Read Yucateco Isaías 14 Bible Online

Isaías 14 - Yucateco bible

Isaías 14

¹Yuumtzile' bíin u ch'a'a óotzilil ti' Jacob. Bíin ca'a p'áatac u yéeymaj Israel, bíin u beet u ca'a suut le j israelitaob tu lu'umo'obo'. Le j táanxel lu'umilo'obo', bíin u nadzuba'ob ti'ob, bíin u nupuba'ob tu yéetel u caajil Jacob.

²Ya'ab múuch' caajo'ob bíin jóokoc ch'a'ic u beel le j israelitaob u ti'al u láakintico'ob tac u kuchbalo'ob tu lu'umo'obo', le j israelitaobo', bíin u ch'a'ob u ti'al u palitzilo'ob tu lu'um Yuumtzil. Le j israelitaobo', bíin u macho'ob u kalo'ob le máaxo'ob kalmailo'ob ca'ache', bíin u t'onquinto'ob máaxo'ob yedzmailo'ob ca'ache'.

³U caajil Israel, le quéen u beet Yuumtzil u xu'ulul a mukyajtic a okom óolal úuchic a yaayaj palitzilta'ale',

⁴bíin a wa'al le kay t'aana', u ti'al a p'a'astic u ajawil Babilonia: ¡Il a wile'ex bix u dzo'ocol le j loolob méektáano'! ¡Il a wile'ex bix u dzo'ocol u nonojbáil!

⁵Yuumtzile', dzo'oc u lukesic u páajtalil le j loolob wíinico', dzo'oc u ca'acachic u che'il u ajawil le j loolob méektáano'

⁶cu jadzic ca'ach le múuch' caajo'ob yéetel u p'uja'anil, cu jadzico'ob ca'ach x ma' je'elel, cu pe'echaktic caajo'ob ca'ach yéetel u p'uja'anil, cu ch'a'apachtico'ob ca'ach yéetel x ma' óotzilil.

⁷Tuláacal yóokolcaab yaan jéedzel ti', táan u yawat yéetel qui'imac óolal.

⁸Tac u sac che'ilo'ob yéetel u kuulche'ilo'ob Líbano bíin qui'imacchajac u yóolo'ob ti' a xu'ulsajil u ti'al ca u ya'alo'ob: Líikbal ti' le kiin j lúubeche', mix máac taalac tu ca'a téen u ti'al u ch'aco'on.

⁹Tac le quimeno'ob te caabalo', seten taac u jóokol u ch'a'ob a beel. U yoochelo'ob le quimeno'obo' táan u péeco'ob, cu jóokol nuptáantbil tumen tuláacal u nuuquilo'ob lu'ume' cu jóokolo'ob u ch'a'ob a beel; tuláacal u ajawilo'ob lu'ume' cu líikilo'ob tu jalach káanche'ob.

¹⁰Tuláacalo'ob cu t'aano'ob u ti'al u ya'alico'ob: Teche' dzo'oc xan u lúubul a muuk, dzo'oc a p'áatal je'el bixo'one'.

¹¹Way cu taal j xu'ulul a j ca'anal ichile', bey xan a paaxo'ob yéetel a cítaraob. A kaane', j tu'utu' ba'al, a teep'o'obe' x nookolo'ob.

¹²¡Bix úuchic a pitchajal te j ca'ano' u eekil u sáastal! Teech ca pa'ic ca'ach u muuk múuch' caajo'obe', j lúubsa'abech tac j lu'um.

¹³Ca tucultic ca'ach ta baatzil: Bin in ca'aj na'acal tac j ca'an; bin in ca'aj in dzáa in jalach káanche' tu yóokol u eeko'ob Kuo'; bin in ca'aj j cutal tu sen náachil j xaman, tu pu'uquil tu'ux cu much'icuba'ob kuob.

¹⁴Bíin in táadz máans u asab ca'analil múuyalo'ob; bíin béeychajquen je'el bix le Aj ca'anilo'.

¹⁵¡Ba'ale' tu jaajile', dzo'oc a wéemel tu ajawil quíimil, tu asab taamil u dzu' lu'um!

¹⁶Máaxo'ob iliqueche', cu sen pactiquecho'ob, le quéen u kaj óoltecho'obe' cu ya'alico'ob: ¿Leti' wa le wíinic beetic ca'ach u quíilbal lu'uma', cu xu'ulsic ca'ach múuch' caajo'ob,

¹⁷tu p'ataj x tocoy lu'umil yóokolcaab, cu xiixcuntic ca'ach caajo'ob ma' xan tu jáalkabtic máaxo'ob kala'ano'ob?

