Read Yucateco Isaías 28 Bible Online

Isaías 28 - Yucateco bible

Isaías 28

¹¡Yaj yanil Samaria, u j ca'anal ichil yéetel u péet jo'ol Efraín leti'e' caaj cala'ano'; bey u jadzutzil ba'al beeta'al yéetel tiquin nicte'ob, cu líikil tu yóokol cáacab yaan ti' táax koom lu'um, u caajil wíinico'ob t'onquina'ano'ob tumen le vino'!

²Yuumtzile' u jóokesmaj jun túul j xiib mu'uka'an yéetel yaan u páajtalil, bey u chac ikal j bate', bey chac ikal cu xu'ulsaje', bey ka'amcach ja'e', bey sajbe'entzil búulcabale'. Yéetel u kab bíin u lúubsej,

³yéetel u yooc bíin u puch', máax cu beetic ca'ach u ca'anal ichil yéetel u péet jo'ol u ti'al u cala'an caajil Efraín.

⁴U jadzutz jopbe'enil tiquin nicte'ob cu líikil tu yóokol cáacab táax kóom lu'um, bíin béeyaco'ob u yáax ich higos tu kiinile'; chéen p'el u lúubul tu kab wa máaxe', cu jaantic.

⁵Ti' le kiino' Yuumtzil u yuumil tuláacal páajtalile', bíin béeyac u péet jo'olal nojbe'enil, jun p'éel ma'alob jadzutz ba'al u ti'al máaxo'ob bíin p'áataco'ob ti' le caajo',

⁶bíin u dzáa tu tuuculo'ob le máaxo'ob cu u'uyaj tacpoolo'ob u ti'al beetico'ob ba'ax tu beel, bíin u dzáa u yóolo'ob le aj ba'atelo'ob canantic le caajo'.

⁷Yaan xan u láak máaco'ob cu tacchalanquilo'ob yéetel vino bey xan cu tóoch'pajlo'ob yéetel ukul cu cáalcunaj: aj kiino'ob yéetel aj bóobato'ob cu tacchalanquilo'ob yéetel ukulo'ob cu cáalcunaj, cu sa'atal u yóolo'ob yéetel vino, cu t'óochpajalo'ob tu yo'olal cu yukico'ob ba'alo'ob cu cáalcunaj, cu tacchalanquilo'ob le quéen u yilo'ob náayo'ob, cala'antaco'ob le quéen u ya'alo'ob máax si'ipilchaja'an.

⁸Tuláacal u mayac che'ob chuuptac yéetel u tu'utu' xejo'ob, mina'an mix jun xéet' utz yanil.

⁹Ca j t'aanajo'ob tin wo'olal: ¡Táan a taale'ex a ca'anbeso'one'ex, a ca'anbese'ex ti' to'on ba'axo'ob cu ya'alic Ku! ¡Táan u tucultique'ex mejen paalalo'on

¹⁰táantic c chunic c canic xoc ma' tu jóokol tu beel c t'aan!

¹¹Ma'alob, wa ma' tu táan óoltico'ob ba'ax quin wa'alique', bíin t'a'anaco'ob tumen Ku yéetel u sa'awa'an t'aano'ob j táanxel lu'umilo'ob.

¹²Leti'e' dzo'oc ca'ach u ya'alic ti'ob: way yaan jóomsaj óole', way yaan je'elele'; je'elec máax cu jéesbal. Ba'ale' ma' tu yóoltajo'ob u taan óolto'obi'

¹³Le t o'olale' bíin t'a'anaco'ob tumen Yuumtzil je'el bix u t'a'anal mejen paalal táan u canico'ob xooque'. Beyo' le quéen xíimbalnaco'obe', bíin lúubuco'ob jajawa'an, bíin úuchuc loob ti'ob, bíin lúubuco'ob ti' léech, bíin p'áataco'ob kaaxalo'ob.

¹⁴Ch'enxiquinte'ex u t'aan Yuumtzil j ma' subtal wíinique'ex u méektáanaje'ex u caajil Jerusalén.

