Read Yucateco Isaías 23 Bible Online

Isaías 23 - Yucateco bible

Isaías 23

¹U bóobatil u xot kinta'al Tiro: Táan u yokolo'ob u cheemilo'ob Tarsis, tumen u jeleb ka'anabile' dzo'oc u jo'obol. U jeleb ka'anabil tu'ux ca'ach cu kuchul ti' u taalbalo'ob Chipre dzo'oc láaj xu'ulsa'al.

²U cajnáalilo'ob Tiro yéetel u aj coonolo'ob Sidone' u macmaj u chi'ob. Máaxo'ob ka'aytico'ob u coonolo'obe' cu ch'actico'ob ca'ach ka'anab

³cu báabtico'ob táaj nojoch ja'ilo'ob. Cu jóokesico'ob u náajalo'ob ti' u conico'ob jejeláas janalbe'en neeko'ob tu caajil Sihor, ti' u joochilo'ob Niloe', cu conico'ob ca'ach ti' múuch' caajo'ob.

⁴Sen sublacchajquech Sidón u tuulumilech ka'anab, tumen bíin a wa'al. Bejela'e' mina'an ti' teen u ki'inamilo'ob síijsaj, dzo'oc u ch'éenel u yantal in paalal. Dzo'oc u p'áatal mina'an in paalal u ti'al in tzéento'ob mix in x ch'upul paalal in ca'anbeso'ob.

⁵Le quéen kuchuc le péectzil ti' le j egipciobo', bíin sen yajchajac tu yóolo'ob ba'ax úuch ti' Tiro.

⁶Bíin u ya'alo'ob: Xeene'ex Tarsis, okolnene'ex u cajnáalile'ex u jáal ka'anab.

⁷Le caaja', ¿le wa ti' u sen úuchben caaj suuc u beetic cha'ano'obe'? ¿Leti' wa le suuc u bin ca'ach tac náanach lu'umo'oba'?

⁸¿Máax a'al ca úuchuc bey ti' Tiro, jalach caaj, u j coonolo'ob ca'ache' ajawo'ob, yéetel u asab nucuch ba'alilo'ob yóokolcaab u ca'a coonolilo'ob?

⁹Yuumtzil u yuumil tuláacal páajtalil a'al ca úuchuc u ti'al u pajic subtal tuláacal j ca'anal ich u ti'al xan u pajic u subtal tuláacal u nucuch ba'alilo'ob lu'um.

¹⁰U caajil Tarsis, meyajt le lu'umo', tumen bejela'e' mina'an a jeleb ka'anabil tu'ux u kuchul cheemo'ob.

¹¹Yuumtzile' tu tich'aj u kab tu yóokol le ka'anabo', ca tu beetaj u quiquilaanquil tuláacal múuch' caajo'ob ca xan tu túuchi'itaj ca je'enec tuláacal tuulumilo'ob Canaán.

¹²Ca tu ya'alaj ti' Sidón: P'at a cha'anilo'obo' x ch'úupal pa'an a sujuyil. Quex ca a tucult a ch'actic Chipree', ma' bíin yanac ti' teech je'eleli'.

¹³Il a wile'ex le lu'umo'oba', u cúuchililo'ob cheemo'ob. Le j caldeob tu beetajo'ob witzil najo'obi' ca tu pa'ajo'ob u jalach najilo'ob Sidón, ca tu sutajo'ob x lab caajil. Ti' leti'ob yaan u si'ipilil, ma' ti' Asiriai'.

¹⁴Okolnaque'ex u cheemile'ex Tarsis, tumen dzo'oc u je'enel a tuulumilo'ob.

¹⁵Ti' le kiino' Tiroe', bíin tu'ubsa'ac setenta ja'abo'ob, je'el buca'aj u ya'abil u kiinil u cuxtal jun túul ajawe'. Cu dzo'ocol le setenta ja'abo'obo', bíin ka'ayac ti' Tiro u kaayil x cáacbach cu ya'alic beya':

¹⁶Tu'ubsa'an x cáacbach, ch'a arpa, xíimbalt le caaja', pax jadzudz paax, kay ya'ab kaayo'ob, u ti'al ca wil wa je'el a ka'ajal ti'obe'.

¹⁷Cu dzo'ocol u máan setenta ja'abo'obe', Yuumtzile' bíin u ca'a xíimbalt Tiro. Leti'e', bíin u ca dzáaubáa majanil bey x cáacbach ti' tuláacal u múuch' caajilo'ob u yóokolcaab.

¹⁸Ba'ale' u bo'olal u coonole', bíin jun páaycunta'ac u ti'al Yuumtzil; ma' bíin ta'acbesa'aco'ob, mix bíin líikesa'aco'obi, ba'ale' bíin dza'abaco'ob ti' máaxo'ob meyajtic Yuumtzil u ti'al u manico'ob ba'al u jaanto'ob yéetel co'ocoj búuco'ob.