Read Yucateco Isaías 24 Bible Online

Isaías 24 - Yucateco bible

Isaías 24

¹Il a wile'ex, Yuumtzile' bíin u láaj le lu'uma' bin u ca'aj u xu'ulsej, bin u ca'aj u xe'exe'eke, bin u ca'aj u ki'itbes u cajnáalilo'ob.

²Jun tacáalili' ba'ax bíin úuchuc ti' aj kiin bey ti' caaj, ti' dzuul bey ti' palitzil, ti' xunáan bey ti' x palitzil ti' máax cu maan bey ti' máax cu coonol, ti' máax cu dzaa ba'al majnil bey ti' cu káat majnil, ti' máax cu káat p'aax bey ti' máax cu dzaa p'aax.

³Lu'ume' bíin láaj míista'ac, bíin láaj ocolta'ac. Tumen leti' cu ya'alic Yuumtzil.

⁴Lu'ume' cu tijil cu chuchultal xan, yóokolcaabe' cu tijil cu chuchultal xan, ca'an yéetel lu'ume', cu chu'upulo'ob yéetel okom óolal.

⁵Lu'ume' dzo'oc u manba'alcunta'al tumen u cajnáalilo'ob, tumen tu p'atajo'ob u dzo'ocbesico'ob le a'almaj t'aano'obo', dzo'oc u manba'alcuntico'ob le nup t'aan mina'an xu'ulul ti'o'.

⁶Le t o'olale', lu'ume' dzo'oc u xu'ulsa'al tumen jun p'éel loolob t'aan, u cajnáalilo'obe' cu mukyajtico'ob le jaadzo'. Le t o'olal dzo'oc u p'áatal jun p'íit u cajnáalilo'ob yóokolcaab, chéen jun p'íit wíinico'ob p'áatal.

⁷Vinoe' táan u mina'anchajal, u x péet paachil pakal uvae' cu koja'antalo'ob, le máaxo'ob cajacbalo'ob ca'ach ichil qui'imac óole', dzo'oc u jach okom óolta'alo'ob.

⁸Xu'ul u qui'imac óolalo'ob le tunkulo'ob yéetel le arpaobo', xu'ul u yu'uba'al u juum u t'aano'ob u yuumilo'ob cha'an.

⁹Ma' bíin ca'a u'ukuc vino yéetel u juum kaayo'obi'; ukulo'obe', bíin káajchajac u ti'al máaxo'ob ukic.

¹⁰U caajil xa'axa'akile', jeenel, ti' mix jun p'éel naj cu páajtal u yúuchul ocol.

¹¹Caaje' cu yokol ti' bejo'ob tumen mina'an vino; dzo'oc u xu'ulul tuláacal qui'imac óolal, lu'ume' dzo'oc u p'áatal mina'an u cajnáalilo'ob.

¹²Le caajo' láaj ju'uju'ut, le jool caajo' chéen u xéexet'al.

¹³Bey bíin úuchuc ti' tuláacal u múuch' caajilo'ob lu'um: je'el bix u p'u'up'ucha'al aceitunaob u ti'al u yéensa'al u yicho'obe', wa je'el bix u mendzulta'al le uva dzo'oc u láaj t'oocolo'obo'.

¹⁴Máaxo'ob tu jechajo'ob quíimile' bíin awatnaco'ob tu yo'olal qui'imac óolal, bíin juumnac u t'aano'ob líikbal j chikin quéen u yilo'ob u tzicbe'enil Yuumtzil.

¹⁵Bey xan j chikin yéetel tu múuch' caajilo'ob jáal ka'anab, bíin dza'abac nojbe'enil ti' Yuumtzil, u Ku Israel.

¹⁶Líikbal tu táanxel tzéelil lu'um, dzo'oc c u'uyic u ka'ayal: ¡Nojbe'enil ti' aj ti'ibil bej! Ba'ale' tene' tin wa'alaj: ¡sen yaj óotzilil, sen yaj óotzilil! ¡Máaxo'ob cu meen loobo'ob cúulpachilo', dzo'oc u beetico'ob jun p'éel p'ecbe'en loob!

¹⁷U cajnáalilo'ob lu'ume' beyo'ob ba'alche' cu ch'a'a pachta'alo'ob tumen j dzoono'obe', wa beyo'ob máaxo'ob cu lúubulo'ob ti' léeche'.

¹⁸Máax bíin u jech le j dzoono'obo', bíin lúubuc ich jool, máax bíin jóokoc ti' joole', bíin lúubuc ti' léech. Jun p'éel búulcabal bíin taalac j ca'an bíin u beet u péec lu'um tu'ux t'alacbal.

¹⁹Lu'ume' bíin sajbe'en quíilbanac, bíin u tíitubáa, bíin xe'ex'et'pajac.

²⁰Bíin tacchalanquilnac bey jun túul cala'ane', bíin yúunta'ac bey jun p'éel ma' nu'uca'an pasele'. Tu yo'olal jach aal u cuchmajil u kebano'ob, bíin lúubuc u ti'al ma' u ca'a líikil.

²¹Ti' le kiino' Yuumtzile', bíin u jadz u nuuquilo'ob ca'an bey xan u ajawilo'ob lu'um;

²²Bíin u much'quinto'ob u ti'al ca u kalo'ob ti' x kalab naj, cu dzo'ocol u máan ya'abcach kiino'obe' cu jadzico'ob.

²³Yuumtzil u yuumil tuláacal páajtalil quéen u beet wa ba'ax bey ajawe', tu pu'uquil Sión, tu caajil Jerusalene', le kiin yéetel le uj bíin éekjoch'e'enchajco'ob, u nuuquilo'ob u caajale', bíin u yilo'ob u nojbe'enil Yuumtzil.