Read Yucateco Cantares 5 Bible Online

Cantares 5 - Yucateco bible

Cantares 5

¹In wíidzin, in x ba'al, dzo'oc in wocol tin x péet pachil in nicte'ob. dzo'oc in cha'ic in mirra yéetel in qui'iboc ja', dzo'oc in túuntic u caabil in walak caab, dzo'oc xan in wukic in wo'och vino yéetel in wo'och leche. In wéet bisajbáile'ex jaanene'ex ukulnene'ex xan, ¡uke'ex Je'el buca'aj a káate'exe'!

²Tene' táan ca'ach in wenel, ba'ale' in pucsi'ikale' ma'. Ca tin wu'uyaj u t'aan in x yaabilaj te jool najo': ¡In x yaabilaj, in wíidzin, in x sujuy sacpacal je'eten le jool najo'! ¡In poole' dzo'oc u sulbal yéetel ye'eb! ¡U ye'ebanquil le áakabo' táan u yáalcab tu tzo'otzel in jo'ol!

³Dzo'oc ca'ach in pitic in nook; ¡Yaan wal in ca jeliquinbáe'! dzo'oc ca'ach in p'o'ic in wooc; ¡yaan wal u ca'a pakbal yéetel lu'ume'!

⁴In aj yaabilaje' tu yocsaj u kab tu joolil le jool najo'. ¡Lelo' tu sen péecsaj in wóol!

⁵J líiken túun u ti'al in je'ic le jool naj ti' in aj yaabilajo'. Ti' in kabe' yéetel ti' u yaalo'obe' j lúub u ch'áajalo'ob mirra yóokol u kalabil le jool najo' ¡Le ca tin wu'uyaj u t'aane' tin tuclaj in ca'aj quíimil ca'ache'! Le ca tin je'aj le jool najo' ti' in aj yaabilaje' ba'ale' leti'e' dzo'oc ca'ach u bin Júupen in caxte' ba'ale' ma' tin nuptáantaji', tin waawtaje' ba'ale' ma' tu núucaji'.

⁷Tu nuptáantajeno'ob le aj canano'ob cu sutut máano'ob ichil le caajo'; tu jadzeno'ob, tu beetajo'ob loob ti' teen; le máaxo'ob canantic u jool le caajo' tu jáanpaytajo'ob in bóoch'.

⁸U co'olele'ex Jerusalén, wa ca nuptáantique'ex in yaacunaje', séeb chi'ite'ex ti' teen, bíin a wa'ale'ex táan in quíimil tu yo'olal u yaacunaj.

⁹¿X qui'ichpam ichil x qui'ichpamo'obo', ba'ax u jela'anil yaan ti' a x yaabilaj? ¿Ba'ax u jela'anil yaan ti' a x yaabilaj u ti'al c beetic teech le séeb chi'a'?

¹⁰In aj yaabilaje' óoli' sac, ichil mil xiibo'ob ma' satbe'eni'.

¹¹U poole' ma'alob oro; u tzo'otzel u poole' mu'uch yéetel boox je'el bix u booxil u ku'ukmel j ch'oome';

¹²U yicho'obe' bey ca'a túul sacpacal dzo'oc u yichquilo'ob ich lechee', t'uchucbalo'ob tu chi' jun p'éel noj jaltun;

¹³U p'u'uque' u x péet pachil u qui'iboc nicte'obe'. u bóoxel u chi'e' nicte'ob tu'ux táan u ch'ach'ajanquil mirrae';

¹⁴U kabo'obe' bey u chúujul oro pixa'an yéetel topaciobe'; u wíinclile' jun p'éel leledzquil sasac baac baxa'an yéetel zafiro'obe';

¹⁵U muuk yooco'obe' bey ocom beeta'an yéetel mármole' toj wa'alico'ob yóokol u chuuno'ob chéen oro; tuláacal leti'e' chica'an ti' u kuulche'ilo'ob líbano;

¹⁶U na'aca'ane' mina'an u xuul ch'ujuquil. ¡Tuláacal leti'e' jadzudz! Bey in aj yaabilajo', bey in yaacunajo' u co'olelile'ex Jerusalén.