Read Yucateco Isaías 2 Bible Online

Isaías 2 - Yucateco bible

Isaías 2

¹Lelo'oba', u bóobat t'aano'ob Isaías u paal Amoz, je'el bix tu kamjilac ti' Yuumtzil u ti'al ca u dzáa ojéeltbil ba'axo'ob cu taal u kiinil ti' Judá yéetel ti' Jerusalén.

²Ti' le kiino'ob cu taalo'obo', bíin ma'alob jéedzec le witz tu'ux yaan u kulnaj Yuumtzil. Leti' bíin asab ca'anal witzac ti' tuláacal witz. Bíin talaco'ob ti' tuláacal múuch' caajo'ob;

³ya'abcach caajo'ob bíin kuchuco'ob xíimbaltic, táan u ya'alico'ob: Co'otene'ex, na'acaco'on tu witz Yuumtzil, tu kulnaj u Ku Jacob, u ti'al ca u ye'es to'on u beelo'ob u ti'al ca c xíimbaltej. Tumen Sión bíin jóokoc u ca'anbesaj Yuumtzil, Jerusalén bíin taalac u t'aan.

⁴Yuumtzil bíin u táan óolt ba'atel tuláacal caajo'ob, leti' bíin a'alic ba'ax caajil si'ipilchaja'an, ba'ax ma'. Leti'obe' bíin u suto'ob u x ca'a mat yej máascabo'obe' u nu'uculil meyaj u lóomte'obe' bíin u suto'ob lóobche'il. Mix jun p'éel caaj bíin u ch'a'a u nu'ucul u ba'atel u ti'al u bin u ba'atelt yaanal caaj, mix bíin kabéetchajac u yúuchul ca'anbesaj u ti'al ba'ateli'.

⁵¡U caajale'ex Jacob cone'ex j xíimbal tu beelil u sáasil Yuumtzil!

⁶Yuumtzil, teche' dzo'oc a xúunp'attic a caajal, dzo'oc a xúunp'attic u caajal Jacob; le múuch' caajo'obo', chuup yéetel j wáayo'ob j lakin u taalbalo'ob, chuup yéetel j na'ato'ob je'el bix le j filisteob cu bisicuba'ob yéetel j táanxel lu'umilo'obo'.

⁷Le caajo'obo' chuup yéetel oro, plata bey xan yéetel ya'abcach ayikalilo'ob; le caajo', chuup yéetel tzíimino'ob bey xan yéetel ya'abcach bolano'ob.

⁸¡Ba'ale' chuup xan yéetel beetbil kuob! U cajnáalilo'ob le caajo' cu kultico'ob le kuob tu beetajo'ob tu kabilo'ob.

⁹Dzo'oc u pajic u subtalo'ob, dzo'oc xan u mixba'alcunticuba'ob. ¡Ma' a sa'atsic u si'ipilo'ob!

¹⁰Le máaco'obo', bíin u dzotuba'ob tu yaan nucuch tuunicho'ob, tu yáanal lu'um; bíin u ta'acbesuba'ob tu táan u sajbe'entzilil Yuumtzil, tu táan u sac jome'enil u tzicbe'enil.

¹¹Le j ca'anal icho'obe', bíin chinlac u yicho'ob; le máaxo'ob cu yu'ubicuba'ob noj ba'alo'obe', bíin t'ona'anquinta'aco'ob. Chéen Yuumtzil bíin u ye'es u nojochil ti' le kiino',

¹²tumen le kiino' Yuumtzil u Yuumil tuláacal páajtalile' bíin u ye'es ba'ax bíin u beet ti' tuláacal máac ca'anal u ich yéetel dzu'uy u pucsi'ikal, ti' tuláacal máax cu yu'ubicubáa nonoj ba'al, u ti'al ca u t'ona'anquinte;

¹³ti' tuláacal le máaxo'ob cu tuculticuba'ob beyo'ob u kuulche'ilo'ob Líbano, sen ca'analtaco'ob, beyo'ob u béequilo'ob Basane';

¹⁴ti' tuláacal le máaxo'ob cu tuculticuba'ob ca'analtaco'ob beyo'ob ca'anal witzo'obe',

¹⁵ti' tuláacal le máaxo'ob cu tuculticuba'ob beyo'ob j ca'anal pu'uco'obe' wa quex beyo'ob j piimpim tuulumo'obe',

¹⁶ti' le máaxo'ob cu tucultico'ob beyo'ob u cheemil Tarsis wa beyo'ob qui'ichquelem cheemo'obe'.

¹⁷Le j ca'anal icho'ob yéetel nonojbáilo'obo', bíin t'onquinta'aco'ob jun puli'. Chéen Yuumtzil bíin u ye'es u nojochil ti' le kiino',

¹⁸bíin u xu'uls tuláacal beetbil kuob.

¹⁹Le quéen líikic Yuumtzil u ti'al u chup lu'um yéetel sajaquil, wíinico'obe', bíin u chokuba'ob tu áactunilo'ob nucuch tuunicho'ob, tu joolilo'ob lu'um; bíin u ta'acbesuba'ob ti' u sajacbe'enil Yuumtzil, tu yo'olal u sac jome'enil u tzicbe'enil.

²⁰Ti' le kiino', wíinique', bíin u pul u beetbil kuob ti' ch'o'ob yéetel ti' soodzo'ob, le beetbil kuob oro yéetel plata u ca'ajo'ob tu beetaj tu kabil u ti'al u kulto'ob.

²¹bíin u chokubáa cáap nucuch tuunicho'ob, ichil u áactunilo'ob cháaltuno'ob u ti'al u ta'acbesicuba'ob ti' u sajbe'entzil táan Yuumtzil, tu táan u sac jome'enil u tzicbe'enil, le kiin bíin líikic u ti'al u chup tu yéetel sajbe'enil lu'um.

²²P'at a wocsic a wóole'ex ti' wíinic, tumen jach jun p'íit u biilal. U cuxtal wíinique' chéen bey jun p'éel múus ike'.