Read Yucateco Isaías 13 Bible Online

Isaías 13 - Yucateco bible

Isaías 13

¹U bóobat t'aanilo'ob u xot kinta'al Babilonia, je'el bix e'esa'abic ti' Isaías, u paal Amoze':

²¡Tiche'ex ca'anal u chíicul ba'atel ti' jun p'éel pu'uc jáanil! ¡A'ale'ex ti' le aj ba'atelo'obo' ca ba'atelnaco'ob! ¡Tich'e'ex ca'anal a kabe'ex u ti'al ca xi'ico'ob tu tojil u jool yotocho'ob le dzuulo'obo'!

³Dzo'oc in t'anic in aj ba'atelo'ob xiixib máaco'ob, dzo'oc in wa'alic ti' in aj ba'atelo'ob jun páycunta'ano'ob, ti' máaxo'ob cu qui'imacchajal u yóolo'ob, tumen quin pa'a muuk, u ti'al u dzáico'ob le jaadz quin túuchi'itico'.

⁴Cu yu'uba'al awato'ob te j pu'uco', je'el bix u yawat ya'abcach máaco'obe'. Cu yu'uba'al u juum múuch' caajo'obo', yéetel le caajo'ob u much'majuba'obo'. Yuumtzil u yuumil tuláacal páajtalile', cu xoquic u kaaba'ob u múuch'ul u aj ba'atelo'ob u nu'ucbesmajuba'ob u ti'al ba'atel.

⁵Ti' náanach lu'umo'ob u taalo'ob, ti' lu'umo'ob asab náach ti' chuun ca'an. Yuumtzil yéetel u nu'uculo'ob u jaadze', táan u taal u xu'uls tuláacal yóokolcaab.

⁶Ka'amcach awatnene'ex tumen nadza'an u kiinil u taal Yuumtzil, táan u kuchul bey u jaadz u yuumil tuláacal páajtalile'.

⁷Tuláacal wíinic bíin chojkalac u kab, tuláacal máax bíin u cha'a' sajaquil,

⁸bíin p'áataco'ob táan u quiquilanquilo'ob. Bíin taalac ti'ob jun p'éel okom óolal yéetel jun p'éel nojoch mukyaj tu yo'olal lelo' bíin ch'o'ocho'tuba'ob bey co'olel cu síijsaje'. Bíin u paaclan pactuba'ob jaka'an u yóolo'ob, yaan u sen sublactalo'ob.

⁹Taan u kuchul u kiinil u taal Yuumtzil, jun p'éel u sajbe'en kiinil kuuxil yéetel p'uja'anil, bíin u sut x tocoyil lu'umil yóokolcaab, bíin u láaj míist u aj kebanilo'ob.

¹⁰U eekilo'ob yéetel u múuch'ul u eekilo'ob ca'ane', bíin ch'éenec u dzico'ob sáasil; le kiino' bíin éekjoch'e'enchajac chéen p'éel u jóokol, le lunao', ma' bíin jóopbalnaqui'.

¹¹Yuumtzile', cu ya'alic: Bin in ca'aj in jadz u cajnáalilo'ob u yóokolcaab tu yo'olal u kasa'anilo'ob, bin in ca'aj in jadz le loolob máaco'ob tu yo'olal u quíimsaj wíiniquilo'ob. Bin in ca'aj in lukes u noj ba'alil le j ca'anal icho'obo', bin in ca'aj in paj u subtal le nonojbáilo'obo', le j ma' subtalo'obo'.

¹²Bin in ca'aj in beet ca jun p'íitchajaco'ob j xiibo'ob je'el bix jun p'íitil u ma'alobil u oroil Ofir.

¹³Bey túuno', bíin quíilbanac le ca'ano' bíin xan péecnac tu cúuchil le lu'umo' tu yo'olal le p'uja'anil bíin yanac ti' teen ti' le kiino', tumen yaan u t'a'abal in p'uja'anil.

¹⁴Wíinique', bíin áalcabnac bey quéej ch'a'apachta'ane', wa bey u múuch'ul j tamano'ob ki'itpaja'ano'ob mina'an máax much'quintico'obe'. Tu jujun túulilo'ob bíin suunaco'ob tu múuch' caajalo'ob, bíin púudzuco'ob u ti'al u suuto'ob tu lu'umo'ob.

¹⁵Tuláacal máac cu cha'ic u nuptáanta'ale', bíin lo'oloma'ac, tuláacal máax cu cha'ic u ma'achale' bíin quíimsa'ac.

¹⁶Tu táan yicho'ob bíin jéen p'uch'ta'ac j lu'um u mejen paalalo'ob; bíin láaj ocolta'ac u ayikalilo'ob u yotocho'ob, yéetel bíin beeta'ac óolal ti' u yatano'ob.

¹⁷Bin in ca'aj in beet u bin ba'ateltbilo'ob tumen le j medobo', leti'obe' ma' tu dzáicuba'ob u caxto'ob taakin, mix tu dzíiboltico'ob oro.

¹⁸Yéetel u x julubo'obe' bíin u Quíimso'ob j táanquelem paalal. Ma'atech u ch'a'ico'ob óotzil ti' mejen paalal táant u síijilo'obe', mix tu yaj óoltico'ob u beetico'ob loob ti' mejen paalal.

¹⁹Babilonia u jadzutz co'ocoj uujilo'ob múuch' caajo'ob, u qui'ichquelmil yéetel u ca'anal ichil le j caldeobo', bíin p'áatac bey Sodoma yéetel Gomorra le ca tin tóocajo'obe'.

²⁰Mix bikin bíin ca'a cáajbesa'ac, mix máac bíin cajlac tu ca'a téeni'. Le j arabeobo', ma' bíin ca je'eleco'ob ichil tu ca'a téeni', mix le aj canan j tamano'ob bíin u biso'ob janal u yalak ba'alche'obi'.

²¹Bíin cajlac ch'omaco'ob ichil, xooch'o'ob bíin chupic u najilo'ob, avestruzo'ob bíin cajlaco'obi' bey xan bíin síit'nac j yuuco'obi'.

²²U peekilo'ob káax bíin wowo' chi'ibanac tu tuulumilo'ob, yéetel tu qui'ichquelem jalach najilo'ob bíin cajlac ya'abcach loboi. Táan u náadzal u kiinil ti' Babilonia; ma' ya'ab u kiinilo'ob p'aatali'.