¹⁸Tuláacal u ajawilo'ob múuch' caajo'obe', cu je'elsicuba'ob yéetel tziiquil tu jujun túulilo'ob tu mucnalo'ob;

¹⁹ba'ale' teche' ca pu'ulul náach ti' mucnal bey u pu'ulul ta' míis cu taacsic xeje', bey u wíinclil quimen xanabcha'ata'ane', ichil wíinico'ob cu quíimsa'alo'ob, kupa'an u caalo'obe', pula'ano'ob ti' taamtam lu'um chupa'an tu yéetel tuunicho'obe'.

²⁰Ma' bíin dza'abaquech ta mucnal je'el bix u dza'abal tu mucnal u láak ajawo'obe'. Tumen ta wóotzilcuntaj a múuch' caajalo'ob yéetel ta quíimsaj u cajnáalilo'ob a caajal. U ch'i'ibal loolob wíinico'obe', ma' bíin xaanaqui'.

²¹Nu'ucbesaba'ex u ti'al a quíimse'ex paalalo'ob tu yo'olal le quíimsajo'ob tu beetaj u taataobo', u ti'al u jáawal u tucultico'ob u t'onquintico'ob u cajnáalilo'ob lu'um mix u chupico'ob yóokolcaab yéetel caajo'ob.

²²Yuumtzil u yuumil tuláacal páajtalile', cu ya'alic: Bin in ca'aj in ba'atelto'ob, bin in ca'aj in xu'uls u kaaba' Babilonia pa'ate' yéetel tuláacal máaxo'ob cajacbalo'obi', bey xan u paalalo'ob yéetel u yáabilo'ob.

²³Bíin in suut dzaadzil, bey cúuchil tu'ux táaj yaan xooch'o'obe'. Bíin in míist yéetel u míisil xu'ulsaj. Yuumtzil u yuumil tuláacal páajtalil a'alic.

²⁴Yuumtzil u yuumil tuláacal páajtalile', dzo'oc u jalach t'antic: Le ba'ax dzo'oc in wa'alique', bíin úuchuc; le ba'ax dzo'oc in tucultique' bíin béeychajac.

²⁵U caajil Asiriae' bíin in xu'uls tin lu'um, bíin in xanabcha'ato'ob tin pu'uquilo'ob. Bíin jáawac u palitziltico'ob in caajal, ma' bíin in mukyajt u loolob méektáano'obi'.

²⁶Je'el ba'ax dzo'oc in tucultic in beetic ti' tuláacal u yóokolcaaba'. In kabe' táan u sajbe'encuntic tuláacal múuch' caajo'ob.

²⁷Yuumtzil u yuumil tuláacal páajtalile' dzo'oc u ya'alic u beetic. mix máac bíin páatac u wet'ic ti'. U kabe' táan u ye'esic je'el u jaadze', mix máac bíin beetic u kexpajal u tuucul.

²⁸Tu ja'abil úuchic u quíimil ajaw Acaz, Isaíase', tu ya'alaj le bóobat t'aana':

²⁹U múuch' caajilo'ob filistea, ma' u qui'imacchajal a wóol tu yo'olal dzo'oc u ca'achal u che'il iquil a ja'adzal ca'achi, tumen tu'ux jóok jun túul j chi'ibal caan, u yajile', bíin jóokoc jun túul ku'ukil caan cu xiknal.

³⁰Tin káaxo'obe', bíin yanac xíiwo'ob u ti'al u tzéentico'ob u yalak ba'alche'ob le óotzilo'obo', le máaxo'ob mina'an ba'ax u cuxtalo'obe', ma' bíin u ch'a'ob saajquili'. Ba'ale' tene', bíin in beet u quíimil a caajal yéetel wi'ij, bíin in quíims le dze'edzec p'aatalo'.

³¹¡Okolnaque'ex u caajile'ex filistea, awatnene'ex tu yo'olal ki'ina'amil, quiquilnaque'ex tu yo'olal jak óolal! Tumen j xaman táan u taal jun múuch' aj ba'atelo'ob bey u cúulul buudze'; mix jun túul u aj ba'atelilo'ob bíin tzéelec ti' u t'o'ol xíimbalo'ob.

³²¿Ba'ax je'el u páajtal u núuca'al ti' u aj túuchi' t'aano'ob le caajo'? Yuumtzile' dzo'oc u dzáic jéedzel ti' Sión, u okom óolalilo'ob u caajale', bíin u ta'acbesjuba'ob' te'elo'.