Read Yucateco Eclesiastés 6 Bible Online

Eclesiastés 6 - Yucateco bible

Eclesiastés 6

¹Yaan u láak kaas suuc u yúuchul ti' wíinico'ob way yóokolcaabe', lelo' jach in wojel:

²Kue' cu dzáic ti' dze'edzec wíinico'ob ya'abcach ayikalil yéetel tzicbe'enil, ma' tu bineltic mix ba'al ti' tuláacal ba'axo'ob cu dzíiboltico'ob; ba'ale' ma' tu dzáic utz ti'ob ca u láaj xupo'ob, tumen yaanal máaxo'ob xupic. ¡Lela' chéen waya'as yéetel yaj u tzicbalta'al!

³Jun túul xiibe' je'el u páajtal u yantal tac cien u paalal, yéetel je'el u páajtal xan u sen ch'íijile'; ba'ale' quex sen xáanac way yóokolcaabe', wa ma' tu bíin utzil ti'e' mix xan tu mu'ucule', tene' quin wa'alic, jun túul paal ma' tu kuchul u kiinil u síijile', asab ma'alob yanil ti' le wíinico'.

⁴Tumen jun túul chaan paal beyo' cu samkajal ichil tuuculo'ob, tu'ux ma' bíin ka'ajsa'ac u kaaba'i',

⁵quex ma' j kuchuc p'i'ilil yich u ti'al u pactic kiin, mix yanchaj u na'ate', asab utz binic ti'leti',

⁶tumen quex ca cuxlaj dos mil ja'abo'ob le wíinico', ma' j bin utzil ti' yéetel ba'ax tu dzíiboltaji'. Tu jaajile' ¡Ti' jun p'éelili' cúuchil cu bin tuláacal máac!

⁷Xiibe' cu sen meyaj u ti'al janal, ba'ale' ma'atech u náacal u yóol janal.

⁸¿Ba'ax yaan ti' aj ojéelaj mina'an ti' le j ma' ojéelajo', chéen le ba'ax ma' tu páajtal u nu'ucbesic u ti'al cuxtalo'?

⁹Ba'ax cu yilic wíinique' leti' ma'alob ma' le ba'ax chéen cu tucultico'. Ba'ale' bey xan lela' chéen waya'as, bey u yóolta'al u la'ap'al iike'.

¹⁰Ba'ax dzaca'an bejela'e', úuch xan dza'abac u kaaba', ojéela'an xan bixi'. Mix máac cu páajtal u ba'atel yéetel máax asab yaan u muuk ti'.

¹¹Jun p'éel ba'al jaaj: tu'ux cu sen úuchul t'aane', cu sen a'ala'al t'aano'ob mix ba'al u biilal; mix ba'al cu najmalta'al yéetel.

¹²Tumen mix máac ojéeltmail ba'ax cu najmatic u xiib tu dze'edzec kiinilo'ob chéen waya'as cuxtal. U kiinilo'obe' bíin máanaco'ob bey bo'oye', ¿máax bíin a'alic ti' ba'ax bíin úuchuc cu dzo'ocol u quíimile'?