Read Yucateco Cantares 8 Bible Online

Cantares 8 - Yucateco bible

Cantares 8

¹¡Quexi'i wa in sucu'uneche', quexi' wa tzéenta'anech yéetel u kaab u yiim in maamae'! beyo' le quéen in nuptáantech te j bejo' mix máac bíin u p'a'asten le quéen in dzu'udzeche';

²je'el u páajtal loobal in bisiquech tu yootoch in maama, je'el in wocsiquech loobal ichile', teech bíin a beetabáa in aj ca'anbesaje'. Tene' in dzáic loobal a wuk u ma'alobil vino yéetel u kaab in pakal granadaobe'.

³¡Ca u dzáa u x dzíic kab u ti'al in káan jo'olte, yéetel u x no'oje' ca u lóochen!

⁴U co'olelile'ex Jerusalén séebchite'ex ti' teen ma'atáan a wajse'ex in aj yaabilaji'. ¡Cha'ex u wenel, tu juunal cun j ajal!

⁵¿Máax le cu taal tu tojil le x tocoy lu'umo', u chéen chicunsmaj u pool tu queléembal u aj yaabilaj? Yáanal jun cúul manzano tin wajsaj; te tu'ux yanchaj u ki'inamilo'ob tu síijsajiquech a maama. te tu'ux tu síijsajecho'.

⁶Bisen bey dzalab ta pucsi'ikale' ¡Bisen bey dzalab ta kab! Yaacunaje' ma' tu pa'abal u muuk, bey quíimile'; dzíibolaje' mina'an kéexel ti' bey mucnale'. ¡U tóoch'bal káakil yaacunaje' jun p'éel quili'ich káak!

⁷U ja'il tuláacal ka'anabo'obe' ma' tu páajtal u tupico'ob yaacunaji' mix xan áalcab ja'ob. Wa yaan máax ca u yóolt dzáa u ayikalil tu yo'olal yaacunaje' chéen p'a'as bin u kam wale'.

⁸U yiimo'ob c íidzine' ma'a cúuluqui'. ¿Ba'ax bíin c beet yéetel quéen talac káatbil?

⁹Wa tuulum lobale' je'el c beetic wal yóokole' u tiich' pako'ob yéetel plata; wa jool naj lobale', je'el c pixic yéetel u xéet'elo'ob kuulche'e'.

¹⁰Tene' beyen jun p'éel tuulume', in wiimo'obe' beyo'ob witzo'obe', le t óolale' tu yich leti'e', dzo'oc in caxtic qui'imac óolal.

¹¹Salomone' yaan ca'ach ti' jun p'éel u x péet paachil uva tu lu'umil Baal-hamón. tu p'ataj u ti'al u meyajto'ob wa jay túul aj canano'ob, p'elac u yúuchul jooche' cu kubico'ob tu jujun túulil mil u taakinil plata.

¹²Le mil u p'éelel taakino'obo' u ti'al ca'ach Salomón, yéetel doscientose' u ti'al le j canano'obo'; ¡Tene' quin canantic u x péet pachil in pakal uva!

¹³¡Cha'a' in wu'uyic a t'aan, u x ajaw u x péet pachil nicte'ob! ¡C wéet bisajba'obe' taac u yu'ubico'ob t'aan!

¹⁴¡Áalcabnen, in aj yaabilaj, áalcabnen je'el bix jun túul quéeje', bey u yaal jun túul x quéej yóokol le pu'uco'ob chuuptaco'ob yéetel qui'iboquilo'ob!