Read Yucateco Isaías 19 Bible Online

Isaías 19 - Yucateco bible

Isaías 19

¹U bóobatil u xot kinta'al Egipto: Pacte'ex Yuumtzili': Táan u taal tu lu'umil Egipto u nat'maj jun p'éel múuyal séeba'an u taal. u beetbil kuilo'ob Egiptoe', cu quiquilanquilo'ob tu táan, le j egipciobo', cu sen sajactalo'ob.

²Leti'e' cu ya'alic: Bin in ca'aj in beet u jatzicubáa le j egipciob u ti'al u paaclan ba'atelo'ob: jun túul éet bisajbáa yéetel u yéet bisajbáa, jun p'éel caaj yéetel u láak caaj yéetel jun p'éel ajawil yéetel u láak ajawil.

³Bíin in beet u xa'akpajal u tuuculo'ob, bíin in beet u jóokol kaasil u jok tuuculo'ob. Bíin túun káat chi'inaco'ob ti' u beetbil kuob yéetel ti' j wáayo'ob, ti' u pixan quimeno'ob yéetel ti' máaxo'ob cu na'atico'ob ba'axo'ob cu taal u kiinil.

⁴Ba'ale' tene' bíin in beet u méektáanta'al Egipto tumen jun túul dzuul sen kasa'an; jun túul ajaw sen kasa'an bíin méektáantic. Lelo' Yuumtzil u yuumil tuláacal páajtalil a'alic.

⁵U ja'il Niloe' bíin sa'ap'ac, bíin jach tijic le áalcab ja'o',

⁶bíin tu'uchajac u becanilo'ob. u bejilo'ob tu'ux cu yáalcab u ja'ilo'ob Egiptoe' bíin tijic jujun p'íitil tac quéen sa'ap'ac, u sakabilo'ob yéetel u jalalilo'obe' yaan u tijilo'ob;

⁷u cúuchilo'ob le jalalo'ob yaan tu jáal Niloe' p'a'ate' yéetel u pakalilo'ob u jáalilo'obe', bíin tijico'ob tac quéen p'áatac jach mina'amo'ob.

⁸Tuláacal máaxo'ob cu chuc cayo'ob te j Nilo', bíin u dzáuba'ob j áacam táan u yokolo'ob; máaxo'ob cu jayico'ob u nu'ucul u chuc cayo'ob ichil le ja'o', yaan u okom óolta'alo'ob.

⁹Máaxo'ob meyajtic le lino' bíin lúubuc u yóolo'ob; le co'olelo'ob piidzo'ob yéetel le cu jiit'o'obo', bíin sacpile'enchajaco'ob;

¹⁰le máaxo'ob beetico'ob nooko'obe' bíin lúubuc u yóolo'ob, cu dzo'ocole' tuláacal le j meen jadzutz ba'alo'obo', bíin sa'atac u yóolo'ob.

¹¹¡U nuuquile'ex Soán, jach mix ba'al a biilale'ex, u jach ojelo'ob tzol xiquin Egiptoe', tu jaajile' jach j ma' na'ato'ob! ¿Bix táabic u yantal tu tuuculo'ob u ya'alico'ob ti' faraón: U ch'i'ibalo'on aj ojéelajo'on, yéetel ti' u ch'i'ilancabil úuchben ajawo'ob?

¹²¿Faraón tu'ux yaan a aj ojéelajo'ob, u ti'al ca u ca'anbeso'ob yéetel ca u dza'ob u péectzilil ba'axo'ob cu tucultic u beetic tu lu'umil Egipto, Ku u yuumil tuláacal páajtalil?

¹³U nuuquilo'ob Zoane' mix ba'al u biilalo'ob, u nuuquilo'ob Menfise' tu cha'ajo'ob u tu'usulo'ob, u nuuquilo'ob táab caajo'obe' tu cha'ajo'ob u tu'usulo'ob, dzo'oc u bisa'al Egipto ti' yaanal bej.

