Read Yucateco Isaías 20 Bible Online

Isaías 20 - Yucateco bible

Isaías 20

¹Jun p'éel kiine', Sargón u ajawil Asiriae' tu túuchi'itaj jun túul u nojochil u aj ba'atelo'ob tu caajil Asdod, leti'e' tu ba'ateltaj le caajo', ca tu ch'a'aj.

²Ti' le kiino' j t'aanaj Yuumtzil tu chi' Isaías u paal Amoze' ca tu ya'alaj ti': Pit le to'och nook a búuquintmaj yéetel le xanab yaan ta wooco'. Isaíase' tu beetaj beyo', ca j p'áat x ma' xanabil j p'áat óoli' chacnul.

³Yuumtzil túune' tu ya'alaj: In palitzil Isaíase', dzo'oc óox ja'abo'ob ma' tu dzáic xanab, o'oli' chacnul xan yanil, u ti'al péectzilil yéetel ca'anbesajil ti' Egipto yéetel ti' Etiopía.

⁴Bey bíin bisa'aco'ob táanxel lu'umil tumen u ajawil Asiria, le j egipciob yéetel le j etiopeobo' je'el bix u nuxibilo'obe', bey u táanquelmilo'ob, x ma' xanab yéetel x ma' nookil, chica'an u x baketo'ob u ti'al ca sublacchajco'ob.

⁵Le wíinico'obo' bíin u ch'a'ob sajaquil, bíin xan u ch'a'ob subtal ti' Etiopía u alab óolo'ob ca'achi, Egiptoe' u j ca'anal ichilo'ob ca'achi.

⁶Ti' le kiino' bíin a'ala'ac tumen le máaxo'ob cajnáalo'ob tu jáal ka'anab: Il a wile'ex bix dzo'oquic máax ti' c alab óol ca'achi, ti' máax c bin ca'ach j káat áantaj, u ti'al ca u toco'on tu kab u ajawil Asiria. ¿Bix bíin c toquicbáa bejela'e'?