Read Yucateco Eclesiastés 11 Bible Online

Eclesiastés 11 - Yucateco bible

Eclesiastés 11

¹Pul a wo'och waaj ich ja'; cu máanbal dze'edzec kiine' bíin a ca'a nactáante'.

²Je'el buca'aj cu páajtale' t'ox ba'ax yáantech, tumen ma' a wojel ba'ax loob bíin taal yóokol le caajo'obo'.

³Wa chuup yéetel ja' le múuyalo'obo', yaan u káaxal cháac yóok lu'um. Ca lúubuc che' j xaman, wa ca lúubuc che' j noojol, je'el tu'ux ca lúubuque' ti' bíin p'áataqui.

⁴Máax táan óoltic bix u yustaj iike' ma' bíin pakalnaqui', máax xan pactic múuyale' ma' bíin joochnaqui'.

⁵Je'el bix ma' a wojel tu'ux bíin xi'ic iike', mix bix u wíinictal chaan pal ichil u jobnel u maamae', mix ba'al a wojel ba'ax cu beetic Ku, máax beet tuláacal ba'al.

⁶Pak a wi'inaj tu ja'atzcabil, pak xan tu yocnaj kiin, tumen mix bikin bíin ojéelta'ac máacalmáac bíin ma'alob jóokoqui', wa le ta yáax pakajo', wa le ta pachal pakajo', wa tu ca'a p'éelal bíin ma'alobchajac.

⁷Sáasile' jun p'éel ba'al utz, ma'alob xan u sáasilil kiin u ti'al icho'ob;

⁸ba'ale' quex ca cuxlac wíinic ya'abcach ja'abo'obe' yéetel ca xi'ic utzil tu cuxtal yéetel tuláacale', ma' u najmal u tu'ubul ti'e' u kiinilo'ob éekjoche'enile' ya'abo'ob, tuláacal ba'ax bíin taalaque' chéen waya'as.

⁹J táanquelem, náis a wóol ca'aliquil t'a'ajech; dzáa utz ta cuxtal ca'aliquil ca páajtal. Cha'a u jíiltiquech u dzíibolal a pucsi'ikal yéetel tuláacal ba'ax ca wilic, ba'ale' ka'ajac ti' teche' tu yo'olal tuláacal lelo' Kue' bíin u káat ti' teech ba'ax ta beetaj.

¹⁰Náachcunt ti' teech tuuculo'ob cu bisico'ob a wenel, jóokes xan ti' teech yaj óolal, tumen tac u asab ma'alobil u kiinilo'ob táanquelemile' chéen waya'as.