¹⁴Dzo'oc u dza'abal ti'ob tumen Yuumtzil jun túul u pixanil sat óolal; leti'ob bisic Egipto ti' yaanal bejil ti' tuláacal ba'ax cu beetic, je'el bix jun túul cala'an cu xej yéetel cu tacchalanquile'.

¹⁵Mix ba'al bíin jóokoc utzil ti' Egipto quex beeta'ac tumen u poolil caaj wa u chichanil caaj, wa quex tumen u chuun che'il wa u kab che'il.

¹⁶Ti' le kiino' le j egipciobo', bíin p'áataco'ob bey co'olelo'obe'; bíin sen sajacchajco'ob le quéen u yilo'ob u líikesic u kab Yuumtzil yóokolo'ob.

¹⁷Le j egipciobo', bíin u ch'a'ob sajaquil tu táan Judá; chéen tu yo'olal u ka'ajsico'ob u kaaba', yaan u sen chu'upulo'ob tu yéetel sajaquil tu yo'olal ba'axo'ob cu tucultic u beetic Yuumtzil ti' Egipto.

¹⁸Ti' le kiino' bíin yanac Egipto cinco caajo'ob cu t'aano'ob ich hebreo, bíin u jalach t'anto'ob u meyajtico'ob Yuumtzil u yuumil tuláacal páajtalil yéetel chuca'an óolal. Jun p'éel ti' leti'obe' bíin u kaaba'int u noj Caajil Kiin.

¹⁹Ti' le kiino', bíin yanac jun p'éel u multuunil kultaj jun páaycunta'an tu lu'umil Egipto, cu dzo'ocole' naadz ti' tu'ux cu xu'ulul u lu'umile' bíin líikesa'ac jun p'éel tuunich ti' u nojbe'enil Yuumtzil.

²⁰Bíin meyajnac u ti'al u chíiculal u ka'ajsa'al Yuumtzil u yuumil tuláacal páajtalil, tu lu'umil Egipto. Le quéen úuchuc awat u ti'al u káatco'ob áantaj ti' Yuumtzil tumen táan u ye'edzelo'obe', leti'e' bíin u túuchi'it ti'ob jun túul aj tocsajil u ti'al toquico'ob.

²¹Yuumtzile' yaan u dzicubáa kaj óoltbil tumen le j egipciobo', leti'ob túune', bíin u kububa'ob ti' Yuumtzil, bíin u kulto'ob, bíin u kubo'ob quíimsbil ba'alche'ob yéetel ti'ibil óolo'ob ti'. Bíin u beeto'ob séeb chi'ob ti' Yuumtzil, bíin xan u dzo'ocbeso'ob.

²²Yuumtzile' bíin u loobilt Egipto, ba'ale' cu dzo'ocole' bíin u dzáa u toj óolal. Leti'obe' bíin suunaco'ob ti' Yuumtzil, leti'e' bíin u ch'a'a óotzilil ti'ob u ti'al u dzáic u toj óolal.

²³Ti' le kiino' bíin yanac jun p'éel cóococh bej líikbal Egiptoe' tac Asiria. Le j asiriobo' bíin páatchajac u bino'ob Egipto, le j egipciobo', bíin páatchajac u bino'ob Asiria, beyo' le j egipciob yéetel le j asiriobo', bíin u múul kulto'ob Yuumtzil.

²⁴Ti' le kiino', Israele' yaan u dzáicubáa tu tzéel Egipto yéetel Asiria, bíin p'áatac jun p'éel qui' t'aanil tu chúumuc le lu'umo'.

²⁵Yuumtzil u yuumil tuláacal páajtalil bíin qui' t'antico'ob, ca'aliquil táan u ya'alic: Tene' quin qui' t'antic Egipto in caajal, Asiria u meeyjul in kab yéetel Israel ba'al in ti'al.