Read Yucateco Eclesiastés 8 Bible Online

Eclesiastés 8 - Yucateco bible

Eclesiastés 8

¹¿Máax cu páajtal u queticubáa yéetel aj ojéelaj? ¿Máax cu páajtal u yojéeltic ba'ax bíin úuchuc? Ojéelajile' cu chíicpajal tu yich wíinic; cu beetic u kexpajal u dzíiquil u paacat.

²Dzo'ocbes u t'aan ajaw, tumen bey ta jalach t'antilac tu táan Ku.

³Ma' a jóokol jach séeba'an tu táan ajaw. Ma' a táacpajal ti' u ba'aluba'ob loolob wíinico'ob, tumen leti'obe' cu páajtal u beetic ba'ax u káate'.

⁴U t'aan ajawe' leti' u najmal u yu'uba'al mina'an u láak, mix máac cu páajtal káat chi'itic ti' ba'ax cu beetic.

⁵Máax dzo'ocbesic jun p'éel túuchi'e', ma' bíin úuchuc mix ba'al kaas ti', máax aj ojéele' cu ch'a'a nu'uctic ba'ax kiin yéetel bix u najmal u dzo'ocbesic.

⁶Jach tu jaajile', yaan jun súutuc, yaan xan jun p'éel u bixil u beeta'al tuláacal ba'al, ba'ale' u talamile'

⁷wíinique' ma' u yojel ba'ax bíin úuchuqui', mina'an xan máax dzáic u yojéelte.

⁸Mix máac yaan u páajtalil yóokol cuxtal u ti'al ma' u quíimil, mix máac yaan páajtalil u ti'al pa'ic u muuk quíimil. Mix máac bíin u jech le mukulmuuka'. J loolob máaque' ma' bíin to'ococ tumen u kasa'anili'.

⁹Tuláacal lela' tin wilaj le ca tin kubajinbáa u ti'al in kaj óolt ba'ax cu beeta'al way lu'ume', yéetel in kaj óoltic le páajtalil yaan ti' wíinic u ti'al u beet loob ti' u yéet j xibil.

¹⁰In wilmaj xan loolob máaco'ob, náach yanilo'ob ti' quili'ichil cúuchil, cu ya'ala'al ba'al jadzutz tu yo'olalo'ob tu kiinil u mu'uculo'ob; cu dzo'ocol xane' mix máac ka'ajsic te j caaj tu'ux tu beetaj le loobe', le xana' ma' tin na'atic,

¹¹tumen wa ma' tu séeb dzo'ocbesa'al jun p'éel xot kiin u ti'al u ja'adzal le j meyaj loobo', lelo' cu taasic u tuuculil ti' wíinic chéen meyaj loob.

¹²¡Ba'ax bíin úuchuque' le máax cu si'ipile' ma' tu ch'enic u beetic kaas, bey u cuxtal ya'ab ja'abo'ob! (Tene' ba'ax in wojel ca'ache' máaxo'ob cu tziquico'ob Ku yéetel cu chíin poolalo'ob tu táane' cu bíin utzil ti'ob;

¹³ba'ale' ti' j loolob máaco'obe' cu bin kaasil ti'ob, u cuxtalo'obe' bey bo'oye' tumen ma' tu tziquico'ob Ku.)

¹⁴Bey cu yúuchul way lu'ume' máaco'ob utze' cu mukyajo'ob beyo'ob kasa'ano'obe', j loolob máaco'obe' cu qui'imacuntic u yóolalo'ob beyo'ob máaco'ob utzo'obe'. ¡Tene' quin wa'alic xan, le xana' ma' tin na'atic!

¹⁵Le t o'olal quin dzáiquinbáa in wa'al utz le qui'imac óolalo'. Ba'ax u ma'alobil u ti'al wíinic way yóokolcaabe' u janal, ukul yéetel u qui'imactal u yóol, tumen chéen le cu náajaltic ti' u kiinilo'ob u cuxtal cu dza'abal ti' tumen Ku way yóokolcaabe'.

¹⁶Ca'aliquil tin kubajimbáa u ti'al in canbal, u ti'al ca yanac in wojéeltic, yéetel in qui'iqui' ilic tuláacal ba'ax cu beeta'al way lu'ume'; cu kuchul u súutuquil ma' tu páajtal u wenel máac,

¹⁷ca tin wilaj, wíinique' ma' tu páajtal u Ch'a'a nu'uctic ba'ax cu beetic Ku, mix le ba'ax cu yúuchul way yóokolcaaba'. Quex ca u mukulmukte, ma' bíin u yojéelti'; quex ca u ya'al le aj ojéelaj u kajóolmaje', jach tu jaajile' ma' páatac u nuptáantiqui'.