Read Yucateco Isaías 17 Bible Online

Isaías 17 - Yucateco bible

Isaías 17

¹U bóobatil ba'ax bíin úuchuc ti' Damasco. Damascoe' bíin jáawac u beetic u nojoch caajil; bíin p'áatac chéen jun tucub jeenel caaj.

²Bíin xúunp'atta'ac jun puli', u ti'al u jóokol xíiwo'obi'; ba'alche'ob bíin janaco'ob ichil x ma' sajaquilil.

³Efraine', leti' u muuk Israel, ma' bíin yanac u tuulum caajili'; bey yanil xan Damasco, leti' p'áatal ti' Siria, bíin p'áatac x ma' ajawil. Lelo' Yuumtzil u yuumil tuláacal páajtalil a'alic.

⁴Ti' le kiino', Samaria u mu'uka'an Caajil Israele', bíin mina'anchajac u muuk, bíin xu'upuc xan u ayikalil.

⁵Bíin p'áatac bey máax cu bin jooch, mina'an ba'ax u jooche', wa je'el bix u mo'olol le jocho'ob tu táax koomil Refaim,

⁶tu'ux yaan chéen dze'edzec meendzul tuba'an u ch'a'abale'; wa je'el bix u tíita'al jun cúul olivo chéen ca'a p'éel wa óox p'éel u yicho'ob p'áatal tu asab ca'analil u kabo'obe', u jach sen ya'abil wa yaan u yicho'ob p'aatale', min can p'éel wa cinco u p'éelal ti' tuláacal u kabo'ob. Lelo' Yuumtzil u Kuil Israel a'alic.

⁷Ti' le kiino', wíinique' bíin u caxant Ku u Quili'ichil Israel, máax beete.

⁸Ma' bíin suunaquech a ca'a sut a paacat ti' u multuunil kultajo'ob, yéetel ba'axo'ob beeta'ano'ob tumen wíinico'obi'. Ma' bíin ca'a suunaco'ob tu yicnal quili'ich chuun che'ob yéetel ti' u multuunil kultajo'ob tu'ux cu tóoca'al poom ti' le kuobo'.

⁹Ti' le kiino' a tuulum caajo'obe', bíin xúunp'atta'aco'ob, je'el bix úuchic u xúunp'atta'al u caajil le j heveob yéetel le j amorreob tumen tu ch'a'ajo'ob sajaquil ti' le j israelitaobo'. Bíin suunac x tocoy lu'umilo'ob,

¹⁰tumen ta tu'ubsaj le Ku máax toquecho', ma' j ka'aj ti' teech wa leti' u jaajil a ta'acbesajili'. Teche' ca meyajtic ca'ach u x péet pachil jadzutz nicte'ob, ca beetic a pakal tu kaaba' jun túul u kuil j táanxel lu'umil,

¹¹ca canantico'ob tu kiinil ca xabico'ob, ca beetic u jóokolo'ob tu láak kiin. Ba'ale' le quéen taalac koja'anil yéetel loobe' mina'an dzaac u ti'alo', ma' bíin yanac joochi'.

¹²¡U'uye'ex u juum le ya'abcach caajo'obo', bey u juum ka'anabe'! Lelo' leti' le juum cu beetic múuch' caajo'ob bey je'el bix u juum ka'amcach ja'obe'.

¹³Ba'ale' le quéen ke'eyeco'ob tumen Kue', cu púudzulo'ob náach, je'el bix u bisa'al sojol te j káaxo'obo', wa je'el bix j múul cu bisa'al tumen chac ikale'.

¹⁴Ocnaj kiine', dzíidzic ba'alo'ob, ba'ale' ma'ili' sáasaque' cu quíimilo'ob. Bey u dzo'ocolo'ob máaxo'ob ocoltico'ono', bey u dzo'ocolo'ob máaxo'ob óotzilcuntico'ono'.