Read Yucateco Eclesiastés 5 Bible Online

Eclesiastés 5 - Yucateco bible

Eclesiastés 5

¹Le quéen xi'iquech tu kulnaj Kue' tucult ma'alob ba'ax bíin a beete; ma' a chéen kubic quíimsbil ba'alche'ob je'el bix le máaco'ob mix ba'al u biilalo'ob ma' tu tucultico'ob táan u beetico'ob kaas, nadzabáa yéetel u tuuculil a wu'uyaj t'antic Ku.

²Ma' a jáan séeb chi'itic ti' Ku, mix yéetel a chi', mix yéetel a tuucul, tumen Kue' ti' yaan j ca'ane', teche' ti' yanech j lu'ume'. Le t o'olale' canant a chi', ma' t'aan ya'ab.

³Tumen sen tuucule' cu beetic u wayakta'al sajbe'en náayo'ob, yéetel tu yo'olal ya'ab t'aane' cu ya'ala'al choco pool t'aano'ob.

⁴Le quéen séeb chi'inaquech ti' Kue' ma' u xáantal a dzo'ocbesic; tumen ti' leti'e' ma' tu lúubul utzil le j ma' ojéelajo'obo'. Bet le ba'ax ta séeb chi'itajo'.

⁵Asab ma'alob ma' a séeb chi' wa ma' bíin a dzo'ocbese'.

⁶Ma' a cha'ic u beetic a kebantal a chi', cu dzo'ocole' ca yanac a wa'alic ti' u aj túuchi' Ku ma' j taali' teech ba'ax ta beetaji'. ¿Tumen ba'axten bíin a beet u kuuxtal Ku tu yo'olal ba'ax ca wa'alic, ca u xu'uls xan u meeyjul a kab?

⁷Le t o'olalo' tu'ux yaan sen ya'ab sajbe'en náayo'ob, tu'ux xan cu yúuchul ya'ab t'aan ti' ba'axo'ob mina'an u biilal; teche' u najmal a we'esic a tziiquil ti' Ku.

⁸Ma' u ja'akal a wóol wa ca wojéeltic ti' wa ba'ax caajil cu ye'edzel óotzil yéetel u beeta'al ba'axo'ob kaas u taal ti' ti'ibil bejil yéetel ti' tojil, tumen jun túul nojoch náacome', cu ba'alal ba'ax cu beetic tumen u láak asab nojoch ti' leti', ba'ale' yaan u láak asab nuuctaquil cu balico'ob xan tu ca'a túulo'ob.

⁹¡Tu yo'olal le ba'alo'oba' cu ya'ala'al ma'alob u bin ti' le múuch' caajo'obo', yéetel iquil u meyajta'al lu'um tumen ajaw!

¹⁰Máax utz tu yich le taakino', mantadz cu dzíiboltic u láak; máax cu sen dzíiboltic ayikalile' mix bikin bíin u ya'al wa dzo'oc u sen yantal u taakin. Lelo' chéen waya'as.

¹¹Tumen je'el bix u bin ya'abtal u taakin wíinique' bey u bin xupic. ¿Ba'ax utzil cu najmatic, wa ma' chéen iquil u cha'antic u taakin?

¹²Máax cu meyaje' quex janac ya'ab wa jun p'íite' qui' u wenel; ba'ale' le ayikalo' ma' tu taactal u wenel tu yo'olal u taakin.

¹³Yaan jun p'éel ba'al jach yaj dzo'oc in wilic yóokolcaab: u much'quinta'al ya'ab taakine' cu taasic loob ti' u yuumil;

¹⁴tumen wa cu bin kaasil ti' jun p'éel meyaje' je'el u p'áatal x ma' taakine', cu dzo'ocole' wa yaan u paale' ma' bíin yanac mix ba'al u ti'al u p'at ti'i'.

¹⁵Je'el bix síijique', bey bíin xi'ic; bey ca'a xi'ic, chacnul taalic, chacnul bíin ca'a xi'ic, mix ba'al bíin u bis ti' le ba'alo'ob tu náajaltajo'.

¹⁶Le xana' yaayaj óolal; je'el bix taalique' bey bíin xi'ic. ¿Ba'ax u biilal sen cunel meyajnajic?

¹⁷U yajile', tuláacal u kiinilo'ob u cuxtale' tu máansaj ich éekjoche'enil, yéetel ya'ab chi'ichnaquil, yajilo'ob yéetel loolob kuuxilo'ob.

¹⁸Ba'ax dzo'oc in wilique', asab ma'alob u yúuchul qui'iqui' janal yéetel qui'iqui' ukul, yéetel utzil c xupic u tojol sen c meyaj way yóokolcaab, ca'aliquil yaan ti' to'on le cuxtal dza'an ti' to'on tumen ku.

¹⁹U láak ba'ale', ti' tuláacal máax cu dza'abal ya'ab ayikalil tumen Kue', cu cha'abal u jaantic, yéetel u ti'alintic ba'ax cu najmaltic, tumen ti' Ku cu taal.

²⁰Tu yo'olal cu chu'upul u pucsi'ikal yéetel qui'imac óolal tumen Kue' ma' tu sen yaayaj tuucul ca'aliquil cuxa'an.