Read Yucateco Eclesiastés 7 Bible Online

Eclesiastés 7 - Yucateco bible

Eclesiastés 7

¹Tziiquile' asab ma'alob ti' qui'iboc ja'. U kiinil yúuchul quíimile' asab ma'alob, ti' u kiinil u yúuchul síijil.

²U yúuchul bin ti' jun p'éel mucsaje', asab ma'alob ti' u yúuchul ti' cha'an tumen quíimile' u xuul tuláacal xiib, máax cuxa'ano'obe' u najmal u ka'ajsico'ob.

³U yúuchul okole' asab ma'alob ti' che'ej, tumen quex u kascunt u táan yich wíinique' Ba'ale' cu beetic utz ti' u pucsi'ikal.

⁴Aj ojéelaje' cu tucultic quíimil, ba'ale' le j ma' ojéelaje', chéen cu tucultic u bin j cha'an.

⁵U yu'uba'al u keyajo'ob le aj ojéelajo'obo', asab ma'alob ti' u qui'iqui' t'aan le j ma' ojéelajo'obo'.

⁶U che'ej le j ma' ojéelajo'obo' bey u juum le x cojquéejo'ob te j káako', tuláacal chéen waya'as.

⁷Meyaj loobe' cu kascuntic u tuucul le aj ojéelaj u bo'olal tuuse' cu táaj kascuntic cuxtal.

⁸U dzo'ocsa'al jun p'éel ba'ale' asab ma'alob ti' ca dzo'ocsa'ac. U chuca'antal u yóol wíinique' asab ma'alob ti' xiixib máaquil.

⁹Ma' a cha'ic a jíilta'al tumen a p'u'ujul, tumen le kuuxilo' u ti'al máac ma' j ojéelaji'.

¹⁰Mix jun téen a káat chi'iticabáa ba'ax o'olal asab ma'alob tuláacal le ja'abo'ob máanja'ano'obo', tumen jun p'éel u káat chi' j ma' ojéelajil.

¹¹Ma'alob, áantaj xan le ojéelaj u ti'al máaxo'ob caja'ano'ob way yóokolcaabe', wa cu nu'upul tumen jun p'éel kamba'albáil.

¹²Tumen ojéelaje' bey taakine' cu yáantaj, ba'ale' ojéelaje' cu dzáic cuxtal ti' aj ojéelaj.

¹³Pact ma'alob ba'ax u beetmaj Ku: ¿Máax bíin páatac u tojquintic ba'ax u lochmaj?

¹⁴Quéen xi'ic teech utze', qui'imacchajac a wóol yéetel; ba'ale' quéen xi'ic teech kaase', dzáabáa a tuculte', tu ca'a p'éelal cu taal ti' Ku, tumen wíinique' ma'atech u yojel ba'ax cu taal u kiinili'.

¹⁵Tuláacal lela' tin wilaj tu kiinilo'ob u chéen waya'asil in cuxtal: utzul máaco'ob cu quíimilo'ob quex cu beetico'ob utz, yéetel loolob wíinico'ob quex tumen kasa'ano'obe' cu ya'abtal u kiinil u cuxtalo'ob.

¹⁶Ma' a tuculticabáa wa jach utzech, mix a tuculticabáa wa jach p'ila'an a wich. ¿Ba'axten bíin a quíimsa'abáa ta juunal?

¹⁷Ma' a sen tuculticabáa wa loolob máaquech, mix a tuculticabáa wa mix ba'al a biilal. ¿Ba'ax o'olal bíin quíimiquech wa ma' kuchuc u kiinili'?

¹⁸Ma'alob ca a machabáa ti' lelo', ma' xan a cha'akabticabáa ti' u láako'. Máax cu tziquic Yuumtzile' cu bin utzil ti' tuláacal ba'ax cu beetic.

¹⁹Ma' tu que'etel le muuk cu dzáic ojéelajil ti' aj ojéelaj, tumen le dzáic diez méektáano'ob ti' jun p'éel caaj.

²⁰Mina'an mix máac jach yiij u cuxtal ca u beet utz mantadz, ma' u kebanchajal.

²¹Ma' a dzáic a wóol ti' tuláacal ba'ax cu ya'ala'al, beyo' ma' bíin a wu'uy le quéen t'aanac kaas a palitzil ta wo'olal.

²²Quex tumen a wojel ya'ab u téenel t'aanaja'anech kaas tu yo'olal a wéet u láak máaco'ob.

²³Tuláacal tin xakal xíixtaj yéetel ojéelajil, tumen in káat in beetinbáa aj ojéelaj; ba'ale' jach ca'anal yanil ca'ach ti' teen.

²⁴¡Náach yanil ti' teen tuláacal ba'ax dzaca'an! ¡Jach taam ma' tu páajtal in ch'a'a nu'uctic!

²⁵Ca túun tin kubajimbáa j canbal u ti'al in kaj óoltic ba'ax ca'anbesajilo'ob cu taasico'ob in caxantic aj na'at. Ca tin wilaje' jach kaas le ma' j ojéelajo', yéetel chocopoolal le jach nuumilo'.

²⁶Tin nactáantaj ba'ax asab káaj ti' le quíimilo': le co'olel cu dzáic léecho'ob, yéetel u pucsi'ikale', cu kaxic wíinic yéetel u lóoch. Máax cu pacta'al ma'alob tumen Kue' bíin xi'ic utzil ti', ba'ale' le j loolob máaco' bíin lúubuc tu léecho'ob.

²⁷Tin wóoltaj in caxt u o'olalil le ba'alo'obo', teen, le Aj tze'eco' tin nuptáataj lela':

²⁸¡Ma' in nactáant jach le ba'ax quin caxtico'! tin nactáantaj jun túul xiib ichil mil, ba'ale' mix jun túul co'olel ichil tuláacal.

²⁹Chéen tin nuptáantaj lela': Kue' tu beetaj jach ma'alob wíinic, ba'ale' le ti'e' tu kascuntaj u cuxtal.