Read Yucateco Cantares 2 Bible Online

Cantares 2 - Yucateco bible

Cantares 2

¹Tene' u sac nicte'ilen u cabal lu'umilo'ob Sarón, tene' u chac nicte'ilen le táax lu'umilo'obo'.

²Ichil u láak co'olelo'obe', in x yaabilaje' bey chac nicte' ich ki'ixo'obe'.

³Ichil u láak xiibo'obe' in aj yaabilaje' bey jun cúul manzana yanil ichil u che'ilo'ob káaxe'. ¡Buca'aj síis óol quin wu'uyic in cutal yaanal u bo'oy! ¡Buca'aj qui' ch'ujuquil u yich tin chi'!

⁴Tu najil noj janalo'ob tu bisajen, u paacat in ti'ale' chuup yéetel yaacunaj.

⁵¡Dza'ex in jaant pakachbil u kulimil uvas u ti'al in ch'a'ic in wóol, tzéentene'ex yéetel manzanaob, tumen táan in quíimil tu yo'olal yaacunaj!

⁶¡Ca u lóochen yéetel x dzíic kab, yéetel u x no'oje' ca u méeken!

⁷U co'olelile'ex Jerusalén, séeb chi'ite'ex ti' teen, tu kaaba' u x quéejilo'ob yéetel u x yuuquilo'ob káax, ma' a wajsique'ex in x yaabilaj, ¡Cha'ex u wenel, chéen tu juunal cu bin j ajal!

⁸¡Táan u taal in aj yaabilaj! ¡Táan in wu'uyic u t'aan! sit'lanquil u taal tu yóokol le pu'uco'obo', sit'lanquil u taal tu yóokol le pu'uco'.

⁹In aj yaacuntmaje' bey jun túul quéeje': bey jun túul chan quéeje'. ¡Dzo'oc u cóojol, ti' yaan tu paach le jool najo', táan u ch'eeneb ti' le calom kiino', táan u ch'úuc tu yáam le tzatzal che'o'b!

¹⁰In yaabilaje' tu ya'alaj ti' teen: Líiken, in yaabilaj; in yaabilaj líiken, co'ox.

¹¹¡Il a wil! Dzo'oc u máan le que'el, dzo'oc xan u máan u kiinilo'ob ja'aja'al.

¹²Dzo'oc u xíitil le loolo'ob te j káaxo', Dzo'oc u kuchul u kiinil u yúuchul kaay, táan u yu'uba'al ti' le c lu'uma' u kaay mucuyo'ob.

¹³Yaan u yich u che'ilo'ob higo, cu ki'itpajal u qui'iboquil u lool pakal uva. Líiken in aj yaabilaj; in aj yaabilaj líiken, co'ox.

¹⁴In x sacpacal, ca ta'acbesicabáa tu yáam le nucuch tuunicho'obo', ichil u ca'analilo'ob yéetel ichil u koklemaquil le nucuch tuunichilo'ob witzo', cha'a' in wilic a wich, cha'a' in wu'uyic a t'aan. ¡Cu dzáic qui'imac óolal a wila'al! ¡Sen ch'ujuc u yu'uba'al a t'aan!

¹⁵Chuque'ex le mejen ch'omaco'obo', cu kascuntico'ob u x péet pachil pakal uva, Le c uva táan u loolanquilo'ob.

¹⁶In aj yaacunaje' in ti'al, tene' u ti'alen. Leti'e' cu tzéentic u j tamano'ob ichil le nucuch tuunicho'obo'.

¹⁷Ca'aliquil u kuchul le kiin yéetel u bin le éekjoch'e'enilo', suunen in aj yaacunaj; béeychajquech je'el bix jun túul quéeje', je'el bix jun túul chan quéej cu yáalcab ichil u koklemaquil u tuunichilo'ob le pu'uco'.