Read Yucateco Isaías 10 Bible Online

Isaías 10 - Yucateco bible

Isaías 10

¹¡Yaj a wanile'ex, máaxe'ex ca dzáique'ex a'almaj t'aano'ob ma' no'oja'antaco'obi' ca ka'aytique'ex xan ca'anbesajo'ob ma' kambe'eno'obi',

²ma' ta beetique'ex ba'ax tu beel ti' máaxo'ob luba'an u muuko'ob, mix tu ya'alico'ob ba'axo'ob cu najmatico'ob u yóotzililo'ob in caajal, máaxe'ex ca wocoltique'ex le x quimen íichamo'obo' ca wocoltique'exo'ob le j ma' taataob!

³¿Ba'ax bíin a beete'ex le quéen yanac a wa'alique'ex ba'ax ta beetaje'ex, le quéen a wile'ex náachil u taal le jaadzo'? ¿Ti' máax bíin a káate'ex áantaj? ¿Tu'ux bíin a p'ate'ex a ayikale'ex?

⁴Wa ma' tu pa'ajal a subtale'ex wa ma' ta bisa'ale'ex kalbile', bíin lúubuque'ex pa'ate' yéetel le máaxo'ob bíin quíimsa'aco'obo'. Ba'ale', u p'ujulil Yuumtzile' ma' ch'éenequi'; láili' xi'ic u bin u ya'alic bíin jaadznaque'.

⁵¡U ajawil Asiriae'! Leti' u che'il in jaadz quéen p'u'ujuquen, u ch'ilibil in jaadz quéen p'u'ujuquen.

⁶Quin túuxtic u ba'atelt in j ma' ocsaj óol caaj, jun p'éel múuch' caajo'ob cu pajic in subtal, u ti'al ca u láaj ocolt yéetel u láaj toc u ayikalilo'ob, u ti'al xan ca u xanabcha'ate je'el bix u xanabcha'ata'al luuk ti' bejo'obe'.

⁷Ba'ale' u ajawil Asiriae', ma' tu tucultic wa bey u yúuchulo', mix xan leti' cu tucultic u beete. Leti'e' chéen taac u xu'ulsic ya'ab múuch' caajo'ob.

⁸Leti'e' cu ya'alic: Tuláacal le ajawo'obo', in aj meyajo'ob yano'ob yáanal in kab.

⁹In ti'al tene', mina'an u jela'anil u caajilo'ob Calno, Carquemis, Hamat bey xan Arfad, Samaria bey xan Damasco.

¹⁰Dzo'oc in nuptáantic múuch' caajo'ob sen ya'ab u kuob, asab ya'ab u beetbil kuob ti' kuilo'ob Jerusalén yéetel Samaria.

¹¹Bey túuno', le ba'ax tin beetaj ti' Samaria yéetel u kuobo', ¿ma' wa tu páajtal xan in beetic ti' Jerusalén yéetel u kuob?

¹²Le quéen dzo'ococ u beetic Yuumtzil le ba'ax yaan u beet tu pu'uquil Sión yéetel Jerusalene', bíin u jadz u ajawil Asiria tu yo'olal le ba'ax tu beetaj yéetel u ca'anal ichilo', bey xan tu yo'olal cu yu'ubicubáa noj ba'alil.

¹³U ajawil Asiriae', dzo'oc u ya'alic: Le ba'ala' tin beetaj yéetel in muuk; tene' sen yaan in na'at u ti'al in beetic u kax tuuculilo'ob. Tene' dzo'oc in kexic u xu'ukilo'ob u jol ch'aaquilo'ob le múuch' caajo'obo', dzo'oc in toquic u ayikalilo'ob, bey tumen xiixib máaqueno', dzo'oc in pa'ic u muuk u ajawilo'ob.

¹⁴Dzo'oc in ch'a'ic u ayikalil le caajo'obo' dzo'oc in láaj toquic u lu'umilo'ob u yóokolcaab je'el bix u ch'a'abal je'ob ti' jun p'éel ku' xúunp'atta'ane', ma' yanchaj ba'ax péecsic u xiiki', ma' yanchaj mix ba'al je'ic u chi' u ti'al u yokoli'.

¹⁵Ba'ale', ¿je'el wa u páajtal u yu'ubicubáa asab nojoch le báat ti' máax cu ch'aac yéetele'? ¿je'el wa u yu'ubicubáa asab nojoch ti' máax beete? ¡Óoli' bey le xóolte'o' chéen che', ca u tucultic leti' beetic u xíimbal le máax machmail u ti'al u xíimbalo'!

¹⁶Le t o'olale', Yuumtzil u yuumil tuláacal páajtalile', bíin u p'at x ma' muukil le máaxo'ob sen mu'uka'ano'obo', bíin u beet u yelel u wíinclilo'ob yéetel noj chocwil.

¹⁷Quili'ich Ku u sáasil Israele', bíin u sutubáa káakil, chéen jun p'éel kiin bíin u láaj tóoc u ki'ixilo'ob yéetel u poc che'ilo'ob tuláacal le múuch'ul le caajo'obo'.

¹⁸Bíin u jach xu'uls tuláacal u qui'ichquelmil u káaxilo'ob yéetel u péet u paachilo'ob u pakalilo'ob. Bíin u láaj p'at bey jun túul koja'an mina'an u muuke'.

¹⁹Jach chéen jun p'íit che'ob bíin p'áatac j káax, je'el u páajtal u xo'ocol tac tumen jun túul chaan pale'.

²⁰Ti' túun le kiino', le dze'edzec máaxo'ob j p'áato'ob Israele', le dze'edzec ti' u caajil Jacob tu jecho'ob le quíimilo', ma' bíin u ca'a ocsaj óolto'ob máax xu'ulso'obi', ba'ale', bíin u yoques u yóolo'ob tu jaajil ti' Yuumtzil u Quili'ich Ku Israel.

²¹Dze'edzec ti' u caajil Israele' bíin suunac ti' u Ku Israel tumen mix máac pa'ic u muuk.

²²Israel, quex tumen sen ya'ab u cajnáalilo'ob a caajal je'el bix u sa'am lu'umil le ka'anabo', chéen dze'edzec bíin suunaqui'. Le xu'ulsajo' yaan u yúuchul, bíin beeta'ac jun p'éel chuca'an p'is óol.

²³Tumen Yuumtzil u yuumil tuláacal páajtalile', dzo'oc u tucultic u beetic jáaycabal bíin u ca'aj u beet bey ti' tuláacal le múuch' caajo'obo'.

²⁴Yuumtzil u yuumil tuláacal páajtalile' cu ya'alic: In caajal, cajnáalech tu caajil Sión, ma' a ch'a'ique'ex sajaquil ti' le j asiriobo', quex u jadzech yéetel u p'isib che', quex ca u líikes u xóolte' ta wóokol je'el bix tu beetilac le j egipcioilo'obo'.

²⁵Tumen chéen ichil jun p'íit kiin bíin úuchuc jaadz, bíin xu'ulsa'ac tumen in p'uja'anil.

²⁶Yuumtzil u yuumil tuláacal páajtal bíin jadzico'ob je'el bix le kiinac tu pa'aj u muuk Madián Orebe', bíin u ye'es u páajtalil ti' Asiria je'el bix tu ye'esajilac ti' Egiptoe'.

²⁷Ti' le kiino', bíin lukesa'ac le cuuch dza'an ta wóokolo', bíin luksa'ac ta wóokol le sen aal meyaj dza'an ta wóokolo'. Le j ch'a'a caajo', ti' cu taal Rimone',

²⁸táan u kuchul Ajat, cu ch'aacat Migrón, cu p'atic u cuuch Micmas,

²⁹cu ch'actic u máanbalil le j mu'uka'an áalcab ja'o', cu je'elel Geba; Ramae', cu chu'upul yéetel sajaquil, Gabaa u ti'al Saule' cu púudzul.

³⁰¡Cu tataj awat Bat-galim! ¡Cu yu'uba'alo'ob tumen Laisa! ¡Cu núuca'al ti'ob tumen Anatot!

³¹Madmenae' cu púudzul, u cajnáalilo'ob Gebime' cu ta'acbesicuba'ob.

³²Bejela'e', cu je'elel le j ch'a'a caaj tu lu'umil Nob; cu dzáic u chíiculal u ti'al u pulicubáa j ba'atel tu witzil Sión, tu jo'ol lu'umil Jerusalén.

³³Il a wile'ex, Yuumtzil u yuumil tuláacal páajtalile', cu lúubsic le che'ob yéetel u sajbe'entzil muuko'; le asab ca'analo'obo' cu ch'a'acalo'ob u ti'al ca lúubco'ob. Le asab ca'analo'obo', cu bino'ob j lu'um.

³⁴Yéetel u báat cu lúubsic u che'ilo'ob le káax jach cocojqui yanil u che'ilo'obo', cu lúubsic u asab jadzutz che'ilo'ob Líbano.