Read Yucateco Isaías 21 Bible Online

Isaías 21 - Yucateco bible

Isaías 21

¹U bóobat tu yo'olal x tocoy lu'um: Bey chac iikalo'ob táan bino'ob te j noojolo', táan u taal te x tocoy lu'umo', sajbe'en cúuchil.

²Yaayaj ba'al le náay dzo'oc u ye'esic ti' teen Kuo': máax cu quíimsaj cúulpache', cúulpach xan u quíimsa'al, máax cu xu'ulsaje' cu xu'ulsaj. ¡Líiken Elam! ¡U caajil Medo, Co'one'ex ch'a a caaj! ¡Ma' in káat in wu'uy u yúuchul áacami'!

³In wíinclile' cu quiquilanquil, quin ch'o'och'otiquinbáa bey co'olel cu síijsaje', le yaj óolalo', ma' tu cha'ic in wu'uyic mix ba'al, le sajaquilo' ma' tu cha'ic in paacat.

⁴Xa'axa'ak in tuucul quin quiquilaanquil tu yo'olal sajaquil. U síis óolal ocnaj kiine' jach utz tin t'aan ca'acho', dzo'oc u suut sajbe'entzilil in ti'al.

⁵Le mayacche'o' dzo'oc u nu'ucbesa'al, dzo'oc u ja'ayal le qui'ichquelem póopo'obo', dzo'oc u chu'unpajal le noj janalo'. ¡Náacome'ex, wa'alene'ex: beete'ex u léembal a chimale'ex!

⁶Tumen Yuumtzile' dzo'oc u ya'alic ti' teen: Dzáa jun túul aj ch'úuc u ti'al ca u ya'al tuláacal ba'ax bíin u yilej.

⁷Wa cu yilic bolano'ob cu jíilta'alo'ob tumen ca'aca' túul tzíimino'obe', wa xan cu yilic máaco'ob u nat'majo'ob burro'ob wa camello'obe', u yil jach ma'alob.

⁸Le máax cu ch'úuco' tu yaawtaj: Yuumtzil, ti' yanen tin cúuchile', ti' yanen bul kiin yéetel bul áakab u ti'al in ch'úuc.

⁹Táan in wilic u taal jun p'éel bolan cu jíilta'al tumen ca'a túul tzíimino'ob. Yanchaj máax awtic túun: ¡Dzo'oc u lúubul, dzo'oc u lúubul Babilonia! Tuláacal u patbil kuobe' j p'áato'ob jayacbal j lu'um u xéexet'alo'ob.

¹⁰In caajal, xanabcha'ata'anech bey trigoe', quin dzáic ti' teech u péectzilil ba'ax tin wu'uyaj, tu chi' Yuumtzil u yuumil tuláacal páajtalil, u Ku Israel.

¹¹U bóobatil u xot kinta'al Edom: Yaan máax awtiquen líikbal Seir: Aj ch'úuc ¿bix a wilic u bin le áakabo'? Aj ch'úuc ¿ya'ab wa u bin u sáastal?

¹²Le aj ch'uuco' tu núucaj: Táan u taal u sáastal, ba'ale' táan xan u taal u yáakabtal. Wa taac a káat chi'it chi'exe', káat chi'inene'ex, suunene'ex tu ca'a téen.

¹³U bóobatil x tocoy lu'um: Sen ya'ab u cajnáalilo'ob Dedán cu máansico'ob áakab tu x poc che'ilo'ob le x tocoy lu'umo',

¹⁴Jóokene'ex a nuptáante'ex máax ukaj, ca a dza'ex ja' ti'. U cajnáalile'ex Tema, jóokene'ex tu beel máax cu púudzul, ca a dzáa janal ti'.

¹⁵Tumen táan u púudzulo'ob ti' máascab, ti' máascab leledzqui u yej, ti' x p'úunche' nu'ucbesa'an u ti'al ch'iin, yéetel ti' u p'uja'anil aj ba'atel.

¹⁶Yuumtzile' tu ya'alaj ti' teen: Ichil jun ja'ab je'el bix le cu xo'ocol tumen jun túul aj meyaj cuxa'an chéen yéetel u náajale', bíin xu'uluc tuláacal u nojochil Cedar.

¹⁷Chéen jun p'íit x p'úunche'ob bíin p'áatac ti' u aj ba'atelo'ob Cedar. Bey dzo'oc u ya'alic Yuumtzil u Ku Israel.