Read Yucateco Eclesiastés 9 Bible Online

Eclesiastés 9 - Yucateco bible

Eclesiastés 9

¹Ti' tuláacal lela', dzo'oc in utzil kubiquinbáa, chéen u ti'al in wojéeltic, u meyajo'ob bin, máaxo'ob utzo'ob, yéetel le aj ojéelajo'obo', ti' yano'ob tu kab Kue'. Mix ba'al u yojel wíinic tu yo'olal yaacunaj mix tu yo'olal ch'a'a p'ectaj, quex ti' yano'ob tu táan yiche'.

²Tu jaajile' mina'an u jela'anil, jun p'éelili' ba'ax bíin úuchuc ti' tuláacal, ti' aj ti'ibil bej, bey ti' aj loobil bej, ti' utzil wíinic bey ti' loolob wíinic, ti' máax utz yanil bey ti' le ma' utz yanilo', ti' máax kubic quíimsbil ba'alche' bey ti' máax ma' tu kubico'; ti' ma' si'ipilnja'an bey ti' si'ipilnaja'an, ti' máax cu séeb chi' bey ti' máax ma' tu séeb chi'.

³Lela' u kaasil ti' tuláacal ba'ax cu beeta'al way yóokolcaabe': ti' tuláacal bin, bíin úuchuc jun p'éelili' ba'al. Uláak ba'al xane', u tuucul wíinique' chuup yéetel loobil; u jach nuumile' leti' t'onquintic u tuucul tuláacal u kiinilo'ob u cuxtal, tu xuule', ¡cu bin yáanal lu'um!

⁴Yaan ya'ab u alab óolal máax cuxa'an, tumen peek cuxa'ane' asab yaan u tojol, ti' quimen león.

⁵U láak ba'ale', máaxo'ob cuxa'ano'obe' u yojelo'ob bíin quíimico'ob, ba'ale' quimeno'obe' ma' u yojelo'ob mix ba'ali' ma' xan tu náajaltico'ob mix ba'al, tumen cu tu'ubsa'alo'ob.

⁶Te cu dzo'ocol u yaacunaji', ba'ax u p'eec ti' xan cu xu'ulul u dzíibolalo'ob, mix bikin bíin suunac u beet ba'ax cu beeta'al way yóokolcaabe'.

⁷¡Co'ox líiken! dzáa utz ta chi' yéetel le waaj ca jaantico', qui'icunt xan a chi' yéetel le vino' ca wukico', tumen Kue' utz u yilic ba'ax ca beetic.

⁸Búucbes mantadz sac nook; dzáa qui'iboc ja' ta pool.

⁹Dzáa utz ti' a cuxtal yéetel le co'olel a yaabiltmajo', tuláacal u kiinilo'ob le chéen cunel cuxtal dza'an ti' teech way yóokolcaaba'; le jaaj bíin a náajalt tu yo'olal a sen meyaj way yóokolcaaba'.

¹⁰Tuláacal ba'ax cu taal ta kab u ti'al beete', beet yéetel jaaj óolal, tumen te j mucnal tu'ux bíin xi'iquecho', ma' tu yúuchul tuuculi', mix kaj óolal, mix ojéelaj.

¹¹U láak ba'al tin wilaj way yóokolcaabe': ma' le máaxo'ob chich u yáalcabo'ob cu kuchulo'ob táanil, mix le xibil máaco'ob cu pa'ico'ob u muuk ich ba'atel; ma' láaj kiin yaan waaj ti' aj ojéelajo'obi', mix aj na'ato'ob ayikalo'ob, mix le canbalnaja'ano'ob cu ka'amalo'ob ma'alob; tuláacalo'obe' cu yáanta'alo'ob tu jun súutuc utzil.

¹²Mix máac u yojel ba'ax súutuquil bíin kuchuc u kiinil u quíimil; je'el bix le cayo'ob cu chu'uculo'ob te j ka'anabo', bey le ch'íicho'ob te j núup'o', bey xan u yúuchul ti' wíinic, le súutuc naayal u yóolo', cu lúubul ti' léechil.

¹³Bey xan in wilmaj way yóokolcaabe' jun p'éel ba'al cu taasic jun nojoch ca'anbesaj;

¹⁴jun p'éel chan caaj yéetel jun p'íit u cajnáalilo'obe', cu ba'atelta'al tumen jun túul ajaw yaan u páajtalil u líiksic tu bakpach jun p'éel nojoch u chúunul ba'atel.

¹⁵Te j caajo' yaan jun túul óotzil wíinic, ba'ale' aj ojéelaj, máax yéetel u kaj óolale' je'el u toquic le caajo', ¡mix máac cu cáajsic!

¹⁶Ba'ale' tene' quin wa'alic, aj ojéelaje' asab ma'alob, ti' xiixib wíinic, quex aj ojéelaj óotzil wíinique', ma' tu yu'uba'al mix cu ch'en xiquinta'al ba'ax cu ya'alic.

¹⁷U jéedzel t'aan aj ojéelajo'obe' jach cu yu'uba'al, ma' bey u yawat jun túul u ajaw j ma' ojéelajo'ob.

¹⁸Ojéelaje', asab co'oj, ma' bey u nu'uculo'ob ba'atel. Ba'ax ma' tu beeta'al ma'alobe' cu taasic nojoch loob.