Read Yucateco Isaías 15 Bible Online

Isaías 15 - Yucateco bible

Isaías 15

¹U bóobat t'aanil ba'ax bíin úuchuc ti' Moab: Tu áakabil úuchic u xu'ulsa'al Are', je'enkesa'ab u caajil Moab; tu áakabil ca je'en u caajil Kire', j mix ba'alcunta'ab Moab.

²U cajnáalilo'ob Dibone', cu bino'ob j okol te j kulnaj yaan tu jo'ol lu'um. Moabe' cu yaj óoltic úuchic u xu'ulsa'al Nebo yéetel Medeba. Tuláacalo'ob u koliscumajo'ob u poolo'ob, u me'exo'ob u dzicmajo'ob.

³Ti' le bejo'obo' wíinico'obe' cu xíimbalo'ob yéetel j to'och búuco'ob; cu yawato'ob tu yo'olal ki'inamil tu táancabil u yotocho'ob. Ti' le kíiwico'obo', tuláacal le caaj cu okom óol yéetel cu yichintico'ob u ja'il u yicho'obo'.

⁴Hesbón yéetel Eleale' táan u káatico'ob áantaj; tac Jahasa cu kuchul u yu'uba'al u yawato'ob. Let o'olal cu lúubul u yóol u aj ba'atelilo'ob Moab yéetel cu sen sajactalo'ob.

⁵In pucsi'ikale' cu káatic áantaj u ti'al Moab; u cajnáalilo'obe' cu bin u púudzulo'ob tac Soar, tac Eglad-selisiya. Táan u yokolo'ob cu na'acalo'ob tu níixil Luhit; cu yawat okolo'ob tu bejil Horonaim tu yo'ola'al u nojyajilo'ob.

⁶U ch'e'enilo'ob Nimrime' dzo'oc u sa'ap'al u ja'ilo'ob, dzo'oc chuchultal xíiwo'ob, dzo'oc u láaj quíimil u che'ilo'ob káax, mina'an mix jun p'éel u ya'axil u le' che'.

⁷Le t o'olale' le máaco'obo' cu molico'ob u ayikalilo'obe', cu bisico'ob tu náachil u mejen áalcab ja'ilo'ob cóopobo'ob.

⁸U yawatil le káat áantajo' cu lóochol tu xuulilo'ob u lu'umil Moab; okolo'obe' cu kuchul tac Eglaim.

⁹Quex chuup yéetel ki'ik u ch'e'enilo'ob Dimone', bíin in túuchi'it u láak asab nucuch loobo'ob tu yóokol; jun túul león bíin jaantic le máaxo'ob bíin u jecho'ob le quíimil tu caajil Moabe', máaxo'ob bíin p'áataco'ob cuxa'ano'ob.