¹⁵Te'exe' ca wa'alique'ex: Dzo'oc c beetic jun p'éel nup t'aan yéetel le quíimilo', dzo'oc c beetic jun p'éel kax t'aan yéetel u ajawil quimeno'ob, tu yo'olal le quéen taalac le yaayaj jáaycabalo' ma' u chuquico'on; dzo'oc c caxtic tu'ux c ta'acbesicbáa ti' tuuso'ob, tu'ux xan c jechic loob ti' ma' jaajil ba'alo'ob.

¹⁶Le t o'olale' Yuumtzile' cu ya'alic: Bin in ca'a in dzáa Sión jun p'éel tuunich, jun p'éel tuunich yéeya'an, co'oj xan u tojol, leti' bíin u beet u noj tuunichil u ti'al chuun pakil. Le máax bíin u yoques u yóol ti'e', ma' bíin sajacchajqui'.

¹⁷Le meyajo' bíin in beet yéetel x p'is pak u ti'al in beetic ba'ax tu beel, x p'isib táaxe' u ti'al tojquinaj. Le ta'acbejsaj ta caxtaje'ex ca'ach ich tuuso'obo' bíin kascunta'ac tumen bat, ja' bíin bulic u cúuchil ta'acbesaj.

¹⁸U nup t'aan yéetel quíimile' bíin mixba'alncunta'ac, u kax t'aan yéetel u ajawil quíimile' bíin p'áatac mix ba'al u biilal. Bíin kuchuc sajbe'en lo'ob, bíin u pech'e'ex.

¹⁹Je'el jay téen bíin taalaque', bíin u jíilte'ex. Bíin talac ca'a tac ja'atzcab, bey xan ca'a tac áakab. Chéen a wu'uyique'ex u péectzilile' bíin quiquilnaque'ex.

²⁰Bey je'el bix u yúuchul chital ti' jun p'éel nu'ut' k'áane', je'el bix u tep'icabáa wíinic yéetel jun p'éel cóomcom teep'e'.

²¹Yuumtzile', bíin u beet je'el bix tu beetaj tu pu'uquil Perazime', bíin u beet je'el bix tu beetaj tu táax koomil Gabaone', u ti'al u dzo'ocbes ba'ax u tucultmaj quex jela'an u yila'al, u ti'al ca u béeycunt u meyaj, u x mucul meyaj.

²²Bey túuno', ¡ma' a suut pooch'ile'ex! ma' xan ca u jich'e'ex u x jok suumilo'obi'; tumen dzo'oc in wu'uyique', Yuumtzil u yuumil tuláacal páajtalile', dzo'oc u ya'alic u xu'ulsic tuláacal múuch' caajo'ob.

²³Ch'en xiquintene'ex, u'uye'ex ba'ax quin wa'alic, u'uye'ex ma'alob in t'aano'ob.

²⁴Quéen xi'ic pakal jun túul j colnáale', ma' tu máansic kiin táan u péecsaj lu'um, wa táan u je'ic becano'ob, wa táan u xáache'etic u lu'um.

²⁵¿Ma' wa jaaj, táanil cu táaxcuntic u lu'umile'? cu dzo'ocole' cu t'it'ic u neek eneldo yéetel comino, cu dzo'ocole' cu pakic u trigo tu tzoolol, cu dzo'ocole' tu jáalo'obe' cu pakic cebada yéetel centeno.

²⁶Ku ca'anbesic ti' bix u najmal u beetic.

²⁷Tumen eneldoe' ma' teech u p'u'uchul, mix tu máansa'al bolan tu yóokol comino; ba'ale' eneldoe' cu tíita'al yéetel jun cáach che', comino' yéetel jun p'éel xóolte'.

²⁸Trigoe' cu p'u'uchul, ba'ale' ma' tu p'u'uchul x ma' je'elel; cu máansa'al u x peten che'ilo'ob bolan tu yóokol, cu jun páaycunta'al u neek ti' u sóol, ba'ale' ma' tu p'u'uyul.

²⁹Bey xan u beetic Yuumtzil u yuumil tuláacal páajtalil. Ti' leti'e' yaan nucuch jakbe'en jokjo'olo'ob, cu béeycuntico'ob yéetel nojoch ojéelajil.