Read Yucateco Isaías 3 Bible Online

Isaías 3 - Yucateco bible

Isaías 3

¹¡P'ich ma'alob a wiche'ex! Yuumtzil u yuumil tuláacal páajtalile', bíin u ca'aj u lukes ti' u caajil Jerusalén yéetel ti' Judá tuláacal máaxo'ob taasic ba'axo'ob kabéet ti', bey xan tuláacal waaj yéetel ja' kabéet ti'ob.

²Bíin u láaj tzel ichil caaj j xiixib máac, aj ba'atel, aj u'uyaj tac pool, aj bóobat, j wáay, nuxib,

³náacom, dzuul, aj tzol xiquin, aj na'at yéetel j meen,

⁴u ti'al ca u dzáa xi'ipalalo'ob u beeto'ob u nuuquilo'ob; chéen j p'eex paalal bíin méektáantico'ob.

⁵Sen ya'ab ba'ax bíin úuchuc ichil le caajo', yaan u yúuchul paaclan ba'atel tac ichil éet bisajba'ob. J táanquelem paalal, bíin líikico'ob u ba'atelto'ob le nuxibo'obo', máaxo'ob mix ba'al u yila'alo'obo', bíin líikico'ob u ba'atelto'ob le dzuulo'obo'.

⁶Tac jun túul sucu'untzile', bíin u ya'al ti' u yíidzin: Quexi' teche' yaan nook a búuquinte; beetabáa c nojochil; méektáant le tucub najo'oba'.

⁷Le íidzintzilo', bíin u núuc beya': Tene' ma' tu páajtal in wutzquintic le kaaso'oba', tin wotoche', mina'an ba'al in jaant, mix nook u ti'al in búuquinte. Ma' a dzáiquene'ex in beet in nojchil te j caaja'.

⁸Tu jaajile' Jerusalene' táan ju'uju'utpajal, Judae', táan u suut x lab caajil, tumen ichile', cu beeta'al yéetel cu ya'ala'al ba'ax kaas ti' Yuumtzil, ba'alo'ob cu po'och'ic u nojbe'enil.

⁹U j ma' subtalo'ob taquic u poolo'ob; ma' tu balico'ob u kebano'ob; jach beyo'ob Sodomae', cu ka'aytico'obo' tuláacal tu'ux, ba'ax cu beetico'ob. ¡Yaj yanilo'ob, tu juunalo'ob cu caxtico'ob u ja'adzalo'ob!

¹⁰Qui' u yóol aj ti'ibil bej, tumen bíin xi'ic utzil ti', bíin u qui'iqui' jaant u yich u meyaj.

¹¹¡Yaj yanil j loolob wíinic, tumen bíin xi'ic kaasil ti'! Ku bíin bo'otic ti' ba'axo'ob tu beetaj.

¹²Jun túul p'eex paal máax yedzic in caajal; u méektáanile' tu kab co'olelo'ob yaan. In caajal, a nuuquile'ex tusique'ex, ca bisa'al ti' yaanal bej.

¹³Yuumtzile', dzo'oc u nu'ucbesicubáa u ti'al p'is óol, mix ba'al cu pa'atic u ti'al u xot kintic u caajal.

¹⁴Yuumtzile', bíin t'aanac u ti'al xot kiin, bíin u ya'al; ti' u nuuquilo'ob caaj: Te'exe', ma' je'eleque'ex ti' a wóotzilcuntique'ex in caajali'; dzo'oc a wocoltique'ex le óotzilo'obo', ba'axo'ob ca wocoltique'exe' ca ta'acbesique'ex ta wotoche'ex.

¹⁵¿Máaxe'ex u ti'al ca yedze'ex in caajal ca xiquique'ex xan u táan yich óotzilo'ob? Lela', Yuumtzil u yuumil tuláacal páajtalil a'alic.

¹⁶Yuumtzile', cu ya'alic xan: Ti' co'olelilo'ob Sión, le x ca'anal icho'ob, cu máano'ob u tuch'maj u caalo'ob, cu pooch'ilo'ob yéetel u paacato'ob, cu cóomcom xíimbalo'ob, cu beetico'ob u juum xan u x qui' óotzilil u yooco'ob,

¹⁷u ti'al u yajtal tu yóolo'obe' bíin in beet u kolistalo'ob bíin in beet u yila'al u chacnulilo'ob.

¹⁸Ti' le kiino', Yuumtzile', bíin u lukes tuláacal u x qui' óotzililo'ob: bíin u lukes u x qui' óotzilil u yooco'ob, u x péet jo'olo'ob, u x ch'iquibo'ob,

¹⁹u tuupo'ob, u x bak kabo'ob, yéetel u bóoch'o'ob,

²⁰u kax poolo'ob, u x jokenjokil u yooco'ob, u kaxnako'ob, u mejen chúujil u qui'iboc ja'ilo'ob, yéetel u páay ooquilo'ob,

²¹u x dzipit kabo'ob, u tuupil u ni'ob,

²²u qui'ichquelem búuco'ob, u suyemo'ob, u bóoch'o'ob yéetel u jadzutz sáabucano'ob,

²³u néeno'ob, u castláan nooko'ob, u pix jo'olo'ob, yéetel u jadzutz bóoch'o'ob.

²⁴Tu'ile' bíin u jeelint qui'iboquil; jun p'éel suum bíin u jeelint jun p'éel kaxnak; kolisile' bíin u jeelint pool jadzutz tzíicta'anil; to'och nook bíin u jeelint castláan nooko'ob; u dzalabil chac jole'em fieroe' bíin u jeelint qui'ichpamil.

²⁵U j xiibilo'ob a caajale', bíin lúubuco'ob ich ba'atel, u aj ba'atelilo'ob a caajale', bíin quíimico'ob ich ba'atel.

²⁶Caaje' bíin yokolnac, bíin xan u dzáa u okom nook quimeno'ob, bíin jach xúunp'atta'ac.