Read Yucateco Cantares 3 Bible Online

Cantares 3 - Yucateco bible

Cantares 3

¹Yéetel áakab ichil in wenele', tin dzajinbáa in caxant u aj yaabilaj in cuxtal. Tin caxantaj ba'ale' ma' tin nuptáantaji'.

²J líiken túune' ca tin wáalcabtaj le caajo' táan in caxantic u aj yaabilaj in cuxtal ti' bejo'ob yéetel ti' kíiwico'ob. Tin caxantaj ba'ale' ma' tin nuptáantaji'

³Tin káat chi'itaj ti' aj canano'ob cu susut máano'ob ich caaj: ¿Ma' wa a wile'ex u aj yaabilaj in cuxtali'?

⁴P'elac náachchajiquen ca'ach ti'obe' ca tin nuptáantaj u aj yaabilaj in cuxtal. Ca ti' machaj tu kab, bey in machmailo' tin bisaj tu káasabilo'ob u yotoch in maama.

⁵U co'olelile'ex Jerusalén, jalach t'ante'ex ti' téen, tu yo'olal u quéejilo'ob yéetel u mejen x quéejilo'ob káax, ma' bíin a wajse'ex in x yaabilaji'. ¡Cha'ex u wenel tac quéen u yóolt u p'il yich!

⁶¿Ba'ax le cu taal tu tojil x tocoy lu'um cu náadzal ichil u tuul le buudzo', ichil u buudzil mirra yéetel buudzil poom ichil xan u jejeláas qui'iboquilo'ob?

⁷¡U nu'ucul u kóoch che'eta'al Salomón! Táan u taal nactáanta'an tumen sesenta aj ba'atelo'ob u asab xiibil máaquilo'ob Israel;

⁸Tuláacalo'obe' u yojelo'ob ba'atel yéetel táadz máascab; tu jun túul u yéet bin u máascab u ch'icmaj tu piix ma' xan wa máax u káat u beet loob ti'ob ichil éekjoche'en.

⁹Ajaw Salomone' tu beetaj jun p'éel kóochche' u ti'alte yéetel u qui'ichquelem che'ilo'ob Líbano.

¹⁰U nu'uculo'ob u t'altale' beeta'an yéetel plata; u x nacab pu'uchile', beeta'ab yéetel oro; u káanche'ile' to'an yéetel ma'alob chac nooko'ob; ichile' jadzutzquinta'an yéetel yaacunaj tumen u co'olelo'ob Jerusalén.

¹¹U co'olelile'ex Sión, ¡jóokene'ex a wile'ex ajaw Salomón! Le x péet jo'ol cu bisic u dzaamajo' j beeta'ab tumen u maama u ti'al le kiin ca j dzo'oc u beele', tu kiinil u jach qui'imac óolal u cuxtal.