa ichil jun p'éel léech ma' u yojel wa leti' bíin u tojolt u cuxtal.

²⁴Bey túuno' in j xibil paal u'uyeni'; dzáa a wóol ti' ba'ax quin wa'alic.

²⁵Ma' u bíin a dzáa a tuucul ti' le co'olelo' mix u sa'atal a wóol tu yo'olal a bin tu paach,

²⁶tumen ya'abcach máaco'ob beeta'ab loob ti'ob tumen; ¡seten ya'ab máaco'ob j quíimo'ob tu yo'olal!

²⁷U xíimbalta'al u beel u yotoche' bey u yúuchul bin tu bejil quíimile'.