Read Yucateco Eclesiastés 12 Bible Online

Eclesiastés 12 - Yucateco bible

Eclesiastés 12

¹Ca'aliquil táanquelmeche', ka'ajac ti' teech máax beetech, ma'ili' chúunuc kiino'ob talamo'obi'; bíin talac kiino'ob tu'ux bíin a wa'al: Ma' utz in wóol yéetelo'obi'.

²Ka'ajactech bejela'e', ma'ili' tu'upuc u sáasil kiin, mix u sáasilil luna, mix u sáasilil eeko'ob, ca'aliquil yaan xan múuyalo'ob cu dzo'ocol u máan cháac.

³Bíin kuchuc xan jun p'éel kiin quéen quiquilnac u aj canano'ob jalach naj, le quéen lóopoc le xiixib máaco'ob; le quéen p'áatac chéen wa jay túul x juuch'o'ob cu pa'atico'ob u juuch'o'obe'; le cu paacato'ob te j calom quéen jo'op'oc u sa'atal u sáasilil u yicho'ob.

⁴Le quéen kuchuc le kiino', tuláacal jool najo'ob yaan te j bejo' bíin ka'alaco'ob; u ca'il juuch'e' jujun p'íitil bíin ch'éenec u juum; ch'i'ich'o'obe' bíin jáawac xan u kaayo'ob, ba'ale' kaayo'obe' bíin samal u'uya'aco'ob;

⁵u sajbe'entzilil ca'anal witzo'ob, yéetel u sajbe'entzilil beje' bíin u dza'ob péec óolal. Le almendroe' bíin u chu'unbes u loolanquil, sáake' ma' tu bin ojéeltbil ba'ax bíin beeta'ac yéetel, alcaparrae' ma' bíin meyajnac u ti'al mix ba'ali'. Tumen wíinique' táan u bin tu yotoch mina'an u xuul, te j bejo' cu yu'uba'al le máax cu yokolo'ob tu yo'olal u quíimil.

⁶Ka'ajac ti' teech Máax beet ti' teech ma'ili' t'óococ u suumil plata mix pa'abac le cuum oro u ca'ajo'; bejela'e' ma' pa'abac xan le p'úul tu chi' le ch'e'eno' mix co'ocotza'ac u suumili'.

⁷Cu dzo'ocole' wíinique' bíin suunac j lu'um, je'el bix ca'ache', u pixane' bíin suunac ti' máax dzáe', Ku.

⁸Teen le j tze'eco', quin ca'a a'alic: ¡Chéen waya'as, chéen waya'as! chéen waya'as tuláacal.

⁹Je'el bix u ya'abtal u yojéelaj Aj tze'eque', bey binic u ya'abtal le kaj óolal tu ca'ansaj ti' le máaco'obo'. Tu dzajubáa xan u can ya'abcach cóomcom ca'anbesajo'ob, ca tu tzolaj je'el bix u ca'anbesajilo'obe'.

¹⁰Tu dzajubáa xan u caxant le t'aano'ob asab jadzutztaco'ob u ti'al ca u dzíibt je'el bix u najmal u ca'anbesa'alo'obe'.

¹¹U cóomcom ca'anbesaj aj ojéelajo'obe' beyo'ob u múuch'ul u ni' xúule'. Le quéen dzo'ococ u ch'i'iquilo'ob tu tzoolole' beyo'ob dzopche' ma'alob ch'ica'anil tumen jun túul j canan tamane'.

¹²Le cu canic wíinic ti'obe' nucuch tzol xiquino'ob. Mina'an u xuul u beeta'al ya'abcach dzíibil ju'uno'ob, u yúuchul sen xooque' cu xulic u yóol wíinic.

¹³Le tze'eco' dzo'oqui. Tuláacal dzo'oc u ya'ala'al. Tzic Ku, dzo'ocbes u ya'almaj t'aano'ob, tumen lelo' tuláacal u ti'al wíinic.

¹⁴Kue' bíin u káat chi'it ti' to'on ba'axo'ob t beetaj, utztac wa kaastac, quex ca c beet muculil.