Read Yucateco Cantares 7 Bible Online

Cantares 7 - Yucateco bible

Cantares 7

¹¡X ajaw ch'úupal jadzutz a wooc ichil a xanab kéewel! U lo'olopil a t'e'et'e', bey jadzutz ba'al beeta'an tumen máax u yojel u meyajt ma'alob oroe'.

²A tuuche' bey jun p'éel chan luuch mantadz chuup yéetel vinoe'; a nake' bey jun p'éel chulubil trigo bakpachta'an tumen nicte'ob.

³A wiimo'obe' beyo'ob ca'a túul quéejo'ob iicho'obe'.

⁴A caale' bey jun p'éel u witzil najil marfile'; a wicho'obe' bey le ca'a p'éel cheemo'ob yano'ob tu caajil Hesbón, tu tzéel u jool najil Bet-rabim; a ni'e' chica'an ti' u witzil líbano cu paacat tu tojil u caajil Damasco.

⁵A pool yóokol a wíinclile' bey u pu'uquil Carmelo; u tzo'otzel a poole' bey chac sóosquile': ¡Jun túul ajaw kala'an ichil u mu'uchil a pool!

⁶In yaacunaj, co'olel táaj utzech tin wich. ¡qui'ichpamech, táaj qui'ichpamech!

⁷A wa'atale' chica'an ti' tojil jun cúul xa'an a wiimo'obe' beyo'ob u ch'úuyul u yicho'obe'.

⁸Tene' quin tucultic in na'acal in t'oc u chúuchuch ich le xa'ano'. A wiimo'ob túune' bíin béeyaco'ob u ch'úuylo'ob uvaobe'; a múus ike' bey u qui'iboquil manzanaobe';

⁹a na'aca'ane' bey ma'alob vino cu yáalal tu bóoxel a chi' yéetel ta coj.

¹⁰Tene' u ti'alen in aj yaacunaj; u taactal yaacunaje' leti' beetic u taal tin wicnal.

¹¹¡Lep' a wóol, in aj yaacunaj, co'ox ich cool! bíin c máans áakab ichil u nicte'il Alheña.

¹²Le quéen sáaschajaque' c bin tu péet pachil uvaob, u ti'al c ilic wa yaan u lool, wa táan u xíitil u nicte'ilo'ob, wa dzo'oc xan u lool le granadaobo'. ¡Te'elo' bíin in dzáa ti' teech in yaacunaj!

¹³Le mandragoraobo' cu ki'itbesic u qui'iboquil. Tu u jool c otoche' yaan u jejeláasil janalbe'en yicho'obi': yaan yich kulim, yaan xan yich, táant u t'o'ocole', tin jun páaycuntaj u ti'al in dzáa ti' teech in aj yaabilaj.