Read Yucateco Isaías 30 Bible Online

Isaías 30 - Yucateco bible

Isaías 30

¹Yuumtzile' cu ya'alic: ¡Yaj yanilo'ob le paalal dzu'uy poolo'ob, cu beetico'ob jok jo'olo'ob, ma' tu pa'atico'ob in wáantaj cu máakantico'ob meyajo'ob ma' teen j dzáa tu tuuculo'obi', bey túuno' cu niccuntico'ob kebano'ob yóokol kebano'ob!

²Cu bino'ob áalcabil Egipto, ba'ale' ma' tu káat chi'itiqueno'ob cu bino'ob u caxto'ob u yáantaj faraón, cu ta'acbesicuba'ob tu bo'oy Egipto.

³Ba'ale' bíin p'a'ataco'ob kaasil ti' u yáantaj faraón, u ta'acbesaj yéetel u bo'oyil Egiptoe' leti' bíin pajic u subtalo'ob.

⁴Quex a túuchi'ite'ex aj bisaj t'aano'ob tac tu caajil Zoán yéetel tu caajil Hanese',

⁵tuláacale'ex bíin p'a'ataque'ex kaasil tumen le caaj mix ba'al u biilalo' ma' bíin u taas ti' te'ex áantaj mix bíin u beet utz ti' te'exi', ba'ale' chéen tuus alab óolal, bíin xan u beet te'ex kaas.

⁶Bóobatil tu yo'olal u ba'alche'ilo'ob Néguev: Tu yo'olal u lu'umil u chi' quíimilil, tu'ux cajnáal leóno'ob cu yáacamo'ob, j chi'ibal caano'ob yéetel xiknal j ku'ukil caano'ob, cu máansa'al co'ocoj ba'alo'ob yéetel ayikalilo'ob dza'an tu yóokol burro'ob yéetel tu yóokol camello'ob u ti'al j bisbil Egipto le caaj mix ba'al u biilalo',

⁷j ma' muuk, ma' tu páajtal u dzáic áantaj. Let o'olal quin dzáic u kaaba'int: Nojoch ba'aba'al cu yáacam, ba'ale' ma' tu beetic mix ba'al.

⁸Bejela'e' co'oten a dzíibt ti' jun p'éel táax bujbil che', dzíibt ti' jun p'éel ju'un u ti'al ca p'áatac ilbil ti' le kiino'ob cu taalo'obo' bey jun p'éel jaacunajil mina'an xuulul ti'e'.

⁹Le wíinico'oba' jun p'éel caaj dzu'uy u poolo'ob, yéetel j ma' ocsaj óolalo'ob, ma' u káat u ch'en xiquint u ca'anbesajo'ob Yuumtzili'.

¹⁰Ti' aj náayo'obe' cu ya'alico'ob: Ma' a náaye'ex, ti' aj bóobato'obe' cu ya'alico'ob: Ma' a tzicbaltique'ex ti' to'on ba'axo'ob jaajtaco'ob e'esa'an ti' te'exo'; t'aane'exo'on yéetel muumun t'aano'ob; ma' a taale'ex a lukes ti' to'on jadzutz c dzíibolalo'ob.

¹¹Náachcuntaba'ex ti' le bejo', tzelaba'ex ti' le toj bejo', ma' a dzáique'ex t táan u Quili'ich Ku Israel.

¹²Tu yo'olal lelo', u Quili'ich Ku Israele' cu ya'alic: Te'exe' ca wa'alique'ex ma' ti' le tzol xiquina', tumen ca táan óoltique'ex meyaj loob yéetel kasa'anil, ca walab óoltique'exo'ob;

¹³tu yo'olal lelo' te'exe' si'ipilchajane'ex. Beye'ex jun p'éel ca'anal pak xi'ixi'ique' chéen quéen a wile'exe' dzo'oc u jéenel;

¹⁴bíin xu'ulsa'aque'ex bey jun p'éel p'úule', cu láaj xiixtal tumen ma' bíin p'áatac ichil u xiixelo'obi' mix jun xéet' ca meyajnac u ti'al mo'olol t'aba'an chúuc, mix u ti'al u jóokesa'al ja' ti' ch'e'en.

¹⁵Yuumtzil Ku u Quili'ichil Israele' cu ya'alic: Suunene'ex, jóomoc a wóole'ex, beyo' bíin to'ocoque'ex. Ti' jóom óolal yéetel ti' ocsaj óolal bíin yanac u muuk. Ba'ale' te'exe' ma' ta wóoltaje'exi',

¹⁶te'exe' ma' ta wa'alaje'ex: Asab ma'alob ca púudzco'on ti' tzíimino'ob. Ma'alo', bey bíin púudzuque'exo'. Ta wa'alaje'ex xan bíin: Na'acaco'on bolano'ob séeba'an u bino'ob. Ma'alo', séeb xan bíin áalcabnaco'ob le máaxo'ob bíin ch'a'apachtique'exo'.

