Read Yucateco Isaías 1 Bible Online

Isaías 1 - Yucateco bible

Isaías 1

¹U bóobat t'aano'ob Isaías u paal Amoz je'el bix e'esa'abic ti' tumen Ku tu yo'olal ba'axo'ob bíin úuchuc tu múuch' caajilo'ob Judá yéetel tu caajil Jerusalén, tu kiinilo'ob táan ca'ach u ajawilo'ob Uzías, Jotán, Acaz tu yéetel Ezequías tu múuch' caajil Judá.

²Ca'an yéetel lu'um, ch'en xiquinte'ex ba'ax cu ya'alic Yuumtzil: Tin tzéentaj in paalal tac ca j nuucchajo'ob, ba'ale' leti'obe', j ko'oxchajo'ob ti' u j ma' u'uyaj t'aanilo'ob.

³Wacaxe', cu kaj óoltic u yuumil, burroe' cu kaj óoltic xan u cúuchil tu'ux cu tzéenta'al tumen u yuumil; ba'ale' Israel in caajale', ma' tu kaj óoltiquen, cu dzo'ocole' mina'an u na'at.

⁴¡Yaj yanile'ex sen j keban wíinique'ex, j keban caaje'ex, u ch'i'ibale'ex loolob wíinico'ob, u paalale'ex máaco'ob táaj tzeelel u cuxtalo'ob! Dzo'oc a náachtale'ex ti' Yuumtzil, dzo'oc a xúunp'attique'ex u quili'ich Kuil Israel, dzo'oc a dzáique'ex jun tzéelil.

⁵Te'exe' ch'iiquile'ex ti' u ko'oxil a j ma' u'uyaj t'aane'ex, ta wíinclile'exe' dzo'oc u p'áatal mina'an tu'ux a ja'adzale'ex. Láaj xaacal a poole'ex, dzo'oc u p'áatal mina'an a muuke'ex jun puli'.

⁶Likbal tu ni' a wooque'exe' tac ta poole'exe', mina'an mix jun xéet' u yutzil a wíinclilex; láaj yajtaco'ob, ko'okola'ano'ob yéetel tu'utaco'ob; mix máac dzacmail ti' te'ex, mix máac xan to'omail, mix cu'ulta'an aceite ti'obi' u ti'al u ch'éenel u ki'ina'amilo'ob.

⁷Dzo'oc u x tocoy lu'umtal a múuch' caaje'ex, táan u tóoch'bal u káakil caajale'ex. tu táan a wiche'ex cu jaanta'al tumen a aj p'eeque'ex, ba'ax a pakmaje'ex. dzo'oc láaj suut x tocoy lu'umil, je'el bix p'áatic Sodoma le kiin ca j xu'ulsa'abe'.

⁸Chéen Sión j p'a'at ma' j tóoca'abi', bey jun p'éel pasel chúumuc u x péet pachil uvae', bey jun p'éel máacan chúumuc tu'ux paka'an melone', chéen tu jun bakpachta'anil tumen le aj p'eeco'.

⁹Wa ma' úuchic u p'a'atal cuxa'an dze'edzec ti' to'on tumen u Yuumil tuláacal páajtalile', bejela'a' dzo'oc ca'ach u p'áatal bey u caajilo'ob Sodoma yéetel Gomorrae'.

¹⁰Ch'en xiquinte'ex u t'aan Yuumtzil u méektáanile'ex Sodoma, u caajile'ex Gomorra u'uye'ex ma'alob ba'ax cu bin u ca'aj u ca'anbes ti' te'ex Ku.

¹¹Yuumtzile' cu ya'alic: ¿Ba'ax u biilal le sen quíimsbil ba'alche'ob ca taasique'ex teno'? Dzo'oc u náacal in wóol ti' le tóocbil j tamano'ob yéetel ti' u tzaatzel le j mejen wacaxo'obo'; kaas u lúubul ti' teen u ki'ikel le wacaxo'ob, le j tamano'ob yéetel le j mejen j yuuco'obo'.

¹²Te'exe' ca taale'ex a táanbesaba'ex tin táan, ¿ba'ale' máax a'al te'ex ca taalaque'ex a xanabcha'ate'ex u táancabil in quili'ich najil?

¹³Ma' a taasique'ex ti' teen ti'ibil óolo'ob mina'an u tojol; dzo'oc u náacal in wóol ti' u buudzilo'ob. Te'exe', ca t'anique'ex caaj u ti'al u kiinbeso'ob u kiinil chichan uj, sábado, ba'ale' tene', ma' bíin in kam ba'ax cu beetic máaxo'ob kaas u cuxtalo'obi'.

