Read Yucateco Isaías 32 Bible Online

Isaías 32 - Yucateco bible

Isaías 32

¹Bíin yanac jun túul ajaw u ti'al u beet ba'ax toj bíin yanac xan máaxo'ob u ti'al u méektáanto'ob u caajal yéetel tojil p'is óolal.

²Tu jujun túulilo'ob bíin u béeyaco'ob ta'acbejsajil ti' iik yéetel canantabáa ti' chac iikal, bey u becanilo'ob lu'um u ti'al u yúuchul jóoya' ti' tiquin lu'ume', bey u bo'oy jun p'éel nojoch tuunich tu chúumuc x tocoy lu'ume'.

³Bíin u p'il ma'alob u yicho'ob, bíin xan ch'en xiquinaco'ob ma'alob;

⁴ma' tu bin jáajan beeto'ob ba'alo'obi', bíin xan u tuculto'ob ma'alob ba'ax bíin beeto'obi', bíin u ya'alo'ob xan tuláacal ba'al jach je'el bix u najmale'.

⁵Máaco'obe' ma' bíin u ya'alo'ob utzil máac ti' p'ecbe'en wíiniqui', mix bíin u ya'al nojoch máac, ti' jun túul j táabsaj wíiniqui'.

⁶Tumen p'ecbe'en wíinique' cu t'aan bey p'ecbe'en wíinique' tumen tu poole' cu patic kaakas tuuculo'ob; cu caxtic bix u quíimsic wíinic, yéetel bix u ya'alic tuuso'ob tu yo'olal Yuumtzil; cu cha'ic u bin x pikil kabil máax wi'ij ma' tu dzáic ja' u yuk máax ukaj.

⁷J táabsaj wíinique', cu meyaj tuus ti' cu patic tu pool ba'alo'ob kaastac; yéetel u tuuso'obe' cu beetic kaas ti' óotzilo'ob, ti' máax cu máansic óotzilil cu káatic ba'ax cu najmatico'ob.

⁸Ba'ale' máax utz u pucsi'ikale', cu patic tu pool ba'alo'ob utztac, cu dzo'ocole' le ba'alo'ob utztaco' ma' tu tu'ubsic.

⁹Te'exe', co'olele'ex x ma' tuucule'ex, u'uye'ex ba'ax bin in ca'aj in wa'al ti' te'ex. Co'olele'ex mix ba'al sajbesique'ex, u'uye'ex in t'aano'ob.

¹⁰Bejela'e' mix ba'al sajbejsique'ex ba'ale' ichil jun p'íit maanalil ti' jun ja'abe', bíin péecnac a wóole'ex, tumen bíin ch'éenec le joocho', ma' bíin a mole'ex u láak uvaobi'.

¹¹Te'ex mix ba'al ca tucultique'ex, quiquilnene'ex; te'ex mix ba'al sajbesique'exe', péecnac a wóole'ex; pite'ex le búuco'obo', ca a búuquinte'ex to'och nooko'ob u ti'al u chíiculal okom óol.

¹²E'ese'ex táan a mukyaje'ex táan u che'ejo'ob le káaxo'obo' u x péet paachilo'ob le uvaobo'.

¹³Ki'ixo'ob yéetel ju'ub che'ob bíin ch'íijico'ob tin lu'umil, ichil tuláacal u najil qui'imac óolal caaj utz tu t'aan cha'ano'obo'.

¹⁴Le jalach najo' bíin xúunp'atta'ac, le caaj sen ya'ab u cajnáalilo'obo', bíin x tocoychajac; le tuulumo'obo', bíin xúunp'attaco'ob jun puli'; ti' bíin cajlaco'ob yéetel qui'imac óolal u burroilo'ob le káaxo', bíin páatac u janal wacaxo'ob ichil.

¹⁵Ba'ale' u páajtalil Yuumtzil le máax beetmailo'ono', bíin ca'a taalac t óokol, bey túuno' le x tocoy lu'umo', bíin ma'alobchajac u ti'al u yúuchul pakal, u lu'umil pakale', bíin asab cáacabchajac.

¹⁶Bíin ajawnac tojil yéetel ti'ibil bejil ti' tuláacal u cúuchililo'ob múuch' caajo'ob.

¹⁷Tojile', bíin u beet u xu'ulul ba'atel, bíin yanac jéedzel óolal yéetel x ma' sajaquil u ti'al mantadz.

¹⁸In caajale' bíin cajlac ti' jun p'éel cúuchil jejedzquil, ti' najo'ob ma'alob beeta'anilo'ob, ti' nucuch najo'ob tu'ux yaan jéedzel óolal,

¹⁹quex jáaych'acta'ac le káax yéetel quex t'onquinta'ac le caajo'.

²⁰Te'exe' bíin cajlaque'ex yéetel qui'imac óolal, bíin yanac ya'abcach ja' u ti'al u jóoyabta'al a pakale'ex yéetel ma'alob su'uc u ti'al burro yéetel u wacaxil buk lu'um.