Read Yucateco Isaías 33 Bible Online

Isaías 33 - Yucateco bible

Isaías 33

¹¡Yaj yanilech aj xu'ulsaj, ma' xu'ulsa'ani'; aj kex óol, ma' kex óolta'ani'! Quéen dzo'ococ a xu'ulsaje', bíin xu'ulsa'aquech, quéen dzo'ococ a kex óole', ca kex óolta'al.

²Yuumtzil, ch'a'a to'on óotzilil, tumen c alab óoltiquech. Áanto'on sáamsamal ja'atzcab kiin, teech c tocsajil tu kiinilo'ob talamil.

³Quéen u'uya'ac táan a taal jaadze' cu púudzul caajo'ob, quéen a wocsabáa ichil aj ba'atelo'obe' cu ki'itpajal le múuch' ca'ajo'obo';

⁴a aj p'eeco'obe' ya'abo'ob, bey u múuyalilo'ob sáako'obe', cu pulicuba'ob tu yóokolo'ob u ti'al j to'ocol u ayikalilo'obe'.

⁵Yuumtzile' leti'e' nojoch ajaw, leti'e' ti' caja'an te j ca'ano'; leti'e' dzo'oc u chupic Sión yéetel tojil bey xan yéetel ti'ibil bejil,

⁶mantadz bíin u dzáa jéedzel ti'. Ojéelajil yéetel kaj óolal jun p'éel u ayikalil cu tocsaj; u tzi'iquil Yuumtzile' jun p'éel ayikalil.

⁷¡U'uy bix u yawat yokolo'ob xiixib máaco'ob te j bejo' bix xan u yokolo'ob u aj bisaj t'aanilo'ob caxan jéedzel!

⁸Bejo'obe' x tocoychaja'ano'ob, mix máac cu máano'obi'. Cu mix ba'alcunta'al nup t'aano'ob, bey xan moc t'aano'ob; mina'an tziiquil u ti'al mix máac.

⁹Lu'ume' táan u yoktic u quimeno'ob, Líbanoe' táan u quíimil yéetel sublaquil, u táax kóom lu'umil Sarone' dzo'oc u suut x tocoyil, Basán yéetel u pu'uquil Carmeloe' dzo'oc u jáanpike'entalo'ob.

¹⁰Yuumtzile' cu ya'alic: Bejela'e' bin in ca'aj in we'es máaxen, bin in ca'aj in we'es buca'aj in nojochil yéetel in tzicbe'enil.

¹¹A jok jo'ole'ex yéetel a meyaje'exe', chéen su'uc yéetel u ta' míis; in wustaj bíin xu'ulsico'ob bey jun p'éel tóoque'.

¹²Caajo'obe' bíin su'utuco'ob u ta'anil káak; je'el bix ki'ixo'ob páacta'ano'ob bíin láaj eleco'ob ich káak.

¹³Máaxo'ob yano'ob náache' u yu'ubo'ob ba'ax dzo'oc in beetic, le yano'ob naadzo' u kaj óolto'ob in páajtalil.

¹⁴Tu caajil Sione' cu quiquilaanquil le j kebano'obo', le j loolob wíinico'ob cu sen ocol sajaquil ti'obo' cu ya'alico'ob: ¿Máax ti' to'on cu páajtal u p'áatal cuxa'an ichil jun p'éel káak cu jáabsaj, wa ti' jun p'éel chujcab mina'an tu'upul ti'?

¹⁵Máax beetic ba'al toj yéetel cu ya'alic ba'ax jaaje', máax ma' tu ayikalcunticubáa yéetel yaanal muuke' ma' tu cha'ic u ma'anal yéetel siibalo'ob, máax ma' tu jáan kamic bo'olal u ti'al tuus yéetel cu sutic u paach ti' ba'ax kaase',

¹⁶leti'e' bíin xi'ic utzil ti', bíin yanac tu'ux u ta'acbesicubáa ichil tuulum tuunicho'ob, mantadz bíin yanac waaj ti', ma' bíin p'áatac mina'an u yo'och ja'i'.

¹⁷Bíin a ca'a il u qui'ichquelmil ajaw; bíin dza'abac sen náach u xuulilo'ob le múuch' caajo'oba'.

¹⁸Quéen ka'ajac ti' teech bix cajnáalilech ca'ach ich sajaquile', bíin a wa'al: ¿Tu'ux yaan le máax cu xoc páatano'ob ca'acho'? ¿Tu'ux yaan le máax ilic ca'ach wa chuca'an le p'iiso'? ¿Tu'ux yaan le máax xoquic ca'ach le witzil najo'obe'?

¹⁹Ma' bíin cajlaquech ichil jun p'éel caaj mina'an u subtali', wa ma' tu páajtal u na'ata'al ba'ax cu ya'aliqui' tumen sen xa'axa'ak u t'aan, mix máac na'atic u t'aan.

²⁰Il a wil Sión u caajil c kiinbesajo'ob, sut a wich tu tojil Jerusalén le caaj ma'alob jedzecbalo'; bíin p'áatac je'el bix tu'ux cu yúuchul je'elel ma'alob yanile', u dzop che'ilo'obe' ma' bíin jo'odzoco'obi' mix bíin t'óococ u suumilo'obi'.

²¹Te'elo' ti' cu yila'al u nojbe'enil Yuumtzil ichilo'oni'. U cúuchil áalcab ja'ob, u becanilo'ob ja'ob sen cóochtaco'ob, ba'ale' ma' bíin ch'a'abac tumen aj p'eeco'ob yéetel u mejen cheemo'ob bey xan u nucuch cheemo'obi'.

²²U suumilo'ob le cheemo'obo' ma' tu páajtal u wa'alcuntico'ob u noj che'il; ma' tu páajtal u si'inil u nookilo'ob u ti'al u jíilta'al tumen iik. Bíin c toc ya'abcach ayikalil ti' le aj p'eeco'obo', tac le ch'óop bíin u kam ba'ax bíin dzabac ti', le móocho'obo' bíin u chokuba'ob u toco'ob le ba'alo'ob p'ata'ano'obo'. Tumen Yuumtzile' leti' c aj p'is óol leti' bíin a'alic bix bíin cuxlaco'on, leti' c ajaw, leti' xan bíin toquico'on.

²⁴Mix jun túul cajnáal bíin u ya'al: Koja'anen. Ku, bíin u sa'ats u si'ipilo'ob u cajnáalilo'ob Sión.