Read Yucateco Cantares 6 Bible Online

Cantares 6 - Yucateco bible

Cantares 6

¹X qui'ichpam ichil x qui'ichpamo'ob ¿tu'ux j bin a aj yaabilaj'? ¿Tu'ux tu tojtáantaj? ¡Binelca'ajo'on ta wéetel u ti'al c caxantic!

²In aj yaabilaje' j bin tu x pachil u qui'iboc nicte'ob, u ti'al u tzéent u múuch'ul u j tamano'ob yéetel u t'oquic nicte'ob.

³Tene' u ti'alen in aj yaabilaj, leti' xane' in ti'al. Leti'e' cu tzéentic u j tamano'ob ichil u x péet pachil nicte'ob.

⁴Teech in x yaacunaj, jach qui'ichpamech a jadzutzile' beyo'ob u caajilo'ob Tirsa yéetel Jerusalene'; beyech jun múuch' aj ba'atelo'ob mina'an páajtalil pa'ic u muuko'obe'.

⁵¡Ma' a pactiquen, tumen a paacate' dzo'oc u lúubsic in muuk! U tzo'otzel a poole' beyo'ob mejen j yuuco'ob cu báaxalo'ob tu pu'uquilo'ob Galaad

⁶A coje' láaj ma'alob tzoololilo'ob, beyo'ob u múuch'ul j tamano'ob táantic u jóokolo'ob u ti'al kosbile'.

⁷A p'u'uque' bey ca'a múuch' granadaob u ta'acbesmuba'ob tu paach káasabo'obe'.

⁸Sesenta le x ajawo'obo', ochenta x keecho'ob yéetel ya'ab x lo'obayeno'ob.

⁹Ba'ale' in x sujuy sacpacale' chéen jun túulili'; chéen jun túul le x ch'úupal táanilcunta'an tumen le máax tu síijso'. Quéen ila'ac tumen le x lóobayano'obo' bíin u ya'alo'ob ti': qui' a wóol, cu qui'iqui' t'anta'al tumen x ajaw yéetel u x keecho'ob.

¹⁰¿Máax le cu tíip'il bey u chíicpajal ja'atzcab kiin? Qui'ichpam bey uj, bey kiin cu léembale', ¡Beyech jun múuch' aj ba'atelo'ob páajtalil pa'ic u muuko'ob!

¹¹Ichil u káaxil nogalo'ob j binen u ti'al in cha'antic u ya'axil le t'o'ol ja'o'; in káat ca'ach in wilic u ku'uk le pakal uvaob yéetel u lool le granadaobo'.

¹²Cu dzo'ocole' ma' tin wojéeltaj ba'ax uchi' chéen ca tin wilaje' ti' culucbalen ti' jun p'éel bolan tu tzéel u paal ajaw.

¹³¡Suunen Sulamita, suunen! ¡Suunen, tumen c káat ilech! ¿Ba'ax a káat a wile'ex ti' le x Sulamitao'? ¡J káat il u yóokot, je'el bix u yúuchul óokot ti' ichil le najo'ob beeta'ano'ob yéetel nooko'!