Read Yucateco Isaías 26 Bible Online

Isaías 26 - Yucateco bible

Isaías 26

¹Ti' le kiino', tu lu'umil Judae' bíin ka'ayac le kaaya': Yaan ti' to'on jun p'éel caaj yaan u páajtal; u ti'al u toco'on, Yuumtzile' dzo'oc u líikesic pako'ob tu bakpach bey xan tuulumo'ob u ti'al u toquico'on.

²Je'ekabte'ex jool najilo'ob, u ti'al ca máanac jun múuch' caaj no'oja'an u cuxtal ma' xan tu kex óolal.

³Yuumtzil, teche' ca t'ilcuntic jéedzel ti' máaxo'ob chuca'an u yóolo'obe', tumen u yocsmajo'ob u yóolo'ob ti' teech.

⁴Ocsaj óolnene'ex mantadz ti' Yuumtzil, tumen leti' c aj ta'acbesaj mantadz, mina'an u xu'ulul ti'.

⁵Leti'e' cu beetic u lúubul j ca'anal icho'ob, cu t'onquintic caaj cu nonojbáil cu jenic tac j lu'um,

⁶u ti'al ca xanabcha'ata'aco'ob tumen j cabal óolo'ob yéetel tumen óotzilo'ob.

⁷u cuxtal máaco'ob ti'ibil bejo'obe', tojtac; Yuumtzil, teche' ca táaxcuntic u beelo'ob.

⁸To'on xane' c u'uyic ma'alob jéedzelilo'on ti' le bejo'ob e'esa'an ti' to'on tumen a wa'almaj t'aano'ob, Yuumtzil. C pucsi'ikale' cu dzíiboltic u tuucul chéen ti' teech.

⁹Tu jaajil in wóol quin jajak iik ta wo'olal yéetel áakab; quin caxtiquech tu jaajil in wóol. Quéen a p'is óolt le lu'uma', wíinico'obe', bíin u kaj óolto'ob ba'ax ti'ibil bejil.[2]

¹⁰Quex a ch'a'a óotzilil ti' loolob máaco'obe', leti'obe' ma' bíin u cano'ob toj cuxtali'; leti'obe' loolob wíinico'ob ichil tzicbe'en máaco'ob mina'an xan tu tuuculo'ob u nojbe'enil Yuumtzil.

¹¹Yuumtzil a nu'ucbesmaj le jaadzo', ba'ale' leti'obe' ma' káato'ob u yilo'obi'; le quéen u yilo'ob buca'aj a yaabilmajil a caajale', bíin u ch'a'ob subtal. ¡Quexi'i' ca tóocaco'ob tumen u káakil a p'uja'anile'!

¹²Yuumtzil teche' ca beetic u bin to'on utzil; tu jaajile' teech beetic tuláacal le c meyajo'obo'.

¹³C Yuumtzil, c Ku xan, yaanal dzuulo'ob palitziltmailo'on ca'achi, ba'ale' chéen teech c kamiquech bey c Dzuulile'.

¹⁴Leti'obe' j quimeno'ob, ma' bíin ca'a cuxlaco'obi', chéen beyo'ob bo'oye', ma' bíin ca'a líikico'obi'; tumen dzo'oc a jadzico'ob, dzo'oc a xu'ulsico'ob, dzo'oc a beetic u tu'ubsa'alo'ob.

¹⁵Yuumtzil teche' ta beetaj u nojochtal le múuch' caajo'oba'; ta beetaj u nojochtal u ti'al a nojbe'enil, ta cóochquintaj tu'ux cu náacal u xuulo'ob le múuch' caajo'oba'.

¹⁶Yuumtzil t caxtajech ichil c yaj óolal tu kiinil ca ta keyajo'on yéetel jun p'éel cabal t'aan.

¹⁷Ta táan ca'ach yano'on je'el bix jun túul x yo'om co'olele' cu kuchul u súutuquil u síijsaj táan u ch'o'och'oticubáa, cu yawat tu yo'olal u ki'inamil.

¹⁸Yo'omchajo'on, t mukyajtaj u ki'inamilo'ob síijsaj, síij c paal, ba'ale' chéen iik. Ma' c taas tocsajil ti' le múuch' caajo'oba', mix bíin síijic wíinico'ob u ti'al chup le yóokolcaaba'.

¹⁹Ba'ale' a quimeno'obe', bíin ca'a cuxlaco'ob, u quimen wíinclilo'obe', bíin ca'a cuxlaco'ob. Le máaxo'ob cu wenelo'ob te j lu'umo' bíin ajaco'ob yéetel bíin awatnaco'ob yéetel qui'imac óolal. Tumen teche' ca túuxtic a sáasil bey ye'ebe' le quimeno'obo' bíin ca'a síijico'ob ti' le lu'umo'.

²⁰In caajal, xeen, ooquen ta wotoch, kal u jool najilo'ob a wotoch ta paach. Ta'acbesabáa jun p'íit kiin ca'aliquil u máan u p'uja'anil Yuumtzil.

²¹Tumen Yuumtzile', bin u ca'aj jóokol ich u jalach naj u ti'al u jaadz tu yo'olal u kebano'ob u cajnáalilo'ob lu'um, lu'ume', ma' bíin u ca'a ta'acbes máaxo'ob u loobiltmaji', ba'ale' bíin u cha'a u yila'al le máaxo'ob u quíimsajo'obo', le máaxo'ob u beetmajo'ob u yóokolo'.