Read Yucateco Isaías 27 Bible Online

Isaías 27 - Yucateco bible

Isaías 27

¹Ti' le kiino' Yuumtzile' bíin u jaadz yéetel u sajbe'en máascab, nojoch u páajtalil, Leviatán, le caan u copmajubáo', Leviatán le lo'oloch caano', bíin xan u quíims le j ku'ukil caan yaan te j ka'anabo'.

²Ti' le kiino' Yuumtzile', bíin u ya'al: Kaaynene'ex ti' u x péet paachil qui'iqui' uva.

³Tene' Yuumtzilen, teen canantic, mantadz xan quin jóoyabtic. Quin canantic bul kiin, bul áakab, tu yo'olal ma' u yúuchul mix jun p'éel loob ti'.

⁴Ma' kuuxchaja'anen tu yéeteli'. Wa yaan u ki'ixelo'ob yéetel kaakas xíiwilo'obe', je'el wal in bin in láaj ch'aquico'obe', cu dzo'ocole' quin láaj tóoquico'ob.

⁵Wa u káat ca in canante', u ca'a bisubáa tin wéetel, bey, u ca'a bisiubáa tin wéetel.

⁶Ti' le kiino'ob cu taalo'obo', u caajil Jacobe', bíin u taamcunt u mootzo'ob, Israele', bíin ku'uknac yéetel bíin loolnac bíin xan u chup yóokolcaab yéetel u yicho'ob.

⁷Kue' ma' u jadz Israel je'el bix tu jadzilac máaxo'ob yedzic ca'ache', mix u quíims Israel je'el bix úuchic u quíimsic máaxo'ob j beet loob ti'obe'.

⁸Kue' tu jadzaj u caajal iquil tu yáalcabansaj táanxel lu'umil, ichil u sajbe'en p'uja'anile' tu tojolch'intaj, je'el bix u yustaj u yiikal j lakine'.

⁹Ba'ale' bíin u sa'ats u keban Jacob, je'el in sa'atsic u si'ipilo'obe' wa cu xiixcuntico'ob u manba'al multuunil kultajo'ob je'el bix u mu'uxul u tuunichil ta'ane', u ti'al ma' u p'áatal mix jun p'éel chuunche'il kultaj, mix u multuunil kultaj u ti'al u tóoca'al poom ti' yaanal kuob.

¹⁰Le caaj tuulumta'ano' j p'áat láaj jeenel, bey naj xúunp'atta'ane', bey x tocoy lu'um mina'an u cajnáalilo'obe'. U cúuchil tu'ux cu caxtic u janal wacax, le tu'ux cu jaantic u kab che'obe' yéetel cu chital je'eleli'.

¹¹U kabo'ob che'obe' cu cáachalo'ob quéen tijico'ob; co'olelo'ob túune' cu molico'ob u ti'al u t'abico'ob káak. Jun p'éel caaj j ma' na'at. Le t o'olale' Máax beete', ma' bíin u yaj óol ti', mix bíin u ch'a'a óotzilil ti'.

¹²Ti' le kiino', Yuumtzile' bíin líikic j p'uuch líikbal Éufratese' tac tu yáalcab ja'il Egipto, je'el bix u p'u'uchul u neek trigoe', ba'ale' j israelitaex, te'exe' bíin mo'oloque'ex jujun túulil.

¹³Ti' le kiino' bíin jóopsa'ac nonoj trompeta, le máaxo'ob saatalo'ob ca'ach Asiria, bey xan le máaxo'ob áalcabansa'abo'ob Egiptoe', bíin taalaco'ob u kulto'ob Yuumtzil tu caajil Jerusalén, tin quili'ich pu'uc.