Read Yucateco Isaías 29 Bible Online

Isaías 29 - Yucateco bible

Isaías 29

¹¡Yaj yanil u Ariel,[3] Ariel, le caaj tu'ux cu je'elel ca'ach Davide'! Cu máan ja'abo'ob táan u beetico'ob cha'an tu paach cha'an,

²Tene' bíin in beet u bin kaasil ti' Ariel, bíin yanac okol yéetel áacamo'obi'. Le caajo' bíin p'áatac in ti'alinte jach bey Ariele'.

³Bíin in túuchi'it in aj ba'atelo'ob u ti'al bakpachtiquech, bíin in dzáa tuulumo'ob ta bakpach, bin in ca'aj in líikes piimpiim cooto'ob u ti'al in ba'ateltiquech.

⁴Bíin p'áataquech t'onocbal, luubulech j lu'um; u juum a t'aane' bíin p'áatac bey u t'aan jun túul ja'asaj óole'; a t'aano'obe' bíin u'uya'ac bey ba'ax cu samal juume'.

⁵Ba'ale', Yuumtzil u yuumil tuláacal páajtalile', ichil jun súutuc bíin u téec jadz a aj p'eeco'ob yéetel u jaadz cháaco'ob, u quíilbal lu'umo'ob, jun p'éel taj ka'am juum, jun p'éel ka'amcach ja', jun p'éel ka'amcach iik yéetel tóoco'ob cu jáay xu'ulsaj. A sen ya'ab aj p'eeco'obe', bíin su'utuco'ob ma'ay lu'umil, a sen ch'a'apachtajo'obe' bíin picta'aco'ob bey sojole'.

⁷Tuláacal caajo'ob ma' páajtal u xooquilo'ob cu ba'ateltico'ob Ariele', tuláacal máaxo'ob ba'ateltic, bey le máaxo'ob cu dzáicuba'ob u jeno'ob u tuulumilo'obe', máaxo'ob yedzic ca'acho' bíin béeyaco'ob chéen jun p'éel wayak, wa jun p'éel u náayil áakab.

⁸Bíin p'áatac je'el bix máac wi'ij cu wayaktic táan u janale', ba'ale' cu yajal yéetel u tzuuquel jóojochil; wa je'el bix máax ukaj, cu wayaktic u yukic ja'e' ba'ale' le quéen ajaque' láili' ukaje' yéetel tiquin u chi'. Bey bíin úuchuc yéetel le ya'abcach caajo'ob cu ba'ateltico'ob u pu'uquil Siono'.

⁹¡Ma' u xu'ulul a jach j ma' na'atile'ex! ¡Ma' xu'ulul a ch'óopile'ex u ti'al ma' a wilique'ex mix ba'al! ¡Ma' xu'ulul a tacchalanquile'ex bey cala'ane'exe' quex ma' a wukmaje'ex ukul cu cáalcunaji'!

¹⁰Tumen Yuumtzile' dzo'oc u túuxtic ta wóokole'ex jun p'éel t'úubul wenelil. Aj bóobato'obe' u yicho'ob caaj, ba'ale' Yuumtzile' dzo'oc u pixic u yicho'ob yéetel jun p'éel bóoch'.

¹¹Tuláacal náaye' dzo'oc u suut a ti'ale'ex bey ba'al dzíibta'an ti' jun wáal ju'un codza'an, dza'an u dzalabile'. Wa ca dza'abac xo'ocol ti' máax u yojel xo'oc ca a'ala'ac ti': Xoc le ju'una', leti'e' bíin u núuque: Ma' tu páajtal in xoquic tumen dzala'an.

¹²Ba'ale' wa cu dza'abal ti' wa máax ma' u yojel xooc, cu u ya'al ti': Xoc le ju'una' leti'e' bíin u núuc: Ma' in wojel xooqui'.

¹³Yuumtzile' tu ya'alaj ti' teen: Le caaja' chéen cu ya'alic cu meyajtiquen cu tziquiquen xan, chéen yéetel u chi', ba'ale' u pucsi'ikale' náach yanil ti' teen, le kultaj xan cu beetico'ob ti' teno' chéen pat jo'olta'ano'ob tumen wíinico'ob chéen xan babal ojéela'an.

¹⁴Tu yo'olale' yéetel ja'ak óolalo'ob bey xan máactzilo'obe' bíin u p'at jaapal u chi' le caaja'. U yojéelaj u aj ojéelajo'ob, yéetel u na'at u aj na'ato'obe' bíin xu'uluc.

¹⁵¡Yaj yanil máaxo'ob cu ta'acbesicuba'ob ti' Yuumtzil u ti'al u balo'ob u jok jo'olo'ob, cu beetico'ob ba'alo'ob kaas ich éekjoch'e'enil cu ya'alico'ob túun: Mix máac ilico'on. Mix máac ojéeltic!

¹⁶¡Jela'an, bey u kascunta'al le ba'alo'obo'! Lelo' bey ca a'ala'ac kate' lajquet yéetel j pat kat. Jun p'éel ba'al beeta'ane', ma' bíin u ya'al ti' máax beete': Teche' ma' ta beetajeni' mix jun p'éel nu'ucul beeta'an yéetel kat cu ya'alic ti' máax pate': Ma' a wojel ba'ax ca beetiqui'.

¹⁷Ichil jun p'íit kiine', le káaxo' bíin suunac u cúuchilo'ob pakal, u cúuchilo'ob pakale' bíin suunaco'ob káaxil.

¹⁸Ti' le kiino' le cóoco' bíin u'uyajnac quéen xo'ococ wa ba'ax u yu'ub tumen wa máax, le ch'óopo'obo', bíin paacatnaco'ob, bíin jóokoco'ob ichil u booxil le éekjoch'e'enilo'.

¹⁹J caabal óolo'obe', bíin ca'a qui'imacchajac u yóolo'ob ti' Yuumtzil, u asab óotzililo'obe' bíin qui'imacchajac u yóolo'ob ti' u quili'ich Ku Israel.

²⁰Bíin xu'uluc le j ma' subtalo'obo', bíin p'áatac mina'an j ca'anal icho'ob bíin samkajaco'ob máaxo'ob chéen ba'axo'ob kaas cu tucultic u beetico'obe',

²¹máaxo'ob cu tacpoltico'ob ti' quíimsaj wíiniquil u láak máaco'ob, cu táabsico'ob aj p'is óol, yéetel tuuso'obe' cu lukesa'al ba'ax cu najmatic máax mina'an u si'ipil.

²²Le t o'olal Yuumtzil u Ku Israel máax toc Abrahame', cu ya'alic: Líikbal le kiina', Jacobe' ma' bíin u ch'a'a subtali', mix bíin chacxique'enchajqui',

²³tumen quéen ila'ac tu yo'olal u ch'i'ibalo'ob ba'ax dzo'oc in beetic ti' u caajale', bíin u táan óolto'ob in quili'ichil, bíin u tziqueno'ob, teen u Quili'ichil Israel.

²⁴Máaxo'ob saatal u yóolo'ob ca'ache', bíin u ye'eso'ob yéetel u cuxtalo'ob aj ojéelajo'ob, máaxo'ob cu ya'alaj ba'alo'obe', bíin u éejemto'ob le ca'anbesajo'obo'.