Read Yucateco Isaías 31 Bible Online

Isaías 31 - Yucateco bible

Isaías 31

¹¡Yaj yanil máaxo'ob cu bino'ob u caxanto'ob áantaj Egipto, le máaxo'ob cu yocsico'ob u yóolo'ob ti' tzíimino'ob, le máaxo'ob cu yocsico'ob u yóolo'ob ti' bolano'ob yéetel ti' sen ya'ab u tziimino'ob, cu dzo'ocole' ma' tu sutic u yicho'ob tu'ux yaan Ku u quili'ichil Israel, ma' tu caxantico'ob Yuumtzil!

²Ba'ale' leti'e' u yojel xan bix je'el u beetic u taal loobo'obe', cu dzo'ocole' le quéen u ya'al jun p'éel ba'ale' ma' tu suut paachil. Leti'e' bíin u jadz le j loolob máaco'obo', máaxo'ob áantic le loolob wíinico'obo'.

³Le j egipciobo' wíinico'ob, ma' kuobi'; u tziimino'obe' chéen bak u ca'ajo'ob, ma' pixano'obi'. Yuumtzile' bíin u tich' u kab u ti'al u jadzico'ob le máax cu canan yéetel le máax cu cananta'alo' bíin lúubuco'ob; laj quéet bíin láaj xu'uluco'ob.

⁴Yuumtzile' tu ya'alaj ti' teen: Je'el bix león dzo'oc u quíimsic jun túul j taman ma' tu cha'ic u ja'asa'al u yóol tumen aj canan j tamano'ob quex u much'juba'ob u ti'al j awat ca u ja'aso'ob u yóol, bey bíin talac Yuumtzil u Yuumil tuláacal páajtalil u ti'al u toc u caajal tu pu'uquil Sión.

⁵Je'el bix ch'íich' cu xiknal yóokol u ku' ti'al canantic, bey u cananta'al u caajil Jerusalén tumen Yuumtzil u yuumil tuláacal páajtalil; bíin u canante, bíin u loje, bíin u toque, bíin u jáalkabte.

⁶U paalal Israel, suunaque'ex ti' máax dzo'oc a yaayaj poch'ique'exo'.

⁷Tumen le kiin bíin a manba'alcunte'ex tuláacale'ex le beetbil kuob oro yéetel plata u ca'ajo'ob ta beetaje'ex yéetel a keban kabe'exo',

⁸Asiriae' bíin lúubuc tu yej máascab, ba'ale' ma' tu kab u páajtalil wíiniqui'. Ba'atele' bíin u beet u púudzul u cajnáalilo'ob, u táanquelem aj ba'atelilo'obe', bíin palitzilta'aco'ob;

⁹tu yo'olal u sajaquile', u ajawe' bíin jóokoc áalcabil u náacomo'obe', bíin u p'ato'ob u lacamo'ob. Lelo' Yuumtzil a'alic, leti'e' u dzaamaj jun p'éel chujcab Jerusalén u ti'al u beetic u mukyaj u aj p'eeco'ob.