¹⁴Kaas u lúubul ti' teen u kiinbesajil chichan luna yéetel le kiinbesajo'ob cu much'icuba'ob u beeto'ob; ¡dzo'oc sen lúubulo'ob teen kaasil, ma' bíin in ca'a mukyajt u kubico'ob ti' teni'!

¹⁵Quéen a líikese'ex a kabe'ex u ti'al a payalchi'exe', tene' bíin in sut in wich táanxel tu'ux; quex sen payalchi'inaque'exe', ma' bíin in ch'en xiquinti'. Ta kabile'ex a quíimsmaje'ex wíinico'ob.

¹⁶¡P'o'ex a kaasile'ex! ¡Tzele'ex tin táan a loobile'ex! ¡P'ate'ex a beetique'ex ba'axo'ob kaastac!

¹⁷¡Cane'ex a beete'ex ba'ax utz, dzáa a wóole'ex a beete'ex ba'ax tu beel, dza'ex áantaj ti' máax yedza'ano', táan óolte'ex u beeta'al ba'ax tu beel ti' j ma' taata, áante'ex le x quimen íichamo'!

¹⁸Yuumtzile' cu ya'alic: Co'otene'ex ca c ila'a' buca'aj a p'aaxe'ex. Quex tumen sen chac jope'en a kebane'exe', tene' bíin in p'a'at sen sac bey ye'ebe'; quex wa je'el bix nook chac bona'ane', bíin in p'at sen sac bey piidze'.

¹⁹Wa ca wóoltique'ex a wu'uye'ex t'aane', bíin a jaante'ex u asab ma'alobil ba'ax cu dzáic lu'um;

²⁰ba'ale' wa ca pechicaba'ex ti' ko'oxil j ma' u'uyaj t'aane'exe', ma' bíin a jeche'ex le quíimil te j ba'atelo'. Jach Yuumtzil a'almail.

²¹¡X pak keban caaj dzo'oc a chuquic béeytal jach je'el bix jun túul x cáacbache'! Ca'ache' tuláacal a cajnáalilo'ob cu beetic ba'ax tu beel no'oja'an xan u cuxtalo'ob ca'achi, ba'ale' bejela'e', dzo'oc u láaj suuto'ob quíimsaj wíinico'ob.

²²Beyech plata ca'ache', ba'ale' bejela'e', dzo'oc a suut u ta' míise', beyech ma'alob vino ca'ache', ba'ale' bejela'e', dzo'oc a suut ja'il.

²³A j méektáano'obe', u yéet bisajbáa j oocolo'ob. Tuláacalo'ob cu cha'ico'ob u ma'analo'ob cu caxtico'ob xan bix u dza'abal siibalo'ob ti'ob. Ma' tu beetico'ob p'is óol tu beel ti' le j ma' yuumo', ba'ax u ka'aj ti'ob ba'ax cu najmatic le x quimen íichamo'obo'.

²⁴Le t o'olale', u Yuumil tuláacal páajtalil u mu'uka'anil Israele', cu ya'alic tu jaajil: ¡Way cu náacal tuláacal ba'ale'! Tene' bíin in dzáa u bo'olal in aj p'eeco'ob. Bíin in sut u jeel u meyaj kaaso'ob.

²⁵Bin in ca'aj in líikes in kab ti' teech u ti'al in tóoquic a ta' míisil; bin in ca'aj in lukes tuláacal a kaasil.

²⁶Bíin in dzáa tu ca'a téen u aj p'is óolo'ob a caajale'ex je'el bix ca'ache', bey xan u aj tzol xiquino'ob je'el bix ca j chu'unpaje'. Le quéen dzo'ococ in beetic beyo', bíin ca'a a'ala'ac ti' teech: U caajil ti'ibil cuxtal, aj ocsaj óol caaj.

²⁷Bíin in jáalkabt u cajnáalilo'ob Sión yéetel in ti'ibil bejil bey xan yéetel in tocsajil u ti'al ca suunaco'ob ti' teen.

²⁸Ba'ale', bíin in xe'exe'et' le ko'oxo'ob j ma' u'uyaj t'aano'ob yéetel aj kebano'ob, máaxo'ob bíin xúun p'atiquene' bíin quíimico'ob.

²⁹Bíin sublacchajaque'ex ti' le béeco'ob yéetel ti' u x péet pachil nicte'ob le sen utz ta wiche'ex ca'acho' le tu'ux ca kultaje'ex le beetbil kuobo'.

³⁰Te'exe', beye'ex u le'ob béeco'ob dzo'oc u sen chuchultalo'obe', beye'ex u x péet pachil nicte'ob ma' teech u jóoyabta'alo'obe'.

³¹Le máac mu'uka'ane' bíin p'áatac bey sojole', u meyajo'obe', bíin p'áatac bey u yaach káake': tu ca'a p'éelal bíin eleco'ob jun páaquili', ma' bíin yanac máax tupiqui'.