Read Yucateco Eclesiastés 2 Bible Online

Eclesiastés 2 - Yucateco bible

Eclesiastés 2

¹Bey xan tin tucultaj: bejela'e' bin in ca'aj in náis in wóol; bíin in ca'aj in beet ba'ax in káati. ¡ba'ale' tac lelo' suunaj chéen waya'as!

²Ca tin wilaje' che'eje' chocopoolal, u qui' óolal bakel mix jun p'éel utz cu taasic.

³Yéetel in tuucul ti' yaan tu yáanal ojéelaje', tin wóoltaj in caxt muuk ti' ukul vino, u ti'al in wojéeltic wa leti' u asab utzil ca u beet wíinic tu dze'edzec kiinilo'ob u cuxtal way yóokolcaabe'.

⁴Tin beetaj nucuch ba'alo'ob; tin líiksaj jalach najo'ob; yanchaj in x péet pacho'ob u ti'a' u pa'akal uva.

⁵tin beetaj in cool, bey xan pakal nicte'ob, tin pakaj u jejeláas janalbe'en ich che'ob.

⁶tin beetaj u beelo'ob ja' u ti'al in jóoyabtic in pakalo'ob;

⁷Tin manaj j palitzilo'ob yéetel x palitzilo'ob, yaan xan síijo'ob tin wotoch; yanji' teen ya'ab x wacaxo'ob yéetel j tamano'ob asab ti' tuláacal le j cajlajo'ob Jerusalén táanil ti' téen.

⁸Tin niccuntaj oro yéetel plata, u ayikalilo'ob ca'ach u láak ajawo'ob yéetel u tzúuc caajilo'ob. Yanji xan ti' teen j kaayo'ob yéetel x kaayo'ob, tin beetaj tuláacal ba'ax qui' ti' u bakel wíinic yéetel jejeláas x keecho'ob.

⁹Tin beetajimbáa nojoch ba'al, j kuch u kiinil u yantal ti' teen ya'ab ba'al asab ti' tuláacal le j cajlajo'ob táanil ti' teen tu caajil Jerusaleno'. Quin nupic ti' lelo', le ojéelaj ma' tu p'atajeno'.

¹⁰Ma' tin su'ukintaj mix jun p'éel dzíibolaji'; mix xan tin su'ukintaj mix jun p'éel náaysaj óolali'. Tuláacal in meyajo'ob tu beetajo'ob utz ti' teen, leti' le utzo' in bo'olal.

¹¹Cu dzo'ocole' tin dzajinbáa in tucult buca'aj ba'alo'ob tin beetaj yéetel buca'aj muuk tin xupaj, ca tin wilaj tuláacale' chéen waya'as, bey a wóoltic lap' iike', tumen mix ba'al utz u taal ti' wíinic way yóokolcaaba'.

¹²Cu dzo'ocole' tin máansaj in tuucul tu yo'olal le ojéelajo', jach j ma' na'atil yéetel le neetzilo': ¿Ba'ax bíin u beet le ajaw cu taal tin paacho', wa ma' le ba'ax dzo'oc u beeta'alo'?

¹³Ca tin wilaj asab utz le ojéelajo', ma' bey le ma' ojéelajilo', je'el bix ma'alobil le sáasil ti' le éekjoche'enilo'.

¹⁴Aj ojéelaje' cu meyaj ma'alob u yich ti', ba'ale' le j ma' ojéelajo' cu máan ich éekjoch'e'enil, ca tin wilaj tuláacalo'ob jun p'éelili' ba'ax cu pa'atico'ob,

¹⁵ca tin wa'alaj: Ba'ax u úuchuc ti' le j ma' ojéelajo' le xan bíin úuchuc ti' teen, bey túuno', mix ba'al u biilal ti' teen ya'ab ojéelaj ¡Tac lelo' chéen waya'as!

¹⁶Tumen ti' mix máac bíin ka'ajac aj ojéelaj mix j ma' ojéelaj; je'el bix u máan kiine' bey u tu'ubsa'al tuláacal ba'al, aj ojéelajo'ob yéetel j ma' ojéelajo'obe' cu láaj quíimilo'ob.

¹⁷Kuch in p'ectic le cuxtalo', tumen tuláacal ba'al cu beeta'al way yóokol caabe' kaas u taal ti' teen, tuláacal chéen waya'as, ¡bey a wóoltic a lap'ic iike'!

¹⁸Kuch in p'ectaj tuláacal le meyaj tin beetaj way yóokolcaaba', tumen tuláacal yaan in p'atic ti' máax cu bin u jeelinten,

¹⁹Ba'ax jach jaaje': aj ojéelaj wa j ma' ojéelaje' yaan u cha'ic tuláacal ba'ax tin náajaltaj yéetel in kíilcab te j lu'uma'. ¡Bey xan lelo' chéen waya'as!

²⁰Le ca tin wilaj ba'ax dzo'oc in beetic way yóokolcaabe', ca tin yaj óoltaj úuchic in sen meyaj.

²¹Tumen yaan máax cu dzáic na'at, kaj óolal yéetel ba'ax u yojel tu meyaj, chéen u ti'al u láaj p'atic ti' máax ma' tu meyajtaji'. ¡Le xana' Chéen waya'as yéetel jun p'éel nojoch loolob tumen ma' u najmali'!

²²Tu jaajile', ¿ba'ax cu náajaltic wíinic iquil u sen meyaj yéetel u sen ch'iquicubáa tuucul way yóokolcaabe'?

²³Tuláacal u cuxtale' mukyajo'ob, jun p'éel yaayaj cuuch; mix yéetel áakab cu je'elel u tuucul. ¡Le xana' chéen waya'as!

²⁴Ba'ax u najmal u beetic wíinique' janal, ukul, ca xan u qui'imaccuns u yóol yéetel u tojol u náajal, tumen dzo'oc in wilique' le xana' ti' Ku u taal.

²⁵Tumen, ¿máax cu páajtal u janal wa u qui'imacchajal yóol, wa ma' tu yo'olal Ku?

²⁶Tu jaajile' Kue' cu dzáic ojéelaj, kaj óolal yéetel qui'imac óolal ti' le máax utz u lúubul tu táan. Ba'ale' le máax cu kebanchajale' cu beetic u sen meyaj u ti'al much'quintic ayikalilo'ob, u ti'al u dzáa ti' le máax cu lúubul utzil ti'. ¡Lela' xana' chéen waya'as bey u yóoltic wíinic u lap' iike'!