¹⁷Mil bíin púudzuco'ob ti' u ka'am t'aan jun túulili' wíiniqui', tuláacale'ex bíin púudzuque'ex ti' u ka'am t'aano'ob cincoi, tac quéen p'áatac chéen jun p'íite'ex je'el bix u p'áatal jun p'éel che' ch'ica'an tu ni' jun p'éel pu'uque' wa je'el bix jun p'éel chíicul tu yóokol jun p'éel jo'ol lu'ume'.

¹⁸Ba'ale' Yuumtzile' táan u pa'atique'ex u ti'al ca u ch'a'a óotzilil ti' te'ex; leti'e' táan u yaamyamtic u ye'esic u yaacunaj ti' te'ex, tumen Yuumtzile' u Ku toj p'is óolal. ¡Qui' u yóolo'ob máaxo'ob cu alab óolo'ob ti' leti'!

¹⁹U caajil Sión cajnáalech Jerusalén: ma' bíin ca'a okolnaquechi'. Yuumtzile' bíin u ch'a'a teech óotzilil le quéen u yu'ub táan a wawat táan káatic áantaj ti', chéen p'el u yu'ubique', bíin u núuque.

²⁰Quex u dzáa ti' teech Yuumtzil u waajil muuk yaj yéetel u ja'il yaj óolal, leti' máax a aj ca'anbesaje', ma' bíin u ca'a ta'acbesajubáa ti' techi'; bíin a wil ta wichil.

²¹Wa ca kéechel ta x no'oj wa ta x dzíiquil, bíin a wu'uy u yúuchul t'aan paachil ti' teech u ti'al ca u ya'al ti' teech: Way yaan le beja', xeene'ex te'ela'.

²²Bíin a p'ect bey ba'alo'ob ma' utz yanilo'ob le beetbil kuob plata u ca'ajo'ob yéetel le beetbil kuob bona'ano'ob yéetel oro. Bíin a wa'al ma'il ti' je'el bix le ba'ax ma' utz yanile', bíin a wa'al chéen u ta' míis.

²³Yuumtzile' bíin u dzáa ti' teech cháac u ti'al le i'inaj bíin a pak te j lu'um, le lu'umo' bíin u beet u yantal ya'abcach jadzutz trigo. Ti' le kiino' a wacaxe' bíin yanac ya'ab cúuchil u ti'al u tzéenticubáa.

²⁴Tac u wacaxilo'ob péecsaj lu'um yéetel le burro'ob cu meyajo'ob ta kaaxo'obo', bíin yanac asab ma'alob suuc u ti'al u jaanto'ob.

²⁵Le quéen kuchuc u kiinil le nojoch quíimsajil u ti'al u lúubul tuulumo'obe', bíin yanac áalcab ja'ob yéetel ya'abcach u lúubul ja'ob ca'anal u taalbalo'ob, pu'uco'ob yéetel ti' le ca'anal jo'ol lu'umo'ob.

²⁶Yuumtzile' bíin u dzac yéetel bíin u to'o' u yajil u wíinclilo'ob u caajal. Le uj túuno' bíin juulnac je'el bix u juul kiine', u juul le kiino' bíin p'áatac siete u téenel asab sáasilil, je'el bix u juul siete kiino'ob jun páaquili'e'.

²⁷Ile'ex, Yuumtzile' táan u taal náach; u p'uja'anile' táan u yelel yéetel u tatat buudzilanquil, u chi'e' chuup yéetel p'uja'anil, u yaake' bey káak cu jáabsaje',

²⁸u múus ike' bey áalcab ja' cu tuul u ti'al u kuchul tac tu caal wíinique'; leti'e' táan u taal u dzáa jun p'éel cuuch tu caal le múuch' caajo'obo' u ti'al ca u beet u yóotziltalo'ob, u ti'al ca u dzáa jun p'éel jok ni' ti' le caajo'obo' u ti'al ca u beet u sa'atalo'ob.

²⁹Ba'ale' a ti'ale'exe', bíin yanac kaayo'ob je'el bix tu áakabilo'ob quili'ich kiinbesaje'; bíin qui'imacchajac a wóole'ex je'el bix máaxo'ob cu xíimbalo'ob yéetel u paaxil flauta u ti'al u bino'on tu pu'uc Yuumtzilo', tu ta'acbejsajil Israel.

³⁰Yuumtzile' yaan u cha'ic u yu'uba'al u nojbe'en t'aan bíin xan u ye'es u páajtalil u ti'al u meyajnac yéetel u jakbe'en p'uja'anil cu tóoch'bal bey káak cu jáabsaj, bey xan yéetel u jaadz cháaco'ob, ka'amcach ja' yéetel j bat.

³¹Asiriae', bíin sen sajacchajac quéen u yu'ub u t'aan Yuumtzil yéetel quéen u kam u jaadz,

³²tu jujun téenil bíin jaadznac Yuumtzil tu yóokole', bíin beeta'ac u juum tamboro'ob yéetel arpaob. Bíin ba'atelta'ac yéetel jun p'éel nojoch ba'atel tumen Ku.

³³Úuch nu'ucbesa'ac u ti'al Asiria yéetel u ti'al u ajawil jun p'éel u cúuchil mukyaj cóoch yéetel taam, jun p'éel chujcab t'aba'an yéetel ya'abcach si'. U táaj ustaj Yuumtzil bíin t'abic yéetel ya'abcach asufre.