Read Yucateco Isaías 11 Bible Online

Isaías 11 - Yucateco bible

Isaías 11

¹Ti' u chuun caaj cu kaaba'intic Isaío', cu jóokol jun p'éel ku'uk; jun p'éel ku'uk cu tóop'ol tu mootz.

²U pixan Yuumtzile', ti' bíin yanac mantadz tu yóokole', u ti'al ca u dzáa ti'e', na'atil, sáasil tuucul, ojéelajil, na'atil, ma'alob tuucul, muuk, kaj óolal yéetel u sajbe'entzil Yuumtzil.

³Ma' bíin p'is óolnac chéen tu yo'olal ba'ax cu tzicbalta'ali', ma' bíin xot kiinac chéen tu yo'olal x mucul t'aano'obi

⁴Bíin toj p'is óolnac u ti'al le j ma' óolo'obo', bíin u canant ca dzabac ba'axo'ob cu najmatico'ob u yóotzililo'ob le múuch' caajo'obo'. U t'aano'obe', bíin béeyac u che'il u ja'adzal le loolob máaco'obo', yéetel u táaj ustaje' bíin u beet u quíimil le loolob máac.

⁵Mantadz bíin u beet ba'ax toj yéetel jaaj.

⁶Bey túuno', lobo yéetel j tamane', bíin bisajuba'ob, J chac mo'ol yéetel chan j yuuque', bíin múul je'eleco'ob, chan wacax yéetel leóne', bíin nuucchajco'ob pa'ate' bíin u cha'ob u bisa'alo'ob tumen jun túul chan j xi'ipal.

⁷X wacax yéetel x osae', bíin u bisuba'ob, u mejenilo'obe', bíin múul je'eleco'ob. Leóne', bíin u jaant xíiw je'el bix wacaxe'.

⁸Le chaan palo', bíin páatchajac u báaxal tu jool chac kóokob, bíin u yoques u kab ichil u ku' caan.

⁹Mix máac bíin yanac u ti'al u beet loob tin quili'ich jo'ol lu'um, tumen je'el bix u chu'upul le ka'anab yéetel le ja'o', bey bíin chu'upuc le múuch' caajo'ob yéetel u kaj óolal Yuumtzil.

¹⁰Ti' le kiino', u ku'uk u mootz Isaío', bíin líikic bey jun p'éel chíicul u ti'al tuláacal caajo'ob; bíin xi'ic caxantbil tumen tuláacal múuch' caajo'ob, le cúuchil tu'ux bíin yanaque', bíin nojbe'enchajac.

¹¹Ti' le kiino', Yuumtzile' bíin u ca'a e'es u páajtalil, bíin u beet u ca'a ocsaj óolta'al tumen u caajal u ti'al u lukulo'ob Asiria, Egipto, Patros, Etiopía, Elam, Sinar, Hamat, yéetel u múuch' caajilo'ob ka'anab.

¹²Bíin u líikes jun p'éel chíicul u ti'al múuch' caajo'ob, bíin ca'aj much'quint le j israelitaob j bisa'abo'ob ca'acho', bíin u láaj much'quinto'ob tu can ti'itzil lu'um, tuláacal u cajnáalilo'ob Judá ki'itpaja'ano'ob ca'acho'.

¹³U sawinaj Efraine', bíin xu'uluc, bíin xan jáawac u p'ectaj Judá, Efraine', ma' bíin u dzíibolt ba'ax yaan ti' Judai', Judae', ma' bíin u ch'a'a p'ect Efraini'.

¹⁴Bíin u much'uba'ob u ti'al u ba'atelto'ob le j filisteobo', bíin u ba'atelto'ob cúulpach; tu ca'a túulalo'ob bíin toquic u ayikalilo'ob u ch'i'ibalilo'ob j lakin. U páajtalile', bíin kuchuc tac Edom yéetel Moab, bíin u t'onquinto'ob le j amonitaobo'.

¹⁵Yuumtzil bíin je'ic ti'ob jun p'éel bej ichil le chac ka'anabo', bíin u tich' u kab tu yóokol u yáalcab ja'il Éufrates, bíin u beet u pictaj jun p'éel sajbe'entzil iik u ti'al u jatz siete u beel ja'ilo'ob, tu yo'olal u páajtal u ch'actico'ob x ma' xanabil.

¹⁶Le quéen jóokoc tu lu'umil Asiria u yalab le caaj u ti'al u suutbalo', bíin suunac ti' jun p'éel cóococh bej je'el bix le ca jóok Israel Egiptoe'.