Read Yucateco Eclesiastés 10 Bible Online

Eclesiastés 10 - Yucateco bible

Eclesiastés 10

¹Jun túul x ya'axcach quimene' tu', yéetel cu tu'uquintic ba'ax qui'iboc. jun p'éel báaxal t'aane' cu dzaa óolta'al, asab ti' tzicbe'en ojéelaj.

²U tuucul aj ojéelaje' cu ch'íiquil u beet utz, ba'ale' u tuucul j ma' ojéelaje' cu ch'íiquil u beet loob.

³Ti' tuláacal ba'ax cu beetic le ma' ojéelaje', cu ye'esic u yóotzilil ba'ax cu tucultic, quex ca máanac u ya'al yaanal máax le j ma' ojéelajo'obo', u yéet xiibo'ob.

⁴Wa le máax cu méektáan, cu kuuxil ta wéetele', ma' u satic a wóol; dzaac u ti'al nucuch keechel cuxtale' ma' dzicabáa a jáajan utzquinte.

⁵Dzo'oc in wilic jun p'éel ba'al keechel cu beeta'al way yóokolcaabe', cu chu'unpajal yéetel le méektáano'obo':

⁶ti' le j ma' ojéelaje' cu dza'abal jun p'éel talam meyaj, ba'ale' ti' máax u yojel meyaje' cu dza'abal ti' chéen mejen meyajo'ob.

⁷In wilmaj palitzilo'ob cu máano'ob u nat'majo'ob tzíimin, u paalal ajawo'obe' cu máano'ob xíimbal ooquil beyo'ob palitzilo'obe'.

⁸Máax cu páanic jun p'éel joole', cu lúubul ichil. Máax pa'ic pake', cu chi'ibil tumen caan.

⁹Máax cu t'óojic tuuniche' cu yaatal u kab yéetel. Máax cu bujic si'e', wa cu náayal u yóole' cu ch'aquicubáa.

¹⁰Báat cu bóolol u yeje' wa ma' tu ca'a jóokesa'al u yeje', yaan u yúuchul yéetel ya'ab muuk'. Asab ma'alob u beeta'al ba'alo'ob tu beel, yéetel ojéelaj xan.

¹¹¿Ba'ax u biilal jun túul suujquinaj caan, wa cu chi'ibal le caan ma'ili' u suujquinta'ale'?

¹²U t'aan aj ojéelaje' cu beetic u lúubul utzil, ba'ale' u t'aan ma' ojéelaje' u bin kaasil ti':

¹³Cu chúunul u ya'alic chéen choco pool ba'alo'ob, cu dzo'ocol yéetel satal óol táano'ob.

¹⁴¡Ti' j ma' ojéelaje' ma' tu xu'upul u t'aan! ¿Máax cu páajtal u ya'alic ba'ax bíin úuchuque', wa mix máac u yojel ba'ax cu taal u kiin?

¹⁵Tu yo'olal u sen meyaj le j ma' ojéelaje', cu tu'ubul tac u beel u yotoch ti'.

¹⁶¡Óotzil le caaj cu ajawta'al tumen jun túul paal, tu'ux xan cu sáastal ti' u paalal ajaw ti' nonoj janalo'ob!

¹⁷¡qui' yóol le caaj yaan jun túul tzicbe'en ajaw ti', yéetel u méek t'aano'obe', ma' tu chúunkintal u janalo'ob, u ti'al u ca'a antal u muuko'ob, ma' u ti'al u cáaltalo'obi'!

¹⁸Ti' máakole' cu lúubul u yóok najil u yotoch: máax ma' tu beetic mix ba'ale', cu lúubul tuláacal u yotoch.

¹⁹Waaje' u ti'al qui' jaantbil, vinoe' u ti'al u ch'ujucquinta'al cuxtal; ba'ale' u ti'al lelo' kabéet taakin.

²⁰Ma' a wa'alic ba'al ti' ajaw, mix yéetel a tuucul. Ma' t'aan kaas tu yo'olal ayikal quex chéen ta juunal yanech, tumen ch'i'icho'ob cu xiknalo'obe' je'el u bino'ob u tzicbato'obe'.