Read Yucateco Eclesiastés 3 Bible Online

Eclesiastés 3 - Yucateco bible

Eclesiastés 3

¹Way yóokolcaabe' yaan jun súutuc u ti'al u yúuchul tuláacal ba'ax:

²Yaan jun súutuc u ti'al síijil, yaan jun súutuc u ti'al quíimil. Yaan jun súutuc u ti'al pakal, yaan jun súutuc u jo'ocol ba'ax paka'an.

³Yaan jun súutuc u ti'al quíimsaj, yaan jun súutuc u ti'al dzaac. Yaan jun súutuc u ti'al kascunaj yaan jun súutuc u ti'al utzquinaj.

⁴Yaan jun súutuc u ti'al okol, yaan jun súutuc u ti'al che'ej. Yaan jun súutuc u ti'al okom óolal yaan jun súutuc u ti'al qui'imac óolal.

⁵Yaan jun súutuc u ti'al kit tuunich, yaan jun súutuc u ti'al u mo'olol tuunich. Yaan jun súutuc u ti'al méek, yaan jun súutuc u ti'al cha'akabtaj.

⁶Yaan jun súutuc u ti'al óoltaj, yaan jun súutuc u ti'al ma' óoltaj. Yaan jun súutuc u ti'al ta'acunaj, yaan jun súutuc u ti'al jéechcunaj.

⁷Yaan jun súutuc u ti'al jaat yaan jun súutuc u ti'al chuuy. Yaan jun súutuc u ti'al mac chi', yaan jun súutuc u ti'al t'aan.

⁸Yaan jun súutuc u ti'al yaacunaj, yaan jun súutuc u ti'al p'ectaj. Yaan jun súutuc u ti'al ba'atel, yaan jun súutuc u ti'al jéedzel.

⁹¿Ba'ax cu najmatic wíinic iquil u sen meyaj?

¹⁰Tene' quin wilic le cuuch u dzaamaj Ku tu yóokol wíinic u ti'al u pajic u subtal.

¹¹Jach tu súutuqui' tu beetaj ba'al tu láaj beetaj qui'ichquelem; tu dzaj xan ti' wíinic u tuuculil mina'an xu'ulul, quex ma' tu na'atic wíinic tuláacal u nojochil ba'ax tu beetaj Ku mix xan ba'ax bíin u beete.

¹²Tene' in wojele' ba'ax ma'alob cu beet wíinique', ca u qui'imacunt u yóol yéetel ca u dzáa utz ti' u cuxtal ca'aliquil cuxa'an,

¹³tumen wa c janal, yéetel ukul, xan ilic u yutzil tuláacal meyaje', lelo' chéen tumen Kue' dzáa ti' to'on.

¹⁴In wojel xane' tuláacal ba'ax tu beetaj Kue' ma' bíin ch'éejequi'; ma' kabéet c chúucbesiqui' mix ca c lukes ba'ax ma' kabéeti'; Kue' tu beetaj beyo', u ti'al ca dza'abac tziiquil ti'.

¹⁵Mix ba'al yaan wa ma' dzaca'an ca'achi, mix ba'al yaan bejela'e' wa ma' yaan u dzaca'antal. Kue' cu beetic u ca'a úuchul ba'ax ucha'an.

¹⁶Páatchaj xan in wilic te j lu'uma' dzo'oc u táaj kastal wíinic, tu'ux u najmal u yantal ti'ibil bejil yéetel tojil cuxtal.

¹⁷Bey túuna' quin wa'alic; Kue' bíin u p'is óolt utz wíinic, bey xan j loolob wíinic, tumen te'elo' yaan jun súutuc u ti'al tuláacal ba'ax cu yúuchul yéetel tuláacal ba'ax cu beeta'al.

¹⁸Bey xan quin wa'alic, tu yo'olal bix u cuxtal wíinic, Kue' tu beetaj u ti'al ca u túunt u yóol wíinico'ob, u ti'al ca u yilo'ob beyo'ob ba'alche'obe'.

¹⁹Tu jaajile', ba'ax cu yúuchul ti' wíinique' leti' xan cu yúuchul ti' ba'alche': láaj yaan u quíimilo'ob, je'el bix kabéet ti' wíinic múus ik u ti'al u cuxtale' bey xan ba'alche'. Mina'an u jela'anil; tuláacal chéen waya'as,

²⁰tuláacalo'ob bíin xi'ico'ob ti' jun p'éel cúuchil; tuláacal beeta'ab yéetel lu'um, tuláacalo'ob bíin suunaco'ob j lu'um.

²¹¿Máax cu páajtal u jajcuntic cu na'acal u pixan wíinic tac ca'an, yéetel u pixan ba'alche' cu yéemel yáanal lu'um?

²²Bey túuno' Dzo'oc in wilique' mina'an mix ba'al asab ma'alob ti' wíinic ca u qui'imactal u yóol yéetel u meyaj, tumen le cu najmaltic; tumen ¿máax bíin suunac u ti'al u yilic ba'ax cu úuchul le quéen quíimique'?