Read Yucateco Isaías 18 Bible Online

Isaías 18 - Yucateco bible

Isaías 18

¹¡Yaj bíin xi'ic ti' le múuch' caajo'ob tu'ux cu yu'uba'al u juum u yikelo'ob lu'um, ti' le múuch' caajo'ob yano'ob tu xuul u yáalcab ja'il Etiopía

²cu túuchi'itic u aj bisaj t'aano'ob tu yóokol u ja'il Nilo, cu bino'ob tu yóokol ja' ti' cheemo'ob beeta'ano'ob yéetel jalal! Péeca'an aj bisaj t'aane'ex, áalcabnene'ex, xeene'ex ti' jun p'éel caaj, u cajnáalilo'obe' ca'anal u baaquelo'ob cu léembal u yoot'elo'ob, jun p'éel múuch' caaj cu ch'a'abal sajaquil ti' tuláacal tu'ux, jun p'éel caaj mu'uka'an yéetel ca'ana'al u yich cajacbal ti' jun p'éel lu'um bakpachta'an tumen áalcab ja'ob.

³U cajnáalile'ex tuláacal u yóokolcaab, bíin a wile'ex u ti'ich'il ca'anal chíiculal tu yóokol pu'uco' bey xan bíin a wu'uye'ex u juum trompeta.

⁴Yuumtzile' tu ya'alaj ti' teen: Líikbal tu cúuchil tu'ux yanene', ma'alob in wilic bey u sáasilil jun p'éel u kiinil yáax kiin, bey jun p'éel u múuyalil ye'eb tu súutuquil u jach chocoil kiin tu kiinilo'ob jooch.

⁵Quéen dzo'ococ u loolanquil u pakalilo'ob uva, u ti'al u kantal u yich uva j ch'úuy te j lool ca'aliquil ma' kuchuc u kiinil u t'oocoli', bíin ch'a'acac u kabo'ob le uva tu yéetel u nu'uculo'ob ch'aac, bíin ch'a'acaco'ob cu dzo'ocole' cu tzelco'ob te'elo'.

⁶Bíin xúup'attaco'ob te j witzo'ob. u ti'al j ch'oomo'ob yéetel u ti'al dzíidzic ba'alche'ob. Le ch'íicho'obo' bíin p'áataco'ob te'elo' tu kiinilo'ob yáax kiin, tuláacal le dzíidzic ba'alche'obo', bíin p'áataco'ob xan te'elo', u ti'al que'elil.

⁷Ti' le kiino'obo', bíin taasa'ac ti' Yuumtzil u yuumil tuláacal páajtalil u ti'ibil óolo'ob le caaj sen ca'anal u baaquelo'ob yéetel cu léembal u yoot'elo'obo', le caaj sen ch'a'an sajaquil ti' tuláacal tu'uxe', le caaj sen mu'uka'an yéetel ca'ana'al u yich, cajnáal ti' lu'um bakpachta'an tumen áalcab ja'obe'. Bíin taasa'aco'ob tu pu'uquil Sión, tu'ux cu ch'a'a chi'ita'al u kaaba' Yuumtzil u yuumil tuláacal páajtalil.