Read Yucateco Isaías 25 Bible Online

Isaías 25 - Yucateco bible

Isaías 25

¹Yuumtzil teche' in Kuech, quin nojbe'encuntiquech, quin qui'iqui' t'antic a kaaba', tumen dzo'oc a béeycuntic a nucuch tuuculo'ob; ma'atech u kexpajalo'ob, jach cu béeytalo'ob.

²Dzo'oc a sutic múul tuunichilo'ob le caajo'obo', tuulum caajo'ob dzo'oc a ju'uju'utico'ob; ta jenaj u jalach naj le aj p'eeco'obo', mix bikin bíin utzquinta'aco'ob.

³Tu yo'olal lelo', cu tziquiquech jun p'éel dzíidzic caaj, u caajalo'ob j loolob wíiniquilo'obe' sajaco'ob ti' teech.

⁴Tumen teche' ta beetajabáa u aj ta'acbesajil ti' óotzilo', jun túul j áantaj u ti'al máax kabéet áantaj ti', u cúuchil ta'acbesaj ti' chac ikal, bo'oy u ti'al u kiin ooxow. Muuk u ti'al dzíidzic máaco'ob, bey u chac ikal tu kiinil que'ele',

⁵wa bey ooxow tiquin lu'ume'. Teche' ca t'onquintic u múuch'ul p'uja'an aj p'eeco'ob, je'el bix a síiscuntic ooxow yéetel jun p'éel éek múuyale'. Teche' ca beetic u maquic u chi' j dzíidzic wíinico'obo'.

⁶Tu pu'uquil Sione', Yuumtzil u yuumil tuláacal páajtalile' táan u nu'ucbesic u ti'al tuláacal múuch' caajo'ob jun p'éel qui'iqui' noj janal yéetel paj ukulo'ob, bey xan qui'iqui' janalo'ob yéetel u asab ma'alobil vino'ob.

⁷Ti' le pu'uca' Yuumtzile', bíin u jen le káasab balmail tuláacal le caajo'obo', bey xan le pixib balic tuláacal le múuch' caajo'obo'.

⁸Yuumtzile', bíin u xu'uls jun puli' le quíimilo', bíin u cho'o u ja'il u yich tuláacal máac bíin xan u beet u sa'atal ti' tuláacal u yóokolcaab u paj subtalil u caajal. Yuumtzil j a'ale.

⁹Ti' le kiino' bíin a'ala'ac: Leti' c Ku, ti' leti' c dzaamaj ocsaj óol, leti' tu tocajo'on. Qui'imachajac c óol tumen dzo'oc u toquico'on.

¹⁰U kab Yuumtzil bíin canantic Sión, ca'aliquil táan u xanabcha'atic Moab je'el bix u xanabcha'ata'al suuc yaan tu cúuchil ta' míise'.

¹¹Moabe' bíin u tich' u kabo'ob je'el bix u tich'ic jun túul aj báabe', ba'ale' je'el bix bíin xi'ic u péeque', bey bíin xi'ic u búulul u ca'anal ichil.

¹²Yuumtzil bíin beetic u lúubul u ca'anal tuulumilo'ob; bíin u láaj lúubs j lu'um u ti'al u p'áatalo'ob